Wikimedia Incubator

Wb/nia/Roma/7

< Wb | nia | Roma
Wb > nia > Roma > 7

Khö Keriso niha Keriso, tenga sa'ae barö mbawa goroisa so ira

edit

I. 1 Ma lö mi'ila, ya'ami, ira talifusö, — ba zi no aboto ba dödö oroisa muhehedo — wa no barö mbawa goroisa andrö so niha, irugi mate ia.[1] 2 Ira alawe si no muhalö, ba noa sa tefaböbö ba ndra matua, ba goroisa andrö, götö wa'anau noso ndra matua; ba na mate ndra matua, ba lö'ö sa'ae oroisa, famaböbö ya'ia khönia.[2] 3 Tobali labe'e töinia sohorö, na orudu ia ba ndra matua bö'ö, fatua auri ndra matuania. Ba na mate ndra matua, ba aefa ia ba goroisa, fa tenga sa'ae sohorö ia, na möi ia donga ndra matua bö'ö.[3] 4 Andrö ya'ami göi, ya'ami ira talifusögu, si no mubunu ami, ba goroisa, ba mboto Keriso andrö, ena'ö tanö bö'ö zokhö ya'ami, ya'ia andrö, si no mususugi moroi ba ngai zi mate, ena'ö so mbua-buada khö Lowalangi.[4] 5 Me no ba nösi so ita, ba no abölö wangisö horö andrö, nifasugi goroisa andrö, ba ndroto-ndrotoda, ena'ö so mbua-buania ba wa'amate.[5] 6 Ba iya'e, ba no aefa ita ba goroisa, me no mate ita ba zanaha ya'ita föna, tobali enoni ita ba lala si bohou andrö, khö Geheha, ba tenga ba lala föna, si so ba zura.[6]

Oroisa andrö, he ŵa'ae si sökhi ia, ba tobali börö horö

edit

II. 7 Ba hadia niŵa'öda? Hadia, horö goroisa andrö? Tenga si manö. Ba lö'ö sa aboto ba dödögu horö andrö mena'ö, na tenga moroi ba goroisa. Lö'ö sa göi u'ila mena'ö, hadia wangisö andrö, na lö muŵa'ö ba goroisa andrö: Böi mangisö.[7] 8 Ba no i'oguna'ö nifakhoi andrö horö andrö, ba no ifasugi ba dödögu fefu ngawalö wangisö; na lö oroisa sa, ba no si mate horö,[8] 9 ba ya'o, ba sauri lö oroisa, föna. Ba me so nifakhoi andrö, ba auri horö, ba ya'o, ba mate, 10 ba no tobali famunugu goroisa andrö, nibe'e fangorifi.[9] 11 Noa sa i'oguna'ö nifakhoi andrö horö andrö, no ibe'e famaelungu ya'o, ba famunu ya'o. 12 Tobali ni'amoni'ö goroisa andrö, ba nifakhoi andrö, ba ni'amoni'ö ba satulö ba si sökhi.[10]

Fa'abölö horö andrö, ba nösi niha andrö

edit

III. 13 Ba hadia no tobali famunugu zi sökhi andrö? Tenga si manö. Horö andrö a'ine; ba ena'ö oroma, wa horö ia, na ibe'e famunugu zi sökhi andrö, ena'ö a'oi so wa horö ia, moroi ba nifakhoi andrö.[11] 14 Ta'ila sa, wa no moroi ba Geheha goroisa andrö, ba ösi niha ndra'odo, ni'amawa ba horö andrö.[12] 15 Hadia nilaugu sa, ba no si lö aboto ba dödögu. Tenga sa somasi ndra'o nilaugu, si fa'udu ndra'o, da'ö ulau.[13] 16 Ba na ulau zi lö omasido ba no utehe goroisa andrö, wa no si sökhi. 17 Ba tenga sa'ae ya'o zolau ya'ia, horö andrö a'ine, si no so ba nösigu, zolau. 18 Noa sa u'ila, wa lö si sökhi ba khögu, ba nösigu andrö. So sa khögu wa'edöna, ba famalua si sökhi andrö, ba lö'ö.[14] 19 Tenga si sökhi, somasi ndra'o, ulau, si lö sökhi, si lö edöna ndra'o, da'ö nilaugu. 20 Ba na ulau zi lö omasido, ba tenga sa'ae ya'o zolau ya'ia, horö andrö a'ine, si so ba nösigu, zolau. 21 Ba tobali oroma khögu, na to'ua ya'o, ba omasido ulau zi sökhi ba no ahatö zi lö sökhi.[15] 22 Omasido sa goroisa Lowalangi, na balazi dödögu bakha,[16] 23 ba u'ila goroisa bö'ö ba ndroto-ndrotogu, si fasöndra ba goroisa andrö, si so ba dödögu, ba samöbö ya'o, sawuyu goroisa horö andrö, si so ba ndroto-ndrotogu[17] 24 Alai ndra'o, niha nifakao! Ha niha zangefa'ö ya'o ba mboto ba wa'amate andrö?[18] 25 Nisuno Lowalangi, börö Yesu Keriso, So'aya ya'ita. Tobali solo'ö oroisa Lowalangi ndra'o tödögu, ba solo'ö oroisa horö andrö ösigu.[19]

Famotokhi ba gahe

edit
  1. ↑ Faigi 2:17 b.t.
  2. ↑ KorI 7:39
  3. ↑ Mat 5:32
  4. ↑ Faigi 6:5,7; KorII 11:2; Gal 2:19
  5. ↑ Faigi 6:21
  6. ↑ Faigi 6:4
  7. ↑ Faigi 3:20; MozII 20:17
  8. ↑ Faigi 5:13; Yoh 15:22
  9. ↑ MozV 5:32,33; Gal 3:12
  10. ↑ TimI 1:8
  11. ↑ Faigi 6:23; KorI 15:56
  12. ↑ Faigi 8:3; Mat 5:22,28
  13. ↑ Gal 5:17
  14. ↑ MozI 8:21; Fil 2:13
  15. ↑ Heb 12:1
  16. ↑ Faigi 2:14,15
  17. ↑ Faigi 7:15
  18. ↑ Faigi 8:10 b.t.
  19. ↑ Faigi 8:2,37; KorI 15:57

Fabaliŵa lala

edit

Olayama Zura Roma: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Roma/7&oldid=6229769"