Wb/nia/Yosua/1

I. Oroisa Lowalangi khö Yosua

1 Ba me no mate Moze, enoni Yehowa andrö, ba imane Yehowa khö Yosua, ono Nuni, enoni Moze:

2 No mate genonigu Moze andrö, ba labu sa'ae, ötö Yoridano andrö, ya'ugö ba banua [gu] andrö fefu, misaŵa danö andrö, nibe'egu khöra, ba Ndraono Gizeraeli andrö. 3 Dozi nahia nihundragö gahemi, ba no ube'e khömi, itörö niŵa'ögu khö Moze. 4 I'otarai danö si mate ba hili Libano andrö, numalö ba nidanö sebua andrö, Farati, tanö Ndraono Kheti andrö, ma'afefu, ba irugi ba nasi sebua andrö, mafi ba gaekhula luo, ba tanömi dania. 5 Lö sabe'e moroi khöu, götö wa'anau nosou, si mane fanologu Moze, si manö göi wanologu ya'ugö, lö ubödado ba lö faröido khöu. 6 Ya'abölö ndra'ugö, abe'e'ö dödöu, öfaosa sa'ae dania tana ba niha andre danö nifabu'ugu fahölusa khö ndra tuara, ba wame'e khöra. 7 Ha fa abölö ndra'ugö ba fa abe'e dödöu, ba wamaigi folo'ö oroisa andrö fefu, niŵa'ö genonigu Moze andrö khöu. Böi hole'ö ndra'ugö, he ba gambölö ba he ba gabera, ena'ö mofozu wolaumö, gofu heza möi'ö 8 Böi aefa-aefa ba mbaweu nösi zura goroisa andrö ba öfatou-tou tödöu, bongi ma'ökhö, ena'ö ö'alui wolo'ö fefu hadia ia nitanö ba zura andrö, ba sökhi lua-lua wolaumö ba falukha'ö zalöfö. 9 Tenga no uŵa'ö khöu: Ya'abölö ndra'ugö, ya'abe'e dödöu? Böi ata'u ndra'ugö ba böi mangiwa dödöu, me si fao-fao khöu Yehowa, Lowalangiu, gofu heza ösaŵa.

II. Oroisa Yosua ba zatua mbanua

10 Ba ibe'e goroisa Yosua ba zatua mbanua, imane: 11 Mitöröi golombaseŵa, ba mimane ba zato: Mifaigi khömi nifatö'ö; tölu bongi tö, ba mi'ötö Yoridano andrö, ba we'amöi ba danö andrö ba ba wangokhögö nibe'e Yehowa, Lowalangimi, khömi, ba wangai ya'ia.

12 Ba ba mado Rubeno andrö ba ba mado Gado ba ba zi matonga mado Manase, ba imane Yosua: 13 Mitörö tödömi daroma li andrö, niŵa'ö genoni Yehowa, Moze, khömi, me imane: Ahono ami ibe'e Yehowa, Lowalangimi, ibe'e khömi danö andre. 14 Fo'omomi ba iraonomi ba urifömi andrö, ba akha toröi ba danö nibe'e Moze khömi, ba zi tambai Yoridano, tanö andre, ba ya'ami andrö, ba si möi miyefo, mifa'anö ami, föna dalifusömi, dozi sabölö, ba wanolo ya'ira, 15 irege ahono dalifusömi ibe'e Yehowa, si mane ya'ami, ba irege la'okhögö göi danö andrö, nibe'e Yehowa, Lowalangimi, khöra. Awena dania mangawuli ami ba danö tana khömi, ba khömi sa'ae, nibe'e genoni Lowalangi andrö, Moze, khömi ba zi tambai Yoridano, tanö ba gatumbukha luo.

16 Ba latema li Yosua, lamane: Fefu hadia ia, niŵa'ömö khöma, ba ma'o'ö, ba fefu gofu heza öfatenge ndra'aga, ba möiga. 17 Si mane sibai nifondrondrongoma khö Moze, si manö göi mafondrondrongo khöu; ha fa itolo'ö Yehowa, Lowalangiu, si mane fanolonia Moze andrö. 18 Dozi si lö edöna molo ö oroisamö ba si lö mamondrongo liu, fefu hadia ia niŵa'öu, ba nibunu. Hatö fa abölö ndra'ugö ba fa abe'e dödöu.

Famotokhi ba gahe

Fabaliŵa lala

Olayama Yosua: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö