Wb/nia/Sanguhuku/4

I. La'erogö zui Yehowa Iraono Gizeraeli ba iotu'ö ira razo Ndrawa Gana'ana

1 Ba lafuli zui lalau zi lö omasi Yehowa Iraono Gizeraeli — noa sa mate Gehudi. 2 Ba i'amawa ira Yehowa ba danga Yabino andrö, razo Ndrawa Gana'ana, ba Hasora. Ba kumandra sebua khönia Zisera, banua Haroseti niha baero. 3 Ba la'angaröfi li Yehowa Iraono Gizeraeli. Siŵa ngaotu sa khö Zisera gureta si'öli ba iforege wamakao Iraono Gizeraeli, dua wulu fakhe wa'ara.

II. La'orifi ira ira Debora Baraki

4 Ba me luo da'ö, ba sanguhuku Iraono Gizeraeli, ba Debora, fo'omo Lafidoti, sama'ele'ö ira alawe. 5 Barö nohi Debora andrö so nomonia, ba gotaluara Rama Mbetieli, ba hili Geferayi, ba möi-möi khönia Ndraono Gizeraeli, ba wamatunö huhuora. 6 Ba ifatenge zinenge, ifakaoni'ö Mbaraki andrö, ono Gabinoa, banua Gedesi ba Ndraono Nafetali, ba imane khönia: Si ndruhu! no iŵa'ö Yehowa, Lowalangi Ndraono Gizeraeli: Labu, ae ba hili Dabora ba ohe awöu zi 10,000 niha, mado Nafetali ba mado Zebuloni; 7 ba u'ohe Zisera andrö, kumandra andrö khö Yabino, awö gureta andrö khönia, awö zato khönia, ba wamaondragö ya'ugö, ba zinga mbombo Kizono, ba ube'e ba dangau ira. 8 Ba imane khönia Baraki: Na möi ndra'ugö awögu, ba möido, ba na lö möi'ö awögu, ba lö möido! 9 Ba imane: Möido sa awöu, ba tenga khöu dania wa'ebua duria, ba we'amöimö andrö, ba danga ndra alawe dania i'amawa Zisera andrö Yehowa. Ba maoso Debora, möi ia awö Mbaraki ba Gedesi. 10 Ba ifakaoni'ö ba Gedesi mado Zebuloni, awö mado Nafetali Baraki; 10,000 niha si fao khönia misi yaŵa ba fao göi khönia misi yawa Debora. 11 Ba Heberi andrö, Iraono Geni, ba no iheta ia khö Ga'ino andrö, ma'uwu Hobabi, matua Moze, ba sate idaru-daru'ö nosenia, irugi manawa andrö ba ngai Za'ana'i, sahatö ba Gedesi. 12 Ba me la'ombakha'ö khö Zisera, no möi misi yaŵa ba hili Dabora Mbaraki andrö, ono Gabinoa, 13 ba i'oroi'ö guretania andrö fefu Sisera, 900 gureta si'öli, awö zabölö andrö fefu, si fao-fao khönia; la'otarai Haroseti niha baero andrö, lasaŵa mbombo Kizono. 14 Ba imane Debora khö Mbaraki: Labu! me no da'e mbaŵa andrö, ba nibe'e Yehowa ba dangau Sisera andrö; noa sa Yehowa zi möi, mowaö-waö fönau! Ba möi mitou Mbaraki moroi ba hili Dabora, ba 10,000 zolo'ö ya'ia niha. 15 Ba ikeani Zisera, awö guretania fefu, awö zabölö khönia fefu, Yehowa, föna Mbaraki, me la'abölögö wolau khöra; ba möi tou Zisera, moroi ba gureta, moloi, itörö tanö. 16 Ba igohi gureta andrö ba sanuwö andrö Baraki, irugi Haroseti niha baero, ba ahori mate ba mbawa zi'öli zabölö andrö khö Zisera, samösa lö si tosai.

III. Ibunu Zisera andrö Ya'ela

17 Ba Sisera, ba no moloi, no itörö tanö ba no isaŵa nose Ya'ela andrö, fo'omo Ndraono Geni andrö, Heberi; lö'ö sa si fa'udu ira Yabino, razo Hasora, zi samba omo andrö Heberi, Iraono Geni. 18 Ba möi tou Ya'ela, ifaondragö Zisera, imane khönia: Ae baose Tua, ae baose khögu; lö hadia ia ni'ata'ufi! Ba möi ia baose khönia, ba ibalugö ia tufo. 19 Ba imane khönia: Hadia, lö öbe'e ögu nidanö ma'ifu? Owökhi dödögu. Ba ibokai naha zusu zaŵi, ibe'e önia; ba ifuli ihawui ambala. 20 Ba imane khönia: Iagö mbawandruhö nose, ba na so niha, na isofu khöu, na imane: Hadia, so ba da'e niha? ba ömane: Lö'ö! 21 Ba ihalö gosö-osö nose Ya'ela andrö, fo'omo Heberi, ba ituyu warökha, lö ida'i-da'i we'amöi ba ngainia ba ibözi ba dangi-danginia gosö-osö andrö, irege tetaru ba danö, noa sa mörö ia. Ba ono matelö ia ba mate. 22 Ba ba da'ö sibai so Mbaraki, solohi Sisera. Ba möi tou Ya'ela, i'ondrasi ia, imane khönia: Ae ba da'e, da'uroma'ö khöu niha andrö, ni'aluimö! Ba me möi ia baose khönia, ba i'ila tou Zisera, si no mate, ba lö si tebulö ba dangi-danginia gosö-osö andrö; 23 Si manö wa'ate'ala Yabino andrö, razo Ndrawa Gana'ana, labe'e Iraono Gizeraeli, me luo da'ö, itolo Lowalangi. 24 Ba itugu lahöndrö-höndrögö Yabino andrö, salaŵa Ndrawa Gana'ana, Iraono Gizeraeli, irege lafalua wamakiko ya'ia.

Famotokhi ba gahe

Fabaliŵa lala

Olayama Sanguhuku: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö