Wikimedia Incubator

Wb/nia/Roma/11

< Wb | nia | Roma
Wb > nia > Roma > 11

Tenga nitibo'ö sibai niha Yehuda andrö

edit

I. 1 Ba da'ö niŵa'ögu: Hadia, no itibo'ö mbanuania Lowalangi? Tenga si manö! Ya'odo sa göi, ba Iraono Gizeraeli, ma'uwu Gaberahamo, mado Mbeniyami.[1] 2 Lö nitibo'ö Lowalangi banuania, si no i'ila föna. Ma lö nirongomi, hadia niŵa'ö ba zura, ba khö Geliya andrö? Me humede ia khö Lowalangi, ba khö Ndraono Gizeraeli andrö, me imane:[2] 3 "He So'aya, no labunu zama'ele'ö andrö khöu, no ladudugö naha wame'e sumange khöu, ba hatö ya'o zi tosai, ba la'alui wamunu ya'o."[3] 4 Ba hadia niŵa'ö Lowalangi, wanema linia? Imane: "No usaigö khögu, 7000 niha, si lö irai manuhi tanö föna Mba'ali andrö."[4] 5 Ba si manö göi ba götö da'e: so zi tosai, dali wanutuyu andrö, ba wa'ebua dödö andrö.[5] 6 Ba na moroi ba wa'ebua dödö, ba tenga sa'ae moroi ba mbua-bua; na si manö ena'ö, ba tenga sa'ae fa'ebua dödö wa'ebua dödö andrö.[6] 7 Ba he wisa? ni'alui Ndraono Gizeraeli andrö, ba lö nisöndrara; ba no lasöndra nitutuyu andrö; ba si tosai, ba ni'abe'e'ö tödö.[7] 8 Si mane si so ba zura: "No ibe'e khöra Lowalangi geheha wanukö-nuköu, no ibe'e khöra hörö ba wa lö mangila ba tögi dalinga ba wa lö mamondrongo, irugi ma'ökhö andre."[8] 9 Ba imane Dawido: "Yatobali tandraŵa khöra naha wemanga andrö khöra ba fondra'u ba fa'ate'ala ba sulö.[9] 10 Nifobalunö höröra, ena'ö lö la'ila; ba hulura, ba faöndrö, böi mamalö-malö." 11 Ba da'ö niŵa'ögu: Hadia, andrö manendre ira, ena'ö alau? Tenga si manö. Lalöra mbörö wö sa, wa irugi niha baero fangorifi andrö, ena'ö tefarou dödöra.[10] 12 Ba na möi hare niha guli danö lalöra, ba na hare niha baero de'alara, ba tenga mendrua manö na ahori molo'ö ira?[11] 13 Ba da'ö ligu khömi, ya'ami niha baero: Ndrohu-ndrohu zi no sinenge ba niha baero ndra'o, ba usuno halöŵö andrö, niŵa'ö khögu,[12] 14 ma atö u'ila ufarou dödö dalifusögu andrö, ma atö u'ila u'orifi ösa ira. 15 Na tobali fangatulö'ö niha guli danö wanibo ya'ira andrö, ba hadia wanema ya'ira, na tenga fa'auri moroi ba zi mate?[13] 16 Ba na ni'amoni'ö wamobörö andrö, ba ni'amoni'ö göi zoya, ba na ni'amoni'ö ŵa'a, ba ni'amoni'ö göi ndraha.

Böi fayaŵa niha Keriso soroi ba niha baero khö niha Yehuda

edit

II. 17 Ba na no mufafatö ndraha ösa, ba na no mufatöfa ndra'ugö, awöra, ya'ugö andrö, si no falo ndru'u, ba na no mo'urakha ndra'ugö ba ŵa'a falo andrö ba ba wa'amofanikhania,[14] 18 ba böi suno ndra'ugö, ba ndraha andrö. Ba na ösuno ndra'ugö, ba tenga sa atö ya'ugö zanaya ŵa'a andrö, ŵa'a andrö zanaya ya'ugö. 19 Ba ömane: No mufafatö ndraha andrö, ena'ö tefatöfa ndra'odo. Duhu! 20 Me lö mamati ira, andrö tefafatö ira, ba ya'ugö, ba moroi ba wamati, wa monaha ndra'ugö. Böi fayaŵa dödöu, sata'u ndra'ugö.[15] 21 Na noa sa itibo'ö Lowalangi zi no to'ua daha; ba itibo'ö göi ndra'ugö.[16] 22 Andrö töngöni wa'ebua dödö Lowalangi andrö ba fa'abe'enia göi; ba zi no molalö faigi wa'abe'enia, ba fa'ebua dödö Lowalangi, ba ba khömö andrö, na lö tebulö ndra'ugö ba wa'ebua dödö andrö ba na tenga si manö, ba ni'eŵa göi ndra'ugö dania.[17] 23 Ba ya'ira göi, na tenga si lö mamalö-malö khöra wa lö mamati andrö, ba nifatöfa ira dania; lö'ö sa ambö wa'abölö Lowalangi; i'ila ifuli ifatöfa ira.[18] 24 Na ni'eŵa sa ndra'ugö ba zi to'ua falo ndru'u ba na nifatöfa ba falo si sökhi, si tenga lala mena'ö, ba tenga mendru'a manö ira, si no to'ua ya'ia, nifatöfa ba falo khöra andrö.

Molo'ö zui na dania niha Yehuda

edit

III. 25 Tebai sa ubini'ö khömi, ya'ami ira talifusö, zi no tobini andrö, fa böi miŵa'ö tödömi satua-tua ami: wa no göna fangabe'e dödö Ndraono Gizeraeli ösa, irugi no molo'ö gahonoa niha baero andrö,[19] 26 ba awena dania te'orifi Ndraono Gizeraeli ma'afefu, si mane si so ba zura: "Moroi ba Ziona i'otarai dania sangorifi andrö, iheta dania ba ndraono Yakobo wa lö ba dödöra Lowalangi;[20] 27 ba da'ö wawu'usa li andrö khögu khöra, na uheta horöra andrö".[21] 28 Tobali si fa'udu ira na dali lala duria somuso dödö andrö, börö ami; ba na dali wanutuyu ya'ira andrö, ba ni'omasi'ö ira, börö ndra tua.[22] 29 Lö'ö sa mangesa dödö Lowalangi ba game'elania ba ba wogaoninia andrö[23] 30 Hulö si mane ya'ami sa, si lö molo'ö li Lowalangi föna, ba si no falukha wa'ahakhö dödö iada'e, börö wa lö molo'ö ira;[24] 31 si manö göi ira, lö la'o'ö iada'e, ena'ö falukha ira göi wa'ahakhö dödö, moroi ba wa'ahakhö dödö andrö, si no falukha ami. 32 Noa sa ifa'u'u manö ira fefu Lowalangi, ba wa lö molo'ö, ena'ö ihakhösi tödö ira fefu.[25]

Fa'ahöli-höli dödö ba wa'atua-tua Lowalangi

edit

IV. 33 Ha lö abakha wa no a'oi so manö khö Lowalangi ba fa'atua-tuania ba fangilania andrö! Si lö aboto ba dötö niha wanguhukunia, ba si lö isöndra niha lala andrö khönia![26] 34 Ha niha sa zi no aboto ba dödö dödö Zo'aya andrö? ba ha niha zi no mamolala tödönia?[27] 35 Ma ha niha zi no mangöhönagö fame'e khönia hadia ia, nisulöni khönia dania?[28] 36 Moroi khönia sa fefu hadia ia ba ya'ia zamatörö ba ba khönia lua-lua hadia ia fefu. Ya'ia nifosumange, irugi zi lö aetu! Yaduhu.[29]

Famotokhi ba gahe

edit
  1. ↑ Yer 31:37; Fil 3:5
  2. ↑ Faigi 8:29 b.t.; Sin 94:14
  3. ↑ RazI 19:10,14
  4. ↑ RazI 19:18
  5. ↑ Faigi 9:27
  6. ↑ Faigi 4:4; Gal 2:16
  7. ↑ Faigi 9:16,31; KorII 3:14
  8. ↑ Yes 29:10; 6:9,10; HalZin 28:26 b.t.
  9. ↑ Sin 69:23,24
  10. ↑ HalZin 13:46; Faigi 10:19
  11. ↑ Yer 4:1,2
  12. ↑ Faigi 1:5
  13. ↑ Hes 37
  14. ↑ Yer 11:16 b.t.; Efes 2:11 b.t.
  15. ↑ Heb 3:19; 4:2; KorI 10:12
  16. ↑ FetII 2:4,5
  17. ↑ Yoh 15:2,6
  18. ↑ Faigi 14:4
  19. ↑ Luk 21:24; Yoh 10:9,16
  20. ↑ MozV 4:30,31; Yes 59:20,21
  21. ↑ Yer 31:31–34
  22. ↑ TesI 2:15 b.t.; Faigi 15:8
  23. ↑ MozIV 23:19
  24. ↑ Tit 3:3 b.t.
  25. ↑ Gal 3:22; Sin 145:9
  26. ↑ Yob 11:6,7
  27. ↑ Yes 40:13,14; KorI 2:16
  28. ↑ Yob 41:2
  29. ↑ KorI 8:6; Rom 16:27; FetII 3:11

Fabaliŵa lala

edit

Olayama Zura Roma: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Roma/11&oldid=6229773"