Wb/nia/Sanguhuku/8

I. Fekökö-kökö mado Geferayi. Latohugö wolohi Iraono Midiano

1 Ba lamane khönia mado Geferayi: Hana wa ömanö khöma, wa lö muhede'ö khöma? No ha ya'ugö zi möi fasuwö ba Ndraono Midiano andrö! ba fasoso sibai ira khönia. 2 Ba imane khöra: Hadia sa nilaugu, timba nilaumi? Tenga no ebua wo'uwo'u ni'ozaragö mado Geferayi, moroi ba mbua khö Gabiezeri mege? 3 Ba dangami ibe'e zalaŵa Ndraono Midiano andrö, Orebi ba Sebi, Lowalangi. Ba hadia nilaugu timba nilaumi? Ba me iŵa'ö da'ö, ba alö wönura khönia. 4 Ba me no irugi Yoridano Gideono ba me no i'ötö, awö zi tölu ngaotu andrö, si fao khönia, ba si no erege tödö wolohi [emali andrö], 5 ba mangandrö ia ba mbanua Zukota, imane: Mibe'e kue ba niha andre, ni'ohegu, no erege dödöra; solohi salaŵa Ndraono Midiano andrö, Seba ba Salamuna, ndra'odo. 6 Ba lamane salaŵa mbanua: Hadia, no so ba dangau gokhö ndra Seba Salamuna, wa mabe'e kue ba zabölö andrö khöu? 7 Ba imane Gideono: Lau, na ibe'e ba dangagu ndra Seba Salamuna Yehowa, ba ufufu nösimi doi manaze nihalö ba danö si mate. 8 Ba moroi ba da'ö isaŵa Wenieli, ba imanö göi khöra. Ba lamanö göi khönia banua Wenieli, si mane banua Zukota mege. 9 Ba imane göi ba mbanua Wenieli andrö: Na mangawulido lö hadia ia khögu, ba ududugö hati andre! 10 Ba ba Garakoro so ndra Seba Salamuna, awö zanuwö andrö khöra, mato 15,000 niha, dozi si tosai sanuwö andrö, soroi ba gatumbukha luo; ba si no mate, ba no 120,000, oi solohe si'öli. 11 Ba itörö lala zikoli Gideono, tanö ba gatumbukha i'otarai Noba ba Yogebeha, ba ihawui golombaseŵa, me no ahono manö tou zanuwö andrö. 12 Ba moloi ndra Seba Salamuna; ba igohi ira ba ira'u zalaŵa Ndraono Midiano andrö si darua, Seba ba Salamuna, ba sanuwö andrö fefu, ba zumaewe ibe'e.

II. Fanguhuku banua Zukota andrö ba banua Wenieli ba salaŵa Ndraono Midiano andrö, Seba ba Salamuna

13 Ba mangawuli Gideono, ono Yo'asi, me no irugi lala miyaŵa ba Heresi, ibato wolohi ya'ira. 14 Ba ira'u zamösa, nono matua, banua Zukota no mege, ba isekhegö, ba iŵa'ö khönia wanura töi zalaŵa Zukota ba satua mbanua, 77 niha. 15 Ba me irugi mbanua Zukota, ba imane: Ya'e ndra Seba Salamuna, nibe'emi börö wango'aya ya'odo, me mimane: Hadia no so ba dangau sa'ae gokhö ndra Seba Salamuna, wa mabe'e kue ba nawöu andrö, si no erege tödö? 16 Ba ihalö zalaŵa mbanua andrö ba ituyu ndraha manaze sodoi, ifabözi'ö mbanua Zukota andrö. 17 Ba hati andrö, ba Wenieli, ba idudugö, ba ibunu tou mbanuara andrö. 18 Ba isofu khö ndra Seba Salamuna, imane: He wisa nga'eu niha andrö, nibunumi ba gahe hili Dabora? Ba lamane: Adölö si mane ya'ugö ira göi; dozi ira, ba ono zalaŵa wamaigida! 19 Ba imane: No talifusögu, iraono ninagu. Ba wa'aduhu wa'auri Yehowa: ena'ö na no mi'orifi ira, ba lö ubunu ami! 20 Ba imane khö nononia si a'a, Yetero: Labu, ö'ötö ira! Ba lö isöbi zi'öli ono matua andrö, ata'u, me iraono na ia. 21 Ba lamane ira Seba Salamuna: Faoso, ya'ugö andrö, ba bunuga! he wisa niha sa, si manö göi wa'abölönia. Ba maoso Gideono, i'ö'ötö ndra Seba Salamuna. Ba ihalö khönia ni'obaŵa andrö, side-ide, aya gondrara ba mbagi.

III. Lö edöna Gideono lafataro ia razo, ba ifobörö wame'e adu

22 Ba lamane khö Gideono Iraono Gizeraeli: Iagö salaŵama, he ya'ugö, ba he onou dania, ba he ma'uwumö! me no ya'ugö zangefa'ö ya'aga ba danga Ndraono Midiano. 23 Ba imane khöra Gideono: Lö möiga salaŵami he ya'odo, ba he onogu dania, Yehowa zalaŵami! 24 Ba imane na khöra Gideono: So ni'andrögu khömi ma'ifu: Mibe'e khögu dauge andrö, ahuluami mege, dozi ami. (Me ma'uwu Zima'eli zanuwö andrö, ba no si so dauge) 25 Ba lamane: Mabe'e khöu da'ö saoha gölöma! Ba labologö tou mbaru sebua, ba dozi latou'ö tou ba da'ö dauge andrö, ahuluara mege. 26 Ba fa'abua dauge ana'a andrö, ni'andrönia khönia, ba no 1700 fondruyu, lö lai ni'obaŵa andrö ba saeru dalinga ba baru luo, baru zalaŵa Ndraono Midiano, ba lö lai naya gondrara andrö, aya ba mbagi. 27 Ba ibali'ö adu Gideono ba ibe'e ba mbanuara Ofera. Ba mamosumange adu andrö Ndraono Gizeraeli fefu, ba tobali tandraŵa khö Gideono ba ba zoroiyomonia fefu. 28 Ba tobali lahöndrögö Ndraono Midiano Iraono Gizeraeli, tobali tebai sa'ae maoso. Öfa wulu fakhe wa'ara, ba lö hadia ia ba danöra, götö wa'anau noso Gideono.

IV. Iraono Gideono ba fa'amatenia. Lafuli la'erogö Yehowa Iraono Gizeraeli

29 Ba ifuli ia ba khöra Yerubi-Mba'ali andrö, ono Yo'asi, ba nomonia soso sa'ae ia. 30 Ba 70 ngafulu nono matua khö Gideono, si ndruhu nononia, me no oya ndrongania. 31 Ba dongania ba döi andrö, banua Zikhema, ba mo'ono göi khönia, ono matua, ba Abimelekhi ibe'e töi nono da'ö. 32 Ba mate Gideono andrö, ono Yo'asi, no atua sibai, ba lako'o ia ba lewatö namania Yo'asi andrö, ba Gofera, banua ma'uwu Gabiezeri. 33 Ba me no mate Gideono ba lafosumange zui Mba'ali Iraono Gizeraeli, labe'e Lowalangira Mba'ali Mberiti andrö. 34 Ba lö itörö tödö Ndraono Gizeraeli Lowalangira Yehowa, si no mangefa'ö ya'ira ba danga nemalira fefu si tefasui ya'ira; 35 ba lö'ö göi la'omasi'ö nga'ötö Yerubi-Mba'ali Gideono andrö, timba zi sökhi andrö, nilaunia ba Ndraono Gizeraeli, mena'ö.

Famotokhi ba gahe

Fabaliŵa lala

Olayama Sanguhuku: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö