Wb/nia/Sanguhuku/20

I. Mamagölö mado Ndraono Gizeraeli ba wanuwö mado Mbeniyami

1 Ba maoso Ndraono Gizeraeli fefu, falukha ira föna Yehowa ba Misefa, ha wa'ato ira, ha sara dödö, i'otarai Dano, numalö ba Mbereseba, ba banua Gileadi. 2 Ba högöra fefu, dozi mado Ndraono Gizeraeli, ba ahori so ba walukhata mbanua Lowalangi andrö — 400.000 niha, sanörö tanö, solohe si'öli. 3 Ba larongo mado Mbeniyami, no möi ba Misefa Ndraono Gizeraeli. Ba lamane Iraono Gizeraeli: Mi'ombakha'ö, he wisa ba wolau si lö sökhi andrö mege! 4 Ba imane ono Lewi andrö, sodonga ira alawe nibunu andrö: Urugi Gibea ba danö mado Mbeniyami, awö ndrongagu ba döi andrö, ba wemörö ba da'ö. 5 Ba maoso khögu mbanua Gibea andrö, lafasui nomo ba zi bongi, so dödöra si lö sökhi khögu: ya'odo, ba labunu mena'ö, ba dongagu ba döi andrö, ba no lafakao, no labe'e mate. 6 Ba utuyu ndrongagu ba döi andrö, utema ukhökhö, ufa'ohe'ö, udozigö banua Ndraono Gizeraeli; noa sa manao horö ira, no si lö sökhi lafazökhi ba Ndraono Gizeraeli! 7 Ba no ahori so ami, ya'ami, Iraono Gizeraeli! Ba miŵa'ö huku ba da'ö, mifaigi lala! 8 Ba maoso ira fefu, ha sara dödö, ba lamane: Ya'ita fefu, ba samösa lö tola mofanö, samösa lö tola mangawuli ba khöra! 9 Hiza, da'ö talau ba mbanua Gibea andrö: talau dahö-dahö khöra. 10 Dafulu tatutuyu ba zi otu ba mado Ndraono Gizeraeli fefu, otu ba zi hönö ba hönö ba zi fulu ngahönö, ena'ö lafaigi mbalazo zato, ena'ö tasulöni ba Gibea mado Mbeniyami horö andrö, nifazökhira ba Ndraono Gizeraeli. 11 Ba owulo Ndraono Gizeraeli ba zinga mbanua andrö, ha sara dödö.

II. Mama'anö göi mado Mbeniyami ba wasuwöta andrö

12 Ba lafatenge zinenge ba mado Mbeniyami fefu mado Ndraono Gizeraeli andrö, lamane khöra: Hadia horö andrö, nirongoda ba khömi? 13 Ba mibe'e baero niha si si lö yaŵa andrö, banua Gibea, ena'ö mabunu, ena'ö mahori zi lö sökhi andrö ba Ndraono Gizeraeli! Ba te khö mado Mbeniyami wolo'ö niŵa'ö dalifusöra andrö, Iraono Gizeraeli. 14 Ba so mado Mbeniyami, banua bö'ö, möi ba Gibea, möi fasuwö ba Ndraono Gizeraeli. 15 Ba fa'ato mado Mbeniyami, banua no mege misa, me luo da'ö, ba no 26.000, solohe si'öli, lö lai mbanua Gibea andrö, 700 da'ö nitutuyu. 16 Ba ba niha da'ö fefu, ba 700 nitutuyu zi takera; ba dozi enahöi sibai waribosa, göna mbu si ha sara labe'e, lö'ö manö fasala.

III. Mendrua te'ala mado Ndraono Gizeraeli. Mangalulu ira khö Yehowa

17 Ba sabölö Ndraono Gizeraeli, lö lai mado Mbeniyami, ba no 400.000 solohe si'öli, oi sabölö. 18 Ba maoso ira, lasaŵa misi yaŵa Mbetieli, lasofu khö Lowalangi, lamane: Ha niha zi börötaigö manuwö mado Mbeniyami. Ba imane Yehowa: Mado Yuda ua. 19 Ba maoso Ndraono Gizeraeli, lahulö wongi, ba fönaföna Gibea tebato ira. 20 Ba möi zabölö Ndraono Gizeraeli andrö, ba wolau ba mado Mbeniyami, lafa'oli ira ba gametahöra, ba gamaudu Gibea. 21 Ba so moroi yomo ba Gibea mado Mbeniyami, ba 22.000 la'ö'ötö tou, Iraono Gizeraeli [mado Mbeniyami], me luo da'ö. 22 Ba möi misi yaŵa Ndraono Gizeraeli, mege-ege föna Yehowa, irege bongi; ba lasofu khö Yehowa, lamane: Hadia, mafuli möi manuwö talifusöma andrö, mado Mbeniyami? Ba imane Yehowa: 23 Mifuli mi'ae'e! Ba la'abe'e'ö dödöra sato, sabölö Ndraono Gizeraeli andrö, ba lafuli lafa'oli ira, ba zi so ira me luo labörötaigö. 24 Ba me lafuli lafaondragö mado Mbeniyami Iraono Gizeraeli, me mahemolu ö, 25 ba so moroi yomo ba Gibea mado Mbeniyami, me luo da'ö [göi], ba 18.000 zui la'ö'ötö tou Iraono Gizeraeli — oi solohe si'öli. 26 Ba möi misi yaŵa ba Mbetieli Ndraono Gizeraeli fefu, sato fefu, ba ba da'ö la'iagö, mege-ege föna Yehowa ba mamoni ba gö, me luo da'ö, irege bongi. Ba labe'e khö Yehowa zumange nitunu ba sumange fangorifi. 27 Ba lafuli lasofu khö Yehowa Iraono Gizeraeli — me luo da'ö, ba ba da'ö so dawöla, naha zura goroisa Lowalangi, ba Fineha andrö, 28 ono Geleazari, ma'uwu Ga'aroni, zangai-ngai halöŵö ba khönia — lamane: Hadia, mafuli möi, zamuza tö, manuwö talifusöma andrö, mado Mbeniyami, ma maböhöli? Ba imane Yehowa: Mi'ae'e, mahemolu ube'e sa ba dangami ira.

