Wb/nia/Moze IV/8

I. Fangehao fandru, ba naha wandru yaŵa

1 Ba humede Yehowa khö Moze, imane: 2 Hede khö Ga'aroni, ba ömane khönia: Na öbe'e ba naha wandru wandru andrö, ba miföna naha wandru haga wandru andrö, si fitu, öbe'e.

3 Ba i'o'ö da'ö A'aroni; tanö föna ba naha wandru ibe'e wandru andrö, dali niŵa'ö Yehowa khö Mose.

4 Ba naha wandru andrö, ba no ana'a niböbözi mege, wamazökhi ya'ia; he tölania, ba he bunga andrö khönia, oi ana'a niböbözi, dali wamaedo andrö, ni'oroma'ö Yehowa khö Moze, si manö ifazökhi naha wandru andrö.

II. Fangehao Ono Lewi

5 Ba humede Yehowa khö Moze, imane: 6 Tutuyu Nono Lewi ba Ndraono Gizeraeli bö'ö, ba haogö ira. 7 Ömane khöra, wangehao ya'ira: Ötefe ira idanö fameta horö, ba latöŵö mbura, ma'asageu ya'ira, lababago nukhara ba lahaogö ira.

8 Ba lahalö nono zawi, si matua, awö zumange ni'a, si faböbö ba da'ö — hamo si sökhi nifaruka fanikha — ba ya'ugö, ba sara tö öhalö ono zawi, si matua, sumange fameta horö.

9 Ba öfa'aso nono Lewi föna nose wama'ele'ö ba öfalukha'ö zato Ndraono Gizeraeli fefu. 10 Awena dania muhede'ö ba nono Lewi, föna Yehowa ba latufa tangara Nono Lewi Iraono Gizeraeli.

11 Ba ihahae Nono Lewi A'aroni, föna Yehowa, sumange nihahae, nibe'e Ndraono Gizeraeli, ena'ö lahalö-halö halöŵö andrö khö Yehowa. 12 Ba Ono Lewi, ba latufa tangara högö nono zawi andrö, ba ö'asiwai, si sara, ba sumange fameta horö, ba si sara, ba sumange nitunu khö Yehowa, ba wameta sala Nono Lewi.

13 Ba ö'ohe khö ndra A'aroni iraononia Nono Lewi, ba öhahae ira sumange nihahae khö Yehowa. 14 Ba ö'oniagö Nono Lewi ba Ndraono Gizeraeli, ena'ö tana khögu Nono Lewi andrö. 15 Ba aefa da'ö, ba hana na möi bakha Nono Lewi, ba wangai halöŵö ba nose wama'ele'ö; ömanö wangehao ya'ira ba öhahae sumange nihahae.

16 Buala Ndraono Gizeraeli khögu manö sa'ae ira, salahi zi a'a ba wa'atumbu, fefu, si a'a ndraono ba Ndraono Gizeraeli fefu, wa no uhalö ira khögu. 17 Me no khögu fefu zi a'a ba wa'atumbu, ba Ndraono Gizeraeli, he ba niha, ba he ba gurifö. Me luo ubunu no zi a'a ba wa'atumbu ba danö Miserayi u'amoni'ö ira khögu. 18 Ba no uhalö Nono Lewi, salahi zi a'a andrö, fefu, ba Ndraono Gizeraeli. 19 Ba no ube'e tana khö ndra A'aroni iraononia Nono Lewi andrö nitutuyu ba Ndraono Gizeraeli, ena'ö lahalö-halö halöŵö andrö ba nose wama'ele'ö, soguna ba Ndraono Gizeraeli, ba ena'ö ba'a-ba'a Ndraono Gizeraeli ira, fa lö göna famakao Ndraono Gizeraeli, na lahatö'ö ena'ö ira ba ni'amoni'ö andrö.

20 Ba lamanö ba Nono Lewi andrö ira Moze A'aroni ba sato Ndraono Gizeraeli fefu; la'o'ö sibai niŵa'ö Yehowa khö Moze, ba Nono Lewi andrö; si manö wolau Ndraono Gizeraeli khöra.

21 Ba lafabeta'ö horöra Ono Lewi, ba lababago nukhara; ba ihahae ira A'aroni sumange nihahae, ba ifaigi khöra wangatulö, ba wangehao ya'ira. 22 Ba aefa da'ö, ba möi bakha ba nose Nono Lewi, ba wangai halöŵöra ba nose wama'ele'ö, barö mbawa ndra A'aroni iraononia; dali niŵa'ö Yehowa khö Moze ba Nono Lewi andrö; si manö wolaura khöra.

III. Ha me uga fakhe ira na labörögö we'amöi ba halöŵöra

23 Ba humede Yehowa khö Moze, imane: 24 Da'ö ia, ba Nono Lewi andrö: Na 25 fakhe ia ba ma si a'a moroi andrö, ba lafataro ia, ba wanolo ba halöŵö andrö, ba nose wama'ele'ö. 25 Ba na 50 fakhe ia, ba aefa ia ba halöŵö; alakha lö'ö sa'ae mohalöŵö. 26 Ba hana na möi ia tohu-tohu danga dalifusönia ba nose wama'ele'ö, ba wangai halöŵö andrö; ba si ndruhu halöŵö, ba lö'ö sa'ae ihalö. Si manö wolaumö ba Nono Lewi andrö, ba halöŵöra andrö.

Famotokhi ba gahe

Fabaliŵa lala

Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö