Wp/mag/बङ्गलाभाषा
बाङ्ला (বাংলা) वा बङ्गला, या फिर बाहरी नाम बङ्गाली से जानल जायेवाला, एगो हिन्द-आर्यभाषा हे जे दक्खिन एसियाके बङ्गाल क्षेत्रके मूलभाषा हे । ई बङ्गलादेसके अधिकारिक, राष्ट्रिय आउ सबसे ब्यापकरूप से बोले जायेवाला भाषा हे आउ भारतके २२ अनुसूचितभाषामे दूसरा सबसे अधिक बोले जायेवाला भाषा हे । लगभग ३० करोड़ देसी बक्ता आउ दूसरा भाषा बोलेवालाके रूपमे अन्य ३.७ करोड़के साथे बाङ्ला पचमा सबसे अधिक बोले जायेवाला मूलभाषा हे आउ बिश्वमे बोले वालाके कुल सङ्ख्याके अनुसार सतमा सबसे अधिक बोले जायेबाला भाषा हे । बङ्गला पचमा सबसे अधिक बोले जायेवाला हिन्द-यूरोपीयभाषा हे ।
बङ्गला बङ्गलादेसके अधिकारिक आउ राष्ट्रियभाषा हे, जेकरामे ९८% बङ्गलादेसी अपन पहिलाभाषाके रूपमे बङ्गलाके प्रयोग करहथिन । भारतके भीतरे बाङ्ला पच्छिमबङ्गाल, त्रिपुरा आउ असमराज्यके बराक घाटी क्षेत्रके अधिकारिकभाषा हे । ई सितम्बर २०११ से भारतीयराज्ज झारखण्डके दूसरा अधिकारिकभासो हे । ई बङ्गालके खाड़ीमे अण्डमान आउ निकोबार दीप समूहमे सबसे ब्यापकरूप से बोले जायेवाला भाषा हे, आउ बिहार, अरुणाचलप्रदेस, दिल्ली, छत्तीसगढ़, मेघालय, मिजोरम्, नागालैण्ड, ओड़िसा आउ उत्तराखण्ड सहित अन्य राज्जमे महत्वपूर्ण जनसङ्ख्याद्वारा बोलल जाहे ।
बङ्गला १,३०० से अधिक बरस खन्नि बिकसित होलहे । बङ्गला साहित्य अपन सहस्राब्दी पुराना साहित्यिक इतिहासके साथे बङ्गला पुनर्जागरण खन्नि बड़ पैमाना पर बिकसित होलै आउ एसियामे सबसे अधिक बिपुल आउ बिविध साहित्यिक परम्परामे से एगो हे । १९४८ से १९५६ तक बाङ्लाभाषा आन्दोलन बङ्गलाके पाकिस्थानके अधिकारिकभाषा बनावेके माङ्ग करकै, पूरुबी बङ्गालमे बङ्गाली राष्ट्रवादके बढ़ावा देलकै, जेकरासे १९७१ मे बाङ्ग्लादेसके उदय होलै । १९९९ मे यूनेस्को भाषा आन्दोलनके मान्यता मे २१ फरबरीके अन्तर्राष्ट्रिय मातृभाषा दिबसके रूपमे मान्यता देलकै ।