IV. Te'ala sibai mado Mbeniyami. Ahatö-hatö lahori mado Mbeniyami

29 Ba lafatenge Iraono Gizeraeli zamini'ö ya'ira ba zinga Gibea, fasui. 30 Ba mahemolu ö, ba so Ndraono Gizeraeli, ba wolau ba mado Mbeniyami, lafa'oli ira ba gamaudu Gibea, si mane si mendrua mege. 31 Ba so moroi yomo mado Mbeniyami, lafaondragö ira, ba tedönisi, aefa ba zinga mbanua, ba labörötaigö labubunu ösa Ndraono Gizeraeli, si mane mege, ba lala andrö, sara zaekhu misi yaŵa ba Mbetieli ba si sara, ba sanörö benua, saekhu ba Gibea; mato 30 niha, Iraono Gizeraeli, labunu. 32 Ba lamane dödöra mado Mbeniyami: Te'ala zui ira khöda, si mane mege. Ba noa sa mamagölö Ndraono Gizeraeli, no lamane: Talau moloi [ua], ena'ö tadönisi ira ba lala andrö, aefa ba mbanua. 33 Ba mozo Ndraono Gizeraeli fefu, owulo ira, la'iagö zinga Mba'ali Damara, ba so göi nawöra andrö, la'oroi nahara mbini-mbini, ba zi tambai Gibea, tanö ba gaekhula luo. 34 Ba 10.000 sabölö Ndraono Gizeraeli nitutuyu zanaŵa gamaudu Gibea ba tobali fasöndrata sabölö-bölö sibai, ba ikhamö ira famakiko, si lö mudöna-döna. 35 Te'ala mado Mbeniyami ba Ndraono Gizeraeli ibe'e Yehowa, ba 25.100 niha la'ö'ötö tou, mado Mbeniyami, Iraono Gizeraeli, me luo da'ö, oi solohe si'öli. 36 Ba aboto ba dödö mado Mbeniyami, wa no te'ala ira. Lafolala mado Mbeniyami Iraono Gizeraeli, ladöna-döna sa ba nifatarora ba mbini-mbini andrö, ba zinga Gibea. 37 Ba lagösö lasaŵa Gibea si so ba mbini-mbini andrö, möi ira mu'ö'ötö tou mbanua Gibea fefu. 38 Ba no mamagölö Ndraono Gizeraeli ba zi so ba mbini-mbini andrö, ena'ö latunu nomo, yomo ba mbanua, tandra khöra. 39 Ba me moloi Ndraono Gizeraeli, ba wasöndrata andrö ba me labörötaigö mado Mbeniyami labunu ösa Ndraono Gizeraeli — mato tölu ngafulu — me lamane dödöra: Te'ala sa ira khöda, si mane ba wasöndrata si föföna mege! 40 — ba hiza zimbo andrö, si oroi moroi yomo mbanua, tandra no mege, ba me lafaigi furira mado Mbeniyami, ba humola sa'ae mbanua ma'asambua, irugi mbanua si yaŵa hola-hola. 41 Ba lafuli ira furi Iraono Gizeraeli, ba tobali dödö mado Mbeniyami, aboto sa'ae ba dödöra, wa no ikhamö ira famakiko. 42 Ba lawuwu ira furi labe'e Iraono Gizeraeli, latörö lala saekhu ba danö si mate, ba lalau-lau na khöra moroi furi. Ba lafa'u'u göi ira si oroi mbanua misa, ba la'ö'ötö tou. 43 Lafasui mado Mbeniyami, la'o'ö irege zolombase ira ena'ö ba lahundragö, irugi ba gamaudu Gibea, tanö ba gatumbukha luo. 44 Ba 18.000 zi mate ba da'ö, mado Mbeniyami, oi sabölö. 45 Ba moloi sa'ae ira, lasaŵa danö si mate, tanö ba gara Rimono andrö, ba ba lala andrö, ba 5.000 tö na labunu Iraono Gizeraeli ba lagohi ira, irugi Gideomo, ba 2.000 labunu na barö ö. 46 Ba fa'ato nibunu fefu, me luo da'ö, mado Mbeniyami, ba no 25.000 solohe si'öli, oi sabölö. 47 Hatö 600 zoloi, sanaŵa tanö si mate, ba ngai gara Rimono andrö, ba öfa waŵa ira ba ngai gara Rimono. 48 Ba lafuli ira Iraono Gizeraeli, ba zi tosai mado Mbeniyami, la'ö'ötö tou si'öli zi tosai banuara, ba he urifö, fefu zi falukha ira, ba banua bö'ö fefu göi, ba latunu.

Famotokhi ba gahe

Fabaliŵa lala

Olayama Sanguhuku: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö