Wb/nia/Sanguhuku/7

I. Tefofanö zato, lö aröu-röu nitutuyu

1 Ba ihulö wongi wemaoso Yerubi-Mba'ali, ya'ia Gideono, i'ohe niha andrö fefu, si fao khönia; ba ba zinga gumbu Harodi molombase ira. Ba no yöunia golombaseŵa Ndraono Midiano, i'otarai hili More, ba ndraso misa. 2 Ba imane Yehowa khö Gideono: Abölö ato niha andrö, si fao khöu, tebai ube'e ba dangara Ndraono Midiano andrö, ma dania lasuno ira khögu Iraono Gizeraeli, ma lamane: Tangama wangorifima! 3 Ba ao, farongogö ba zato, ömane: Ha niha zata'u ba satalö tödö, ba yamufuli ia, yamuheta ia ba hili Gileadi! Ba 22,000 zangawuli niha, tobali hatö 10,000 zi tosai. 4 Ba imane Yehowa khö Gideono: Töra zui na niha; ohe mitou ira ba mbewe nidanö, ena'ö uföfö'ö ira ba da'ö. Ba niŵa'ögu khöu dania: Da'ö zi fao khöu, ba fao, ba dozi niŵa'ögu khöu: Böi fao da'ö, ba lö möi. 5 Ba i'ohe mitou ira ba mbewe nidanö. Ba imane Yehowa khö Gideono: Dozi samelai idanö lelara, nifamelai nasu, ba oniagö, ba si manö göi dozi samalöduhini tanö, ba we'amadugö tanga. 6 Ba fa'ato zamelai idanö, ba no 300; ba tanö bö'ö fefu, ba no samalöduhini tanö, ba wamadu idanö. 7 Ba imane Yehowa khö Gideono: Si tölu ngaotu niha andrö, samelai idanö, ube'e sangorifi ya'ami, da'ö u'oguna'ö ba wame'e ba dangau Iraono Midiano andrö; ba tanö bö'ö fefu, ba ndra mofanö, yamufuli ia khöra zamösana. 8 Ba lahalö mbalazo andrö khöra, awö dorofe khöra; ba Iraono Gizeraeli bö'ö fefu, ba iföfanö, hana na ifuli ia khöra zamösana, ha si 300 isaigö khönia. Ba olombaseŵa Ndraono Midiano, ba no tounia, ba Ndraso.

II. Te'abe'e'ö dödö Gideono ba wangifi

9 Ba ba zi bongi andrö, ba imane khönia Yehowa: Faoso, misaŵa golombaseŵa, tou andrö, noa sa ube'e ba dangau ia! 10 Ba na ata'u'ö möi mitou, ba ohe ngoni-ngoniu andrö, Fura andrö, ba mi'ae mitou ba zinga golombaseŵa, 11 ba fondrongondrongo, hadia niŵa'ö-ŵa'ö ba da'ö, ba abe'e dödöu dania, ba wanaŵa olombaseŵa. Ba i'ohe ngoni-ngoninia Fura andrö, möi ira mitou, lahatö'ö sibai ira ba zanuwö andrö, ba golombaseŵa. 12 No orudu ba da'ö, ba ndraso, Ndraono Midiano andrö ba Iraono Gamaleki ba si oroi danö tanö ba gatumbukha luo, fa'oya wali wa'atora, ba ondra khöra, ba lö mutaha mu'erai, fa'oya ngawua nene ba mbewe nasi wa'oya. 13 Ba me no ahatö Gideono, ba hiza zanunö khö nawönia fangifinia, imane: No mangifi ndra'o: U'ila roti gandru, si tegaölö mitou ba golombaseŵa Ndraono Midiano, irugi nose zalaŵa, göna ba da'ö, ba aso'a nose, tobali arö ibe'e [roti andrö], ba tou ba danö so nose. 14 Ba itema linia si samösa, imane: Tenga bö'ö da'ö, no si'öli Ndraono Gizeraeli andrö, si'öli Gideono andrö, ono Yo'asi. No ibe'e ba dangania Ndraono Midiano, fabaya olombaseŵa ma'afefu, Lowalangi.

III. Te'ala Ndraono Midiano andrö ibe'e Gideono

15 Ba me no irongo Gideono nitunö Ndraono Midiano andrö, fangifi andrö, ba eluahania, ba mangalulu ia; ba ifuli ia ba golombaseŵa Ndraono Gizeraeli, mu'ao ia, imane: Talabu! noa sa'ae ibe'e ba dangami golombaseŵa Ndraono Midiano. 16 Ba i'otölu zi 300 niha andrö, tölu bawa ibe'e, ba idozigö ira torofe, awö migö si lö ösi, ba dangara; ba bakha ba migö andrö, ba sulu. 17 Ba imane khöra: Mifaigi ndra'o ba mi'o'ö khögu; na no urugi zinga golombaseŵa, ba milau nilaugu. 18 Na ulau dorofe, awö zi fao khögu fefu, ba ya'ami göi molau torofe ba zi fasui olombaseŵa fefu, ba mu'ao ami, mimane: Föda khö Yehowa, föda Gideono! 19 Ba irugi zinga golombaseŵa Gideono awönia zi otu andrö, si fao khönia, me talu mbongi, me awena sibai lafataro zanaro, ba lalau dorofe ba laboto migö andrö ba dangara, ba tölu bawa manö, 20 ba molau torofe, laboto migö, ba latuyu tangara kabera zulu, ba ba gambölö, ba torofe, ba wolau, ba mu'ao ira, lamane: Föda khö Yehowa, föda Gideono! 21 Ba lö ibulö'ö ia ba nahania zamösana, ba zi fasui olombaseŵa. Ba mu'awa manö ba golombaseŵa ma'afefu, ba moloi, mu'ira-ira. 22 Ba me lalau dorofe si tölu ngaotu andrö, ba faoma la'ö'ötö nawöra [Iraono Midiano] ba golombaseŵa ma'afefu, ibe'e Yehowa, ba moloi zi so ba golombaseŵa, larugi Mbeti Hasita, tanö ba Zereda, irugi mbewe nidanö ba Habeli Mehola, ba zinga Dabata. 23 Ba tekaoni göi Ndraono Gizeraeli, mado Nafetali ba mado Gaseri ba mado Manase ma'afefu, ba lagohi Ndraono Midiano. 24 Ba ifatenge göi zinenge Gideono ba hili mado Geferayi ma'asambua, ifaŵa'ögö khöra [ba da'ö]: Mi'ae mitou, mifaondragö Ndraono Midiano andrö ba miba'a khöra götöna ba nidanö misa ba ba Yoridano! Ba so mado Geferayi fefu, laba'a götöna ba nidanö misa, irugi Mbeti Bara ba ötöna ba Yoridano. 25 Ba lara'u zalaŵa Ndraono Midiano andrö, si darua, Orebi ba Sebi, ba ba gowe Gorebi labunu Gorebi ba Sebi, ba ba wolazi Zebi. Ba lagohi Ndraono Midiano. Ba bögö ndra Orebi Sebi andrö, ba la'ohe khö Gideono, miyefo Yoridano.

Famotokhi ba gahe

Fabaliŵa lala

Olayama Sanguhuku: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö