Wikimedia Incubator

Wb/nia/Roma/8

< Wb | nia | Roma
Wb > nia > Roma > 8

Bua-bua niha Keriso ba lala Geheha

edit

I. 1 Ba lö'ö sa'ae fanibo zi so ba khö Keriso Yesu.[1] 2 Noa sa i'efa'ö ndra'ugö ba goroisa horö ba ba goroisa ba wa'amate andrö oroisa Geheha sangorifi andrö, ba khö Keriso Yesu.[2] 3 Si tebai goroisa andrö sa, me no lö abölö ia ibe'e ösi niha andrö, da'ö nilau Lowalangi, wamatenge Ononia, famaedo nösi niha andrö, si no so barö mbawa horö, börö horö andrö, ba no i'etu'ö huku horö andrö, ba nösi niha,[3] 4 ena'ö itörö niŵa'ö ba goroisa andrö, ba khöda, si lö manörö lala nösi niha, sanörö lala Geheha.[4] 5 Si so ba lala nösi niha sa, ba hadia ia ba nösi niha lagohi tödöra, ba si so ba lala Geheha, ba hadia ia ba Geheha lagohi.[5] 6 Era-era nösi niha sa, ba no fa'amate, ba era-era Geheha, ba no fa'auri ba fa'ohahau dödö.[6] 7 Me no fa'udusa khö Lowalangi gera-era nösi niha; lö'ö sa i'o'ö goroisa Lowalangi, me tebai göi.[7] 8 Tebai omasi Lowalangi zi so ba lala nösi niha. 9 Ba ya'ami, ba tenga si so ba lala nösi niha, si so ba lala Geheha ami, na so atö ba dödömi Geheha Lowalangi. Ba na so zi lö Eheha Keriso, ba tenga khö Keriso da'ö.[8] 10 Ba na so Keriso ba dödömi, ba boto zi mate sa mboto, börö horö andrö, ba tödö si bohou andrö, ba sauri, börö wa'atulö dödö andrö.[9] 11 Ba na so ba dödömi Geheha zanusugi Yesu moroi ba ngai zi mate, ba i'orifi dania göi mbotomi, si mate andrö, Ehehania andrö, si no so ba dödömi si no manusugi Keriso Yesu moroi ba ngai zi mate.[10]

Ono Lowalangi ira

edit

II. 12 Ba tobali so'ömö ita, ya'ami ira talifusö, tenga so'ömö ba nösi niha, fa tatörö lala nösi niha.[11] 13 Na mitörö lala nösi niha sa, ba si mate ami dania. Ba na mibunu mbua-bua mboto andrö Eheha, ba sauri ami.[12] 14 Ha niha sa ira fefu nifarou Geheha Lowalangi, da'ö nono Lowalangi.[13] 15 Tenga sa Eheha zawuyu nitemami, ena'ö ata'u zui ami; Eheha ndraono nitemami; moroi khönia wa mu'ao ita: He Aba, Ama![14] 16 Ya'ia, Eheha andrö göi, zamaduhu'ö tödöda, wa ono Lowalangi ita. 17 Ba na ono ita, ba sanema ondröita göi, sanema ondröita khö Lowalangi, awö Keriso, na nifakao göi ita awönia, ena'ö tefolakhömi göi ita awönia.[15] 18 Tödögu sa, ba lö oroma wamakao ba götö da'e, ba ngai lakhömi andrö, nifa'ele'ö dania ba khöda andre.[16]

Tötönaföra

edit

III. 19 Ibalo-baloi sa nifazökhi Lowalangi andrö, idöna-döna wama'ele'ö Ono Lowalangi andrö.[17] 20 Noa sa mube'e barö mbawa zi lö boto andrö nifazökhi Lowalangi andrö, lö aoha gölö; no moroi ba zame'e ya'ia, ba wanötöna,[18] 21 me ya'ia göi, nifazökhi Lowalangi andrö, ni'efa'ö ba wangosawuyu wa'atekiko andrö, ba wolohe ya'ia ba wa'aefa nono Lowalangi andrö, si so lakhömi.[19] 22 Noa sa ta'ila, mangarö-ngarö fefu nifazökhi Lowalangi, awöda, afökhö khönia, irugi da'e. 23 Ba tenga ha da'ö, ya'ita göi, si no so famobörö Geheha andrö, mangarö-ngarö ita tödöda, wanötöna fa ono ita, fangefa'ö botoda andrö.[20] 24 Noa sa te'orifi ita, ba wanötöna da'ö. Ba tötönafö ni'ila höröda, ba tenga tötönafö; hana wa idöna-döna na sa niha zi no i'ila hörönia?[21] 25Ba na tadöna-döna zi lö i'ila höröda, ba tabalo-baloi, tataha dödöda.[22] 26 Ba si manö göi Geheha, itolo ita, me no ambö wa'abölöda. Hadia ni'andröda ena'ö, he wisa zi sökhi, ba lö'ö sa ta'ila; ba ya'ia, Eheha andrö, i'iagö salahida, ba wangarö-ngarö si lö alua baeha. 27 Ba sanekhegö tödö andrö, ba i'ila hadia niŵa'ö Geheha, me no i'o'ö zomasi Lowalangi we'amöi salahi niha ni'amoni'ö.[23] 28 Ba no ta'ila, ba zangomasi'ö Lowalangi, ba oi ba zi sökhi manö lua-lua hadia ia, fefu, ba khöra si no mukaoni, nihonogöi ba da'ö.[24] 29 Si no i'ila föna sa, da'ö göi nihonogöinia, ena'ö famaedo Nononia ira dania, ena'ö si a'a ia, ba no ato dalifusö.[25] 30 Ba ha niha zi no ihonogöi, da'ö göi nikaoninia, ba ha niha nikaoninia, da'ö göi zatulö, iŵa'ö, ba ha niha zatulö, iŵa'ö, da'ö göi nifolakhöminia.[26] 31 Ba hadia niŵa'öda ba da'ö? Na i'o'awögö ita Lowalangi, ba ha niha zi fa'udu khöda?[27] 32 Ya'ia, si lö alimagö Ononia, si no mame'e da'ö salahida fefu, hadia lö ifabaya manö ba da'ö wame'e buala khöda da'ö fefu?[28] 33 Ha niha zangadugö nitutuyu Lowalangi? No Lowalangi zanguma'ö satulö ira.[29] 34 Ha niha zangetu'ö huku? No so Keriso Yesu, si no mate, ba mendrua manö, me no ifuli auri, si so ba gambölö Lowalangi, ba si lului manguma'ö, salahida.[30] 35 Ha niha zamabali ya'ita ba wa'omasi Keriso ita? Hadia, famakao! ba ma fa'afökhö, ba ma folohi, ba ma fa'olofo, ba ma fa'o'afu, ba ma ameta'uö, ba ma famunu? 36 Si mane si so ba zura: "Börö ndra'ugö, wa nibunu ndra'aga ma'ö-ma'ökhö, hulö mbiri-biri nitaba ndra'aga, ba dödö niha bö'ö."[31] 37 Ba ba da'ö fefu, ba möna sibai ita, ibe'e si no mangomasi'ö ya'ita.[32] 38 Noa sa faduhu dödögu, he fa'amate, ba he fa'auri, he mala'ika, ba he samatörö, he si so iada'e, ba he si so dania, he sabölö,[33] 39 ba he fa'alaŵa ba he fa'abakha, ba he hadia ia mbö'önia nifazökhi Lowalangi, ba lö i'ila ifabali ita ba wa'omasi Lowalangi andrö ita, ba khö Keriso Yesu, So'aya ya'ita.[34]

Famotokhi ba gahe

edit
  1. ↑ Faigi 10:4; Yoh 5:24; Gal 5:16,25
  2. ↑ Yoh 8:36; KorII 3:17
  3. ↑ Heb 7:18,19; 2:14; Gal 3:21; 4:4; Fil 2:7; KorII 5:21
  4. ↑ Faigi 8:1
  5. ↑ KorI 2:14
  6. ↑ Faigi 6:21,22; Gal 6:8
  7. ↑ Yak 4:4
  8. ↑ KorI 3:16; Efes 3:17; Yoh 14:23
  9. ↑ Faigi 5:12; 7:24; Kol 2:12,13
  10. ↑ Faigi 6:4; KorII 4:14
  11. ↑ Faigi 6:18
  12. ↑ Faigi 8:6
  13. ↑ Gal 5:18
  14. ↑ Gal 4:1–6; TimI 1:7
  15. ↑ Gal 4:7; Fam 21:7; TimII 2:11,12; Yoh 17:22
  16. ↑ KorII 4:17
  17. ↑ Kol 3:4
  18. ↑ Fangomb 1:2 b.t.; MozI 3:17
  19. ↑ FetII 3:13
  20. ↑ KorII 5:2; Luk 21:28
  21. ↑ KorII 5:7; Heb 11:1
  22. ↑ KorII 4:18; Heb 10:36
  23. ↑ KorI 2:10
  24. ↑ Efes 1:11
  25. ↑ Faigi 11:2; Fil 3:21; Kol 1:15
  26. ↑ TesII 2:13,14; TimII 1:2
  27. ↑ Sin 118:6
  28. ↑ Yoh 3:16; KorI 3:22
  29. ↑ Yes 50:1,9; Fam 12:10,11
  30. ↑ Faigi 4:25; Heb 7:25
  31. ↑ Sin 44:23
  32. ↑ YohI 5:4 b.t.; Fam 12:11
  33. ↑ Mat 10:28
  34. ↑ Yoh 10:28

Fabaliŵa lala

edit

Olayama Zura Roma: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Roma/8&oldid=6229770"