Wb/nia/Yosua/13

I. Iŵa'ö khö Yosua wamaosa tanö Yehowa

1 Ba me no atua Yosua, me no numalö ndröfi khönia, ba imane Yehowa khönia:

Hiza, no atua ndra'ugö, no numalö ndröfiu, ba ebolo sibai na danö, si lö humalö. 2 Ba da'ö danö si tosai na, si lö muhalö: Tanö Ndrawa Wilisiti ma'afefu ba tanö Gesuri ma'asagörö. 3 I'otarai Zihora andrö, ola danö Miserayi, tanö ba gatumbukha luo, irugi nola Nekerona andrö, tanö yöu, ba tanö Ndrawa Gana'ana labe'e: salaŵa Wilisiti andrö si dalima, salaŵa Gasa ba salaŵa Gasoto ba salaŵa Gasekalo ba salaŵa Gata ba salaŵa Nekerona, awö Ndrawa Gawi andrö, tanö raya. 4 Tanö Ndrawa Gana'ana andrö, ma'asagörö, ba tanö Meara, tanö mbanua Zidona, irugi Gafeka, irugi nola Ndraono Gamori, 5 ba tanö mbanua Gebala andrö, ba hili Libano ma'afefu, tanö ba gatumbukha, i'otarai Mba'ali Gado, ba gahe hili Heremono, irugi tanö ba Hamata. 6 Dozi banua ba hili andrö, i'otarai hili Libano, irugi Misirefo Mayi, fefu mbanua Zidona, ba ya'odo zanimba föna ndraono Gizeraeli; faoso manö ba Ndraono Gizeraeli, lau dahö-dahö, tana khöra si lö tebulö ba nga'ötöra, si mane niŵa'ögu khöu. 7 Ba fosasi sa'ae danö andrö, tana khö, ba mado andrö si siŵa ba ba zi matonga mado Manase.

II. Tana ba zi dombua mado a matonga yefo Yoridano

8 Awö da'ö [awö zi matonga] latema mege dana khöra mado Rubeno ba mado Gado, me ifakhoi khöra Moze, yefo Yoridano, tanö ba gatumbukha, itörö nibe'e Moze, enoni Yehowa andrö, khöra. 9 I'otarai Garoeri andrö, ba mbewe Garono, mbanua andrö ba dalu ndraso, awö zalo'o andrö ma'afefu — Medeba ba Dibona — 10 awö fefu mbanua Zihona andrö, razo Ndraono Gamori, ba Hesibona, irugi nola Ndraono Gamoni, 11 ba Gileadi, awö danö Gesuri andrö ba tanö Ma'akhati, ba he hili Heremono, ma'afefu, ba tanö Mbazana ma'afefu, 12 irugi Zalekha, tanö Ogi andrö, razo Mbazana, ba Gasaroti ba ba Gederai. Si tosai sebua niha andrö da'ö, nilaŵa Moze ba nitimbania. 13 Ba banua Gesuri andrö ba banua Ma'akhati, ba lö latimba Iraono Gizeraeli, ba lö tebulö ba Ndraono Gizeraeli mbanua Gesuri, ba banua Ma'akhati ösa, irugi ma'ökhö andre. 14 Ha ba mado Lewi lö ibe'e dana khö; Yehowa, Lowalangi Ndraono Gizeraeli, dana khöra, si mane nifabu'unia khöra.

III. Tana ba mado Rubeno

15 Ba no ibe'e ba mado Rubeno Moze, i'ohia'ö wabaliŵara. 16 Ba tana khöra i'otarai Garoeri andrö, ba mbewe Garono, mbanua andrö ba dalu ndraso ba salo'o andrö fefu ba ngai Medeba. 17 Hesibona ba banua si raböbö khöra, ba salo'o tanö andrö, Dibona ba Bamoti Mba'ali ba Beti Mba'ali Meono, 18 ba Yasa ba Kedemoti ba Mefa'ata, 19 ba Kiriata'i ba Sibema ba Sereti Sahara, ba hili ba ba ndraso. 20 Ba Beti Weoro ba sanaere hili Wisiga ba Beti Yezimoti, 21 awö fefu mbanua ba salo'o ba he ma'asagörö danö Zihona andrö, razo Ndraono Gamori, ba Hesibona, nisuŵo Moze no, fabaya salaŵa Ndraono Midiano andrö: Ewi ba Rekema ba Suri ba Huri ba Reba, awö Zihona andrö, ba danö. 22 Ba he si faeta andrö, Bileamo, ono Mbeori, ba labunu Iraono Gizeraeli si'öli, awö danö bö'ö andrö nibunura. 23 Ba ola mado Rubeno zui, ba Yoridano, bewenia andrö. Da'ö dana ba wabaliŵa mado Rubeno andrö, banua andrö, awö halama soya khöra.

IV. Tana ba mado Gado

24 Ba no ibe'e ba mado Gado Moze i'ohia'ö wabaliŵara; 25 ba tana khöra, ba Ya'ezeri, awö mbanua Gileadi fefu ba matonga danö Ndraono Gamoni, irugi Garoeri andrö, tanö ba gatumbukha, i'otarai Raba. 26 Ba i'otarai Hesibona, irugi Ramata Misefe ba Betoni, ba i'otarai Mahana'i, irugi nola Debira. 27 Ba ba ndraso, ba Beti Harama ba Beti Nimera ba Sukhota ba Safona, si tosai banua Zihona andrö, razo Hesibona, ola Yoridano, irugi mbalö mbaŵa Kineroti, yefo Yoridano, tanö ba gatumbukha. 28 Da'ö dana ba mado Gado, balazi wabaliŵara, banua andrö, awö halama soya khöra.

V. Tana ba zi matonga mado Manase

29 Ba no ibe'e ba zi matonga mado Manase Moze, ba da'e dana ba zi matonga mado Manase andrö, balazi wabaliŵara: 30 Tanöra andrö, ba i'otarai Mahana'i ba te'u'u danö Mbazana ma'afefu, tanö Ogi andrö, razo Mbazana, ma'asagörö, awö fefu zi fahalama andrö khö Ya'iro, ba Mbazana, önö ngafulu banua. 31 Ba si matonga danö Gileadi ba Asaroti ba Ederai, banua sebua andrö ba danö Ogi ba Mbazana. Da'ö zi möi ba Ndraono Makhiro andrö, ono Manase, ba wabaliŵa zi matonga Ndraono Makhiro. 32 Da'ö danö nifaosa Moze, ba zalo'o tanö Moabi, yefo Yoridano, tanö ba gatumbakha, ba gamaudu Yerikho. 33 Ba ba mado lewi, ba lö ibe'e Moze dana khöra tanö; Yehowa, Lowalangi ndraono Gizeraeli, dana khöra, si mane nifabu'unia khöra.

Famotokhi ba gahe

Fabaliŵa lala

Olayama Yosua: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö