Wb/nia/Sanguhuku/3

I. Si tosai niha baero. Barö mbawara Ndraono Gizeraeli

1 Ba da'ö soi andrö, nisaigö Yehowa, ba wame'e fanandraigö Ndraono Gizeraeli ya'ira, fanandraigö fefu zi lö anehe mege fasöndrata andrö ba wangokhögö tanö Gana'ana, 2 — börö mado Gizeraeli andrö, ba wamahaö ya'ira ba wanuwö, ya'ira si lö anehe fasöndrata andrö föna: 3 Razo Ndrawa Wilisiti andrö, si lima, ba Dawa Gana'ana fefu, banua Zidona ba Iraono Hewi, ba hili Libano, i'otarai hili Mba'ali Heremono, irege lala ba Hamata. 4 Fanandraigö Ndraono Gizeraeli ira, ba wamaigi, na la'o'ö goroisa Yehowa andrö, nibe'enia khö ndra tuara, nifa'ema Mose. 5 Ba tobali tefasui Ndraono Gizeraeli Dawa Gana'ana ba Iraono Kheti ba Iraono Gamori ba Iraono Weresi ba Iraono Hewi ba Iraono Yebusi, 6 lahalö nonora alawe ba labe'e ba nonora matua nonora, ba lafosumange Lowalangira andrö. 7 Ba si lö omasi Yehowa lalau Iraono Gizeraeli; olifu ira Lowalangira, Yehowa, ba lafosumange Mba'ali ba Asera andrö. 8 Ba mofönu Yehowa ba Ndraono Gizeraeli ba ibe'e ira ba danga Gusa Risata'i, razo Garamo Nahara'i; meŵalu fakhe barö mbawa Gusa Risata'i Ndraono Gizeraeli.

II. Otenieli, sanguhuku si föföna andrö

9 Awena la'angaröfi li Yehowa Iraono Gizeraeli, ena'ö itolo ira. Ba i'asogö ba Ndraono Gizeraeli zangorifi Yehowa, sangefa'ö ya'ira: Otenieli andrö, ono Gena, akhi Galebi. 10 Ba so khönia Geheha Yehowa, ba ifaigi lala ba Ndraono Gizeraeli. Ba möi ia fasuwö, ba ibe'e ba dangania Gusa Risata'i, razo Garamo andrö, Yehowa, ba ilaŵa Gusa Risata'i. 11 Ba öfa wulu fakhe, ba lö hadia ia ba danö. Ba mate Gotenieli, ono Gena.

III. Ibunu razo Ndraono Moabi, Ehudi, Samigaro

12 Ba lafuli lalau zi lö omasi Yehowa Iraono Gizeraeli. Ba ibe'e ba danga Negelono, razo Ndraono Moabi, Ndraono Gizeraeli Yehowa, me no lalau zi lö omasi Yehowa. 13 Ba ihalö awönia Ndraono Gamoni ba Iraono Gamaleki da'ö, möi ia, isuwö Ndraono Gizeraeli ba i'okhögö mbanua khorema andrö. 14 Feleŵalu fakhe Ndraono Gizeraeli barö mbawa Negelono, razo Ndraono Moabi. 15 Ba la'angaröfi li Yehowa Iraono Gizeraeli, ba i'asogö khöra zangorifi Yehowa, Ehudi andrö, ono Gera, mado Mbeniyami, niha si takera. Ya'ia zama'ema beo Ndraono Gizeraeli khö Negelono, razo Ndraono Moabi. 16 Ba ifazökhi khönia göri Ehudi, göri si faoma bawa, ha lito wa'anau, ba ibe'e ba löwi-löwinia, barö mbarunia, ba gambölönia. 17 I'ohe, me möi ia molohe beo andrö khö Negelono, razo Ndraono Moabi. Ba Egelono andrö, ba no niha sesolo sibai. 18 Ba me no ifa'ema mbeo andrö, Ehudi, ba ifasao mangawuli niha andrö, sonoro beo andrö mege; 19 ba ya'ia, ba ifuli ia, me no larugi nadu andrö ba Giligala, ba imane khö Negelono: So niŵa'ögu khöu razo, ba zi lö niha! Ba imane: Bö'ua! Ba möi baero fefu zi so ba ngainia. 20 Ba me no möi si bakha khönia Ehudi, me ha ya'ia zidadao ba mbate'e yaŵa, ba zokafukafu, ba imane Ehudi: So khögu niŵa'ö Lowalangi khöu! Ba maoso ia, moroi ba dadaomania. 21 Ba isöbi zi'öli ba gambölonia Ehudi tangania kabera, 22 itaru'ö ba dalunia, irege ahöndrö na bakha ndranga göi, fabaya ösi, ba te'u'u ba dawö nösi, lö'ö sa ifuli idöni zi'öli ba dalunia, no atöla dambai. 23 Ba möi baulu Gehudi. Iduhö mbawandruhö mbate'e yaŵa, furinia, ba ilazi. 24 Ba ha si'ai mofanö ia, ba so wazuri Negolono. Ba me la'ila, no mulazi mbawandruhö mbate'e yaŵa, ba lamane dödöra: Te no möi ia ba nidanö ba mbate'e ba zokafukafu andrö. 25 Ba labazebaze'ö manö. Ba me lö'ö manö na ibokai mbawandruhö mbate'e yaŵa, ba lahalö wogoe ba lakoe, ba hiza tou ba zalo zokhö ya'ira, no mate. 26 Ba barö wa'aröröra andrö, ba no moloi Gehudi, no irugi nadu andrö, ba ikhamö Ze'ira. 27 Ba me no irugi yomo mbanua, ba ilau dorofe ba hili Geferayi. Ba möi mitou Ndraono Gizeraeli, awönia, moroi ba hili, ba ya'ia zangoloi'ö. 28 Ba iŵa'ö li khöra, imane: Mitabu awögu, mitou, noa sa ibe'e ba dangami nemalimi andrö, Iraono Moabi, Yehowa. Ba möi ira mitou, awönia, laba'a götöna ba Yoridano, tanö ba danö Ndraono Moabi, samösa lö lafatörö. 29 Ba te'ala Ndraono Moabi, labe'e, me luo da'ö, mato 10.000 zi mate, oi sabölö, solohe baluse, samösa lö soloi labe'e. 30 Ba tobali möi barö mbawa Ndraono Gizeraeli Ndraono Moabi, me luo da'ö. Ba 80 fakhe wa'ara, ba lö hadia ia khöra ba danö. Ba sanguhuku ya'ira Gehudi, irugi wa'amatenia. 31 Ba aefa da'ö, ba Samigaro, ono Ganata; sangalani Dawa Wilisiti da'ö, 600 ibunu bözi-bözi göröbao, ba sangorifi Iraono Gizeraeli ia göi.

Famotokhi ba gahe

Fabaliŵa lala

Olayama Sanguhuku: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö