Wb/nia/Moze IV/15

I. Famakhoi sumange ni'a ba sumange nibadu

1 Ba humede Yehowa khö Moze, imane: 2 Hede ba Ndraono Gizeraeli, ömane khöra:

Na mirugi dania danö andrö, nibe'egu nahami, 3 ba na mibe'e khö Yehowa zumange nifatörö ba galitö, he sumange nitunu ba he sumange nitaba, ma ba wanörö amabu'ula li, ba ma ame'ela saoha gölö, ba ma na baŵa gowasa andrö khömi, ba wame'e samohua khö Yehowa, sawi, ba ma biri-biri, 4 ba same'e sumange Yehowa andrö, khönia, ba sambua ni'ofulu hamo si sökhi nifaruka fanikha, samba hinaoya, ifao sumange ni'a. 5 Ba agu, sumange nibadu, ba samba hinaoya ba zi sara ono mbiri-biri, öfao ba zumange nitunu ba ba zumange nitaba.

6 Ba ba mbiri-biri si matua, ba öfao sumange ni'a dombua ni'ofulu hamo si sökhi nifaruka si tölu kata fanikha, ba agu, sumange nibadu, 7 ba tölu kata öbe'e khö Yehowa, samohua.

8 Ba na ono zawi, si matua öbe'e sumange nitunu, ba ma sumange nitaba, ba wanörö amabu'ula li, ba ma sumange Yehowa, fangorifi, ba nifao ba nono zawi andrö, 9 sumange ni'a, ba tölu ni'ofulu hamo si sökhi, nifaruka si sadumba fanikha. 10 Ba agu, sumange nibadu, ba sadumba öbe'e, sumange Yehowa, nifatörö ba galitö, samohua.

11 Si manö wolau ba nono zawi fefu ba ba mbiri-biri si matua fefu ba ba nono mbiri-biri ba ba nono nambi fefu. 12 Dali ha uga geu nibe'emi, ba sage-sageu, ba mimanö. 13 Dozi niha ba danö zolo'ö amakhoita andrö, na labe'e zumange Yehowa, nifatörö ba galitö, samohua.

14 Ba na so ba khömi niha bö'ö, ba ma si no ahono khömi, ba si manö göi ilau, dali wolaumi. 15 Ha sara lala, dozi, he ya'ami, ba he niha bö'ö, si soso khömi. Amakhoita si lö tebulö da'ö, götö-götö wa'ara; ba zumange Yehowa, ba faoma, he ba niha bö'ö, ba he ba khömi. 16 Ha sara nihohogöi ba ha sara nifakhoi, he ba khömi, ba he ba niha bö'ö, si soso ba khömi.

II. Sumange si a'a gö ba sumange fameta horö

17 Ba humede Yehowa khö Moze, imane 18 Hede ba Ndraono Gizeraeli, ba ömane khöra:

Na mirugi dania danö andrö, ni'ohegu ya'ami, 19 ba na mi'a mbua danö, ba mibe'e khö Yehowa zi no amaedola wegero, föfönia. 20 Si a'a hamo ni'otamböni khömi, ba sagörö kue mibe'e fegero, lala wame'e fegero ba golayama mbasitö wame'emi ya'ia. 21 Si a'a hamo ni'otamböni andrö khömi, ba mibe'e khö Yehowa ösa, sumange fegero, götö-götö wa'ara dania.

22 Ba na so hadia ia zi lö mitörö amakhoita andrö, si lö mu'odödögö, oroisa Yehowa andrö khö Moze, 23 hadia ia, ni'oroi'ö Yehowa khömi, khö Moze, i'otarai luo andrö, me ibe'e goroisa Yehowa, ba dania na, götö-götö wa'ara, 24 na tenga ni'odödögö zato, wa lö mutörö da'ö, ba sato fefu zame'e ono zawi, si matua, sumange nitunu, samohua khö Yehowa, nifao sumange ni'a ba sumange nibadu, nifao-fao ba da'ö, lalania, ba sageu nambi si matua, sumange fameta horö.

25 Ba na no ifaigi ere wameta sala Ndraono Gizeraeli sato, fefu, ba tebe'e aefa khöra. Noa sa tenga ni'odödögö, ba no labe'e zumange khöra, sumange Yehowa nifatörö ba galitö, awö zumange fameta horö, khö Yehowa, ba lalöra andrö. 26 Ba tebe'e aefa zala Ndraono Gizeraeli sato fefu ba sala niha bö'ö, si soso ba khöra; noa sa horö zato fefu, lalö andrö.

27 Ba na so zi sala si lö mu'odödögö, na ha samösa, ba nambi si döfi fa'ebua ibe'e sumange fameta horö. 28 Ba yamufaigi ere wameta sala zi no mosala khö Yehowa, si tenga ni'odödögö, wolau fameta sala andrö khönia, ba tebe'e aefa khönia. 29 Ha sara lala khömi — he ba niha ba danö, Iraono Gizeraeli, ba he ba niha bö'ö, si soso ba khöra, na so zolau hadia ia, si lö mu'odödögö.

30 Ba na so zolalö ni'odödögö, he niha ba danö, ba he niha bö'ö, ba sanandraŵaisi Yehowa, ba nise'e ba niwara niha si manö. 31 Noa sa si lö guna li Yehowa ba si lö boto goroisania ibe'e; ba lö fulitö, ba nise'e niha si manö — ilu'i horönia.

III. Fotu zanawö oroisa ba zabato

32 Ba me so ba danö si mate andrö Ndraono Gizeraeli, ba falukha ira niha sangozaragö eu, me luo sabato.

33 Ba la'ohe ia khö ndra Moze A'aroni ba ba zato fefu si fakhamö khönia, me i'ozaragö geu, ba lakuru ia, 34 me lö'ö na oroisa ba da'ö, he lawisa khönia.

35 Ba imane Yehowa khö Moze: Niha andrö, ba nibunu; sato fefu zanebu kara ya'ia, baero golombaseŵa.

36 Ba la'ohe ia baero golombaseŵa sato fefu ba latebu kara, labunu, dali niŵa'ö Yehowa khö Moze.

IV. Nifobowo-bowo nukha

37 Ba humede Yehowa khö Moze, imane:

38 Hede ba Ndraono Gizeraeli, öŵa'ö khöra lafobowo-bowo gahe mbarura ya'ira ba madoura dania; ba bowo-bowo andrö, ba ladozigö sinali ungu sowu waru-waru. 39 Ba da'ö geluaha mbowo-bowo andrö khömi: na mifaigi ia, ba itörö tödömi goroisa Yehowa andrö fefu, ena'ö mi'o'ö ia, ba böi mihole'ö ami ba gisö-isö dödömi ba ba gomasiö hörömi, famaelungumi ba wangerogö Yehowa. 40 Ena'ö lö olifu ami goroisagu andrö fefu ba ena'ö mi'o'ö, fa ni'amoni'ö ami föna Lowalangimi. 41 Yehowa ndra'odo, Lowalangimi, si no mangeheta ya'ami ba danö Miserayi, ba we'amöi Lowalangimi, ya'odo andre, Yehowa, Lowalangimi!

Famotokhi ba gahe

Fabaliŵa lala

Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö