I. I'oroma'ö ia mala'ika khö wo'omo Manoa andrö
edit1 Ba lalau zui zi fatuwu khö Yehowa Iraono Gizeraeli; ba ibe'e ba danga Ndrawa Wilisiti ira Yehowa, öfa wulu fakhe wa'ara. 2 Ba so niha, banua Zorea, mado Dano, Manoa döi, ba dongania, ba si lö ono, lö irai mo'ono. 3 Ba i'oroma'ö ia ba ndra alawe andrö mala'ika Yehowa andrö, imane khönia: Hiza sa, si lö ono ndra'ugö, lö örai mo'ono, ba manabina dania ndra'ugö ba mo'ono'ö, ono matua. 4 Ba amoni'ö, böi badu nagu ba he hadia ia zi mabu niha, ba böi a hadia ia zi ra'iö.[1] 5 Ba manabina dania ndra'ugö ba mo'ono'ö ono matua; ba lö tola dania lafatörö wanöwö ba högö nono andrö, me ni'amoni'ö khö Yehowa dania ia, i'otarai dalu ninania, ba ya'ia zi börögö dania mangefa'ö Iraono Gizeraeli ba danga Ndrawa Wilisiti.[2] 6 Ba möi ndra alawe andrö, itunö khö ndrongania, imane: No möi khögu genoni Lowalangi; hulö mala'ika Lowalangi wamaigigu, — sata'u sibai ita, ba lö nisofugu khönia heza moroi ia, ba töinia, ba lö ni'ombakha'önia khögu. 7 Ba imane khögu: Na manabina dania ndra'ugö ba na mo'ono'ö, ono matua, ba böi badu nagu ba he hadia ia zi mabu niha, ba böi a hadia ia zi ra'iö, me ni'amoni'ö khö Lowalangi dania nono andrö, i'otarai dalu ninania, numalö ba wa'amatenia.[3]
II. Ifuli oroma mala'ika andrö
edit8 Ba mangandrö Manoa khö Yehowa, imane: He So'aya! Ena'ö na ifuli ia khöma enoni Lowalangi andrö, nifatengemö, ba ena'ö na ifahaö ndra'aga, he mawisa ba khö nono andrö, si tumbu dania! 9 Ba i'o'ö khö Manoa Lowalangi, tobali ifuli ia ba ndra alawe andrö mala'ika Lowalangi andrö, me no dumadao ia ba nowi, lö ira matuania, Manoa. 10 Ba fagohi ndra alawe andrö, i'ombakha'ö khö ndrongania, imane: Hiza, no ifuli i'oroma'ö ia khögu niha andrö, si no möi khögu bohou na! 11 Ba maoso Manoa, i'o'ö ndrongania, ba me irugi zi so niha andrö, ba imane khönia: Hadia, ya'ugö niha andrö si fahuhuo ba ndra alawe andre? Ba imane: Ya'ia! 12 Ba imane Manoa: Ba na itörö niŵa'öu andrö, ba he mawisa ba nono andrö, he wisa lala? 13 Ba imane mala'ika Yehowa khö Manoa: Fefu hadia ia niŵa'ögu ba ndra alawe andre, ba lö ibabaya. 14 Ma'ifu manö lö tola i'a hadia ia zi otarai ŵeŵe nagu; agu ba hadia ia zi mabu niha, ba lö tola ibadu, ba hadia ia zi ra'iö, ba lö tola i'a: fefu hadia ia niŵa'ögu khönia, ba itöngöni. 15 Ba imane Manoa khö mala'ika Yehowa andrö: Omasiga mataha'ö ba mabe'e öu nono nambi. 16 Ba imane mala'ika Yehowa khö Manoa: Ba he ŵa'ae ötahado ena'ö, ba lö'ö sa atö u'a wöfö göu; ba na edöna'ö ö'asiwai zumange nitunu, ba khö Yehowa tandrösaigö. Lö'ö sa i'ila Manoa wa no mala'ika Yehowa andrö. 17 Ba imane Manoa khö mala'ika Yehowa andrö: Ha niha döimö? Na itörö dania niŵa'öu, ba mafosumange ndra'ugö. 18 Ba imane khönia mala'ika Yehowa: Hadia wa osofu döigu? — noa sa atö sahöli-höli dödö![4]
III. Mame'e sumange Manoa. Fa'atumbu Zimesono
edit19 Ba ihalö nono nambi andrö Manoa, fabaya sumange ni'a andrö, ibe'e sumange Yehowa, ba dete gara. Ba hiza zahöli-höli dödö, anehe Manoa ba dongania. 20 Me ebua miyaŵa ba mbanua hola-hola galitö ba naha wame'e sumange, ba numalö miyaŵa mala'ika Yehowa andrö ba hola-hola galitö andrö ba naha wame'e sumange. Ba me la'ila da'ö Manoa ba dongania, ba lafalögu tou ira ba danö. 21 Ba lö'ö sa'ae i'oroma'ö ia khö Manoa ba khö ndrongania mala'ika Yehowa andrö. Ba aboto ba dödö Manoa, wa no mala'ika Yehowa. 22 Ba imane Manoa khö ndrongania: Si mate ita, me no ta'ila Lowalangi![5] 23 Imane khönia dongania: Na nilau dödö Yehowa ibunu ita, ba lö itema mena'ö khöda zumange nitunu ba sumange ni'a, ba lö i'oroma'ö khöda da'ö fefu ba lö ifarongogö khöda zi mane da'ö. 24 Ba mo'ono ndra alawe andrö, ono matua, ba Simesono ibe'e töi; ba manöi nono andrö ba ifahuwu'ö ia Yehowa.[6] 25 Ba ibörötaigö i'o'ou ia Eheha Yehowa ba golombaseŵa mado Dano andrö, ba gotaluara Zorea Gesa'oli.
Famotokhi ba gahe
editFabaliŵa lala
editOlayama Sanguhuku: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö