Wb/nia/Roma/1

< Wb‎ | nia‎ | Roma
Wb > nia > Roma > 1

Fangowai

edit

I. 1 Faulo zanura da'e, enoni Keriso Yesu, nikaoni sinenge, nituyu, ba wangombakha turia somuso dödö andrö khö Lowalangi,[1] 2 nifafabu'u'önia föna ba zama'ele'ö andrö khönia, ba zura ni'amoni'ö,[2] 3 turia Nononia andrö. Ma'uwu Dawido ba nga'ötö niha,[3] 4 nifataro Ono Lowalangi, nibe'e fa'abölö, dali Geheha ni'amoni'ö, moroi ba wemaoso moroi ba ngai zi mate: Yesu Keriso, So'aya ya'ita.[4] 5 Khönia no tatema wa'ebua dödö, awö halöŵö zinenge, ba wanga'asogö folo'ö famati andrö, ba niha fefu, ba wangebua töinia andrö.[5] 6 Ba zi te'u'u göi ami, nikaoni Yesu Keriso;[6] 7 ba ni'omasi'ö Lowalangi andrö fefu, nikaoni andrö, ni'amoni'ö, si so ba Roma. Yafalukha ami wa'ebua dödö ba fa'ohahau dödö khö Namada Lowalangi ba khö Zo'aya ya'ita, Yesu Keriso![7]

Humulu dödö Waulo ba we'amöi khöra

edit

II. 8 Si föföna, ba usuno Lowalangigu andrö, dali Yesu Keriso, ba khömi fefu, me no teturiagö wamatimi andrö ba guli danö ma'asagörö.[8] 9 Irongo sa ligu Lowalangi, si möido enoni tödögu, ba wangombakha turia somuso dödö andrö khö Nononia andrö, wa lö tebulö itörö, tödögu ami.[9] 10 Lö aetu u'andrö, na mangandrö ndra'o, ma atö salöfögu samuza, ma aoha gölö Lowalangi, möi ndra'o khömi.[10] 11 Humulu sa dödögu wamaigi ya'ami, ena'ö ufa'ema khömi ma'ifu, ame'ela Geheha, ba wangabe'e ya'ami,[11] 12 ya'ia na terara dödögu göi awömi, ba khömi andrö, börö wa no faoma samati ita, he ya'ami, ba he ya'o.[12] 13 Ba tebai ubini'ö khömi, ya'ami ira talifusö, wa no asese uŵa'ö tödögu, möido khömi — ba no tetabi ndra'o irugi da'e — ena'ö usöndra ba khömi göi mbua ma'ifu, si mane ba niha bö'ö göi.[13] 14 So'ömö ndra'odo, he ba Ndrawa Heleni, ba he ba zi tenga Dawa Heleni, he ba zatua-tua, ba he ba zi lö atua-tua.[14] 15 Andrö si manö wa'edöna dödögu, na balazi ndra'o, wangombakha turia somuso dödö andrö, ba khömi göi, ba Roma.[15]

Fa'abölö duria somuso dödö andrö

edit

III. 16 Lö'ö sa ailado ba duria somuso dödö andrö; noa sa fa'abölö Lowalangi ia, ba wangorifi samati andrö fefu, ba niha Yehuda ua ba ba Ndrawa Heleni göi.[16] 17 Tefa'ele'ö sa ba khönia wa'atulö dödö khö Lowalangi, moroi ba wamati ba ba wamati zui lua-lua, si mane si so ba zura: "Ba wamati isöndra wa'auri satulö tödö."[17]

Horö niha baero

edit

IV. 18 Tefa'ele'ö sa moroi ba zorugo wönu Lowalangi ba golalöŵa andrö ba ba zi lö atulö andrö fefu, ba niha, sanaisi si duhu ba wa lö atulö andrö,[18] 19 me no oroma ba khöra zi tola ta'ila khö Lowalangi; noa sa ifa'ele'ö khöra Lowalangi.[19] 20 La'ila sa tödöra, ba nifazökhinia, zi lö oroma andrö, amuatania, i'otarai wamazökhi danö'a, fa'abölönia andrö, si lö aetu ba fa'alowalanginia fa lö famu'a khöra.[20] 21 Me no aboto ba dödöra Lowalangi ba me lö ni'olowalangira ya'ia, wanuno ya'ia, ba me lö ni'andröra saoha gölö khönia me no arörö dödöra ba waya ba me no tobali ogömi-gömi dödöra, sambö era-era andrö.[21] 22 Me no satua-tua ira, laŵa'ö, ba no tobali, sambö tödö ira.[22] 23 Ba no lafalalini, no laböhöli lakhömi Lowalangi, andrö, si lö tebulö, ba no labe'e salahinia khala-khala wamaedo niha si mate-mate ba khala-khala wamaedo wofo ba khala-khala wamaedo zaliŵa-liŵa ba danö si öfa ahe, awö zanana andrö.[23] 24 Andrö no iböhöli ira Lowalangi, fa la'o'ö wangisö dödöra andrö, si ta'unö andrö, ena'ö te'o'aya nösira andrö.[24] 25 ya'ira andrö, si no mamalalini si duhu andrö khö Lowalangi, ba waya, si no mamosumange nifazökhi andrö, si no mangaröfi li ya'ia, moroi ba wamosumangera samazökhi, moroi ba we'angaröfi li da'ö, nisuno irugi zi lö aetu. Yaduhu. 26 Andrö no iböhöli ira Lowalangi, fa la'o'ö wangisö si lö sökhi: he ira alawe khöra, no laböhöli lala, ba no lasalahini si tenga lala.[25] 27 Ba si manö göi ndra matua, no laböhöli lala wa'orudu ba ndra alawe, ba no tesao wa faoma la'isö nawöra, tobali no lahoröni ndra matua ira matua, ba no latema zi nangea luora ba wa'elungura andrö, ba nösira.[26] 28 Ba me no lö ba dödöra wa'aboto ba dödöra Lowalangi, ba no ilulu ira Lowalangi, ena'ö la'o'ö gera-era si lö göna ba wolau si lö tola; 29 no a'oi so zi lö atulö fefu, awö walösökhi, awö wa'afaito, awö wa'omasi gana'a, no fahöna wa'afökhö dödö, awö wange'e, awö wagua-guasa, awö wa'onekhe, awö walimosa,[27] 30 samato-matou awöra ira ba sanandraŵaisi ba si lö omasi Lowalangi ba sangosiwawöi awöra ba si fayaŵa ba samahokha ba samakhai si lö sökhi ba si lö molo'ö li zatua,[28] 31 ba sambö era-era ba si faröi ba sabe'e tödö ba si lö ahakhö tödö. 32 La'ila sa huku Lowalangi andrö, wa no huku famunu huku zolau si manö, ba tenga ha fa lalau da'ö, omasi na göi ira, na so zolau si manö, niha bö'ö.

Famotokhi ba gahe

edit
  1. Gal 1:10,15 b.t.; HalZin 9:15
  2. Tit 1:2,3; Luk 24:44
  3. HalZin 2:30; 13:23
  4. HalZin 13:33,34; Yoh 10:36; FetI 3:18
  5. Faigi 15:15–19; Efes 3:8 b.t.
  6. Faigi 9:24
  7. KorI 1:2,3
  8. Faigi 16:19; KorI 1:4 b.t.; TesI 1:2,8
  9. Fil 1:8
  10. Faigi 15:23,32; HalZin 19:21
  11. TesI 3:10
  12. Amaed 11:25
  13. Faigi 15:22
  14. KorI 1:22–24
  15. HalZin 28:31
  16. TimII 1:8–12; Sin 119:46; KorI 1:18; HalZin 13:46
  17. Faigi 3:21 b.t.; Hab 2:4
  18. Faigi 2:5–8; Heb 10:26 b.t.
  19. HalZin 14:17; 17:25 b.t.
  20. Sin 8:2 b.t.; 19:2 b.t.; Yes 40:26
  21. Efes 4:17; Sin 50:23
  22. Yer 10:14; KorI 1:19 b.t.
  23. MozV 4:16 b.t.; Sin 106:20
  24. HalZin 14:16; Sin 81:13; TesI 4:4,5
  25. MozIII 18:22 b.t.
  26. KorI 6:9
  27. Efes 5:3 b.t.; Gal 5:19 b.t.
  28. TimII 3:2 b.t.

Fabaliŵa lala

edit

Olayama Zura Roma: 12345678910111213141516

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö