Wb/nia/Sanguhuku/1

I. Lasuwö Ndrawa Gana'ana mado Yuda ba mado Zimeoni

1 Ba tobali me no mate Yosua, ba lasofu khö Yehowa Iraono Gizeraeli, lamane: Ha niha ndra'aga zi föföna möi misiyaŵa ba Ndrawa Gana'ana, fasuwö khöra? 2 Imane Yehowa: Mado Yuda zi föföna möi misiyaŵa; ube'e ba dangara danö. 3 Ba lamane mado Yuda ba dalifusöra mado Zimeoni: Mitabu awöma ba dana khöma, ena'ö tasuwö Ndrawa Gana'ana, ba möiga göi awömi dania ba dana khömi! Ba fao khöra mado Zimeoni. 4 Ba möi mado Yuda ba ibe'e ba dangara Yehowa Ndrawa Gana'ana ba Dawa Weresi, tobali la'alani ba Mbeseki, 10,000 [zi mate]. 5 Ba fakhamö ira Gadoni Beseki ba Mbeseki, fasöndra ira, ba la'alani Ndrawa Gana'ana, fabaya Dawa Weresi. 6 Ba moloi Gadoni Beseki, ba lagohi ia. Lara'u ba la'eŵa duturu sebua ba danga ba ba gahe. 7 Ba imane Adoni Beseki: Fitu ngafulu razo si no mu'eŵa tuturu danga ba tuturu kahe sebua, zangozaragö akhökhöla barö meza khögu: Nilaugu andrö, be isulöni khögu Lowalangi! Awena la'ohe ia ba Yeruzalema, ba da'ö mate ia. 8 Ba lasuwö Yeruzalema mado Yuda, ba atu'a ira, lalaŵa bawa zi'öli, ba banua, ba latunu. 9 Aefa da'ö, ba möi misi tou mado Yuda, ba wanuwö Dawa Gana'ana andrö, si so ba hili andrö ba danö tanö raya ba ba zalo'o tanö andrö. 10 Ba lasaŵa Ndrawa Gana'ana andrö ba Heberona mado Yuda. Ba töi Heberona föna, ba Kiriati Garaba. Ba te'ala Zezai ba Ahima ba Talamai, nga'ötö Genaki andrö, labe'e. 11 Ba moroi ba da'ö, ba lasaŵa mbanua Debira; ba töi Debira föna, ba Kiriati Zeferi. 12 Ba ifabu'u Kalebi, imane. Ha niha zolaŵa Kiriati Zeferi andrö, ba satu'a ba da'ö, khönia ube'e nonogu Akhasa. 13 Ba atu'a Gotenieli, ono Genasi andrö, akhi Galebi, ba ibe'e khönia nononia Akhasa [Kalebi]. 14 Ba me la'ohe khönia, ba ifarou, ena'ö i'andrö mbenua khö namania. Ba ahele ia moroi ba hulu galide, ba imane khönia Kalebi: 15 Hana ndra'ugö! Ba imane khönia: Be'e atö khögu mbuala ba wofanö. Noa sa öbe'edo ba danö tanö raya, si no oköliköli, ba be'e atö khögu gumbu nidanö! Ba ibe'e khönia gumbu ba hili ba umbu ba ndraso Kalebi. 16 Ba no möi misi yaŵa nono Ndraono Geni andrö, la'o Mose, no laheta ira ba mbanua khorema andrö, awö mado Yuda, no lasaŵa danö mado Yuda andrö, tanö si mate, ba zanaere, ba Garada, möi ira mowanua, ba da'ö, ba ngai Ndraono Gamaleki. 17 Ba fao ba dalifusöra mado Zimeoni mado Yuda, ba la'alani Ndrawa Gana'ana, banua Zefata, ba lafakiko; andrö wa labe'e töi mbanua andrö Horima. 18 Ba mado Yuda andrö, ba lahalö göi khöra Gasa, fabaya tanöra, ba Asekalo, fabaya tanöra, ba Ekerona, fabaya tanöra. 19 Ba itolo mado Yuda Yehowa, tobali la'okhögö mboto hili andrö. Ba banua ba zalo'o andrö, ba tebai latimba, börö me so khöra gureta si'öli. 20 Ba Heberona andrö, ba latehe khö Galebi, la'o'ö ni'oroi'ö Mose, ba itimba ba da'ö nga'ötö Genaki andrö, si datolu. 21 Ba Iraono Yebusi andrö, banua Yeruzalema, ba tebai latimba mado Yuda. Ba tobali lö tebulö Ndraono Yebusi andrö ba ngai mado Yuda ba Yeruzalema, irege ma'ökhö andre.

II. Atu'a ba Mbetieli mado Mbeniyami

22 Ba iraono Yosefo andrö, ba möi göi misi yaŵa ba Mbetieli, ba itolo ira Yehowa. 23 Ba lafauzei Mbetieli andrö iraono Yosefo; ba töi mbanua andrö föna, ba Lusi. 24 Ba samauze andrö, ba la'ila niha si otarai moroi yomo. Ba lamane ba da'ö: Oroma'ö khöma lalama ba mbanua ba matolo'ö göi. 25 Ba i'oroma'ö khöra zolala ira miyomo ba lalaŵa mbanua andrö bawa zi'öli; ba niha no mege ba si sawōē ya'ira, ba la'orifi. 26 Ba isaŵa danö Ndraono Kheti niha andrö, itaru'ö mbanua ba ibe'e töinia Lusi; ba da'ö döinia irugi ma'ökhö.

III. Banua si lö latimba

27 Ba iraono Manase, ba lö latimba mbanua Mbeti Zeana andrö ba banua si faböbö khöra, ya'ia Da'anakhi ba si faböbö khöra, ba banua Dora ba si faböbö khöra, ba banua Yibelea ba si faböbö khöra, ba banua Megido ba si faböbö khöra. Tobali falukha Ndrawa Gana'ana, lö tebulö ira ba danö da'ö. 28 Ba me abölö Ndraono Gizeraeli, ba labe'e barö mbawara Ndrawa Gana'ana andrö, enonira: fanimba ya'ira, ba tebai. 29 Ba Iraono Geferayi, ba lö latimba Ndrawa Gana'ana banua Geseri, ba tobali lö tebulö Ndrawa Gana'ana ba ngaira, ba Geseri. 30 Ba Iraono Zebuloni, ba lö latimba mbanua Giterono ba banua Nahaloli, ba tobali lö tebulö ba ngaira Ndrawa Gana'ana, ba tobali enonira ba gafuriata. 31 Ba Iraono Gaseri, ba lö latimba mbanua Ako ba banua Zidona, femöi Gahalaba ba Akhisiba ba Heleba ba Afika ba Rehobo. 32 Ba tobali tefasui Dawa Gana'ana Ndraono Gaseri, Dawa Gana'ana sokhö tanö, me tebai latimba. 33 Ba Iraono Nafetali, ba lö latimba mbanua Mbeti Zemesi ba banua Mbeti Anata. Ba tobali tefasui ira Dawa Gana'ana sokhö tanö; ba banua Mbeti Zemesi ba banua Mbeti Anata, ba enonira dania. 34 Ba Iraono Gamori zondregeni ba hili mado Dano, lö latehe möi mitou ira ba zalo'o. 35 Tobali falukha Ndraono Gamori andrö lö tebulö ira ba Hari Heresi ba ba Nayalono ba ba Za'alibi. Ba me abölö dania ma'uwu Yosefo, moroi khöra, ba tobali enonira ira. 36 Ba tanö Ndraono Gedomo, ba i'otarai lala dongo andrö, ba irugi Zela ba miyaŵa na.

Famotokhi ba gahe

Fabaliŵa lala

Olayama Sanguhuku: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö