I. Famarou Yosua tödö zato. Fango'ou ba wa lö faröi khö Lowalangi
edit1 Ba me no ara, me no ahono Ndraono Gizeraeli ibe'e Yehowa, ba nemalira andrö fefu, fasui, ba me no atua Yosua, me no numalö ndröfi, 2 ba ifalukha'ö Ndraono Gizeraeli fefu Yosua, satuara ba salaŵara ba sanguhuku ba kumandru, ba imane khöra:
Atua ndra'o, no numalö ndröfi. 3 Ba no mi'ila fefu hadia ia nilau Lowalangimi Yehowa ba niha andrö fefu fönami; Lowalangimi andrö, Yehowa, sa'ae zi fasöndra salahimi. 4 Ba hiza, ba no ututuru tana khömi niha andrö, si tosai, tana ba madomi, wolau dahö-dahö; i'otarai Yoridano, fefu soi, nihorigu, irege nasi sebua, tanö ba gaekhula luo. 5 Ba itimba ira fönami Lowalangimi, Yehowa, ifofanö fönami, ena'ö mihalö khömi danö, si mane nifabu'u Lowalangimi, Yehowa.[1] 6 Ba mi'abe'e'ö sibai dödömi, ba wolo'ö ba ba wolau fefu hadia ia zi so ba zura goroisa andrö khö Moze, fa böi mihole'ö ami, he ba gambölö ba he ba gabera.[2] 7 Fa böi mifaruka ami ba niha andrö, si tosai na ba khömi, ba fa böi mitötöi döi Lowalangira, we'amöi ba hölu ba khöra, ba böi mifosumange ba böi mangalulu ami khöra.[3] 8 Lowalangimi andrö, Yehowa, mi'olembai, si mane folaumi irugi ma'ökhö andre.[4] 9 Andrö itimba fönami soi sebua ba sabölö Yehowa; samösa lö niha sabölö moroi khömi, irugi ma'ökhö andre. 10 Ha samösa motöi ya'ami, ba hönö moloi ibe'e, me no Lowalangimi, Yehowa, zi fasöndra salahimi, si mane nifabu'unia khömi.[5] 11 Ba na omasi ami auri, ba mifaigi sibai, fa mi'omasi'ö Lowalangimi, Yehowa.
II. Fanenaŵa fangerogö Lowalangi
edit12 Ba na faröi ami ena'ö, na mifaböbö ami ba zi tosai soi niha andrö ba khömi, na fambambatö ami ba na fahalö, 13 ba böi zi lö aboto ba dödömi: ba lö'ö sa itohugö Lowalangimi Yehowa wanimba soi andrö fönami; tobali fesu ba tandraŵa ira khömi, ba bözi-bözi ba ngaimi ba doi ba hörömi, irege ahori ami ba danö si sökhi andre, nitehe Lowalangimi, Yehowa, khömi.[6]
14 Ba na utörö iada'e lala andrö, nitörö niha fefu dania, ba böi zi lö aboto sibai ba dödömi: sambua lö saekhu ba danö taroma li si sökhi andrö, niŵa'ö Lowalangimi, Yehowa, ba khömi andrö, no ahori itörö khömi, sambua lö saekhu ba danö. 15 Ba si mane amabu'ula li andrö, nifabu'u Lowalangimi, Yehowa, khömi, wa no ahori itörö, si manö göi dania wamatörö Yehowa fameta'unia ya'ami andrö, fefu, irege no ihori ami ba danö si sökhi andre, nibe'e Lowalangimi, Yehowa, khömi.[7]
16 Na misawö gamakhoita Lowalangimi, Yehowa, andrö, nifakhoinia khömi, ba na möi ami mamosumange Lowalangi bö'ö, wangalulu khöra, ba tesao wönu Yehowa khömi, ba lö ara, ba ahori ami ba danö si sökhi andre, nitehenia khömi.
Famotokhi ba gahe
editFabaliŵa lala
editOlayama Yosua: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö