Wb/nia/Yosua/4

I. Tohu-tohu wangötö Yoridano

1 Ba me no alua la'ötö Yoridano sato, ba imane Yehowa khö Yosua: 2 Mitutuyu niha ba zato, felendrua, samösa zambua mado, 3 ba miŵa'ö li khöra, mimane: Mihalö khömi gara, felendrua, ba da'e, ba dalu Yoridano, ba naha andrö, ba zi so gere andrö mege, ba mi'ohe miyefo ba mitou'ö tou ba golombaseŵa, ba zi mörö ami bongi.

4 Ba humede Yosua ba niha andrö si felendrua, nihonogöinia ba Ndraono Gizeraeli, samösa zambua mado, 5 ba imane khöra Yosua: Mi'ae miyefo, mi'owaö-waö föna dawöla gamabu'ula li khö Lowalangimi, Yehowa, ba dalu Yoridano, ba mihare'ö ba galisimi gara, sambua zamösa, ena'ö i'ohia'ö wa'oya mado Ndraono Gizeraeli, ena'ö tobali tandra ba khömi. 6 Na lasofu dania iraonomi, na lamane: Hadia guna gara andre? 7 Ba mimane khöra: Me no aetu nidanö Yoridano föna dawöla gamabu'ula li khö Yehowa; me lafatörö ba Yoridano, ba aetu nidanö Yoridano; ba tandra gara andre, fa böi olifu Ndraono Gizeraeli, irugi zi lö aetu.

8 Ba la'o'ö da'ö Iraono Gizeraeli, si mane niŵa'ö Yosua, lahalö gara, felendrua, ba dalu Yoridano, si mane niŵa'ö Yehowa khö Yosua, i'ohia'ö wa'oya mado Ndraono Gizeraeli; ba la'ohe miyefo ba golombaseŵa ba latou'ö tou ba da'ö.

9 Ba felendrua ifatanö'ö kara Yosua ba dalu Yoridano ba naha andrö, ba zi so gere andrö mege, samabea tawöla gamabu'ula li, ba lö tebulö ba da'ö, irege ma'ökhö andre. 10 Ba la'iagö dödö Yoridano ere andrö, samabea tawöla gamabu'ula li, irege no awai fefu ni'oroi'ö Yehowa, niŵa'ö ba zato, dali goroisa Moze andrö khö Yosua. Ba la'aliogö ira sato, we'amöi miyefo. 11 Ba me no dozi la'ötö sato, ba lafa'ötö göi dawöla gamabu'ula li khö Yehowa ere andrö, la'iagö föna zato.

12 Ba möi miyefo mado Rubeno ba mado Gado ba si matonga mado Manase andrö, nifa'oli föna Ndraono Gizeraeli, si mane niŵa'ö Moze khöra. 13 Mato öfa wulu ngahönö zabölö, sowaö-waö föna Yehowa, ba wanuwö ba ndraso ba Yerikho andrö. 14 Me luo da'ö i'ebua'ö Yosua Yehowa, föna Ndraono Gizeraeli fefu, ba la'ata'ufi ia, si mane fangata'ufira Moze mege, götö wa'anau nosonia.

15 Ba humede Yehowa khö Yosua, imane: 16 Ŵa'ö ba gere andrö, samabea tawöla gamabu'ula li, ndramöi miyaŵa moroi ba Yoridano.

17 Ba ibe'e li Yosua ba gere andrö, imane: Mi'ae miyaŵa moroi ba Yoridano! 18 Ba tobali, me möi miyaŵa gere andrö, samabea tawöla gamabu'ula li khö Yehowa, moroi ba dalu Yoridano, me lahundragö zabe'e tanö ahe gere andrö, ba mangawuli ba nahania nidanö Yoridano, moluaha, si mane menewi ba si mane me dua wongi, ilawui ngöfi fefu.

II. Latanö gowe, tandra

19 Ba möi miyaŵa, ira moroi ba Yoridano ba zi mewulu ba mbaŵa si föföna, ba molombase ba Giligala, ba nola, tanö ba gatumbukha luo i'otarai Yerikho. 20 Ba kara andrö si felendrua, ni'ohera moroi ba Yoridano, ba ifatanö'ö Yosua, ba Giligala.

21 Ba imane ba Ndraono Gizeraeli: Na lasofu dania khö namara iraonomi, na lamane: Hadia guna gara andre? 22 Ba mi'ombakha'ö ba ndraonomi, mimane: Tanö sabe'e lala Ndraono Gizeraeli, me latörö Yoridano andrö, 23 me no i'ogo'öisi nidanö Yoridano Lowalangimi, Yehowa, fönami, irege no mi'ötö, si mane folau Lowalangimi, Yehowa, ba nasi zukhu andrö, ni'ogo'öisinia fönama, irege no ma'ötö, 24 ena'ö aboto ba dödö niha ba guli danö fefu danga Yehowa andrö, he wisa wa'abölönia, ena'ö la'ata'ufi Lowalangira Yehowa, si lö mamalö-malö.

Famotokhi ba gahe

Fabaliŵa lala

Olayama Yosua: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö