1 Ba humede Yehowa khö Moze, imane: 2 Lau mbalö Ndraono Gizeraeli ba Ndraono Midiano andrö; ba na aefa da'ö, ba ni'orudugö khö ndra tuau ndra'ugö.[1]
3 Ba humede Moze ba zato, imane: Mi'a'aro'ö niha, banuami ba wanuwö, ena'ö lasuwö Ndraono Midiano andrö, ba wolau balö Yehowa ba Ndraono Midiano. 4 Dozi mado Ndraono Gizeraeli, ba hönöhönö zambusambua mado mifatenge ba wanuwö andrö. 5 Ba latutuyu ba ngahönö Ndraono Gizeraeli hönöhönö zambu-sambua mado, ni'a'aro'ö ba wanuwö andrö, felendrua ngahönö fefu.
6 Ba ifatenge ira ba wanuwö Moze, hönö-hönö zambu-sambua mado; ba ifao khöra Wineha andrö, ono Geleazari andrö, ba wanuwö; solohe fakake ni'amoni'ö andrö da'ö, ba torofe fangekhugö niha.
7 Ba möi ira manuwö Iraono Midiano, dali niŵa'ö Yehowa khö Moze, ba labunu fefu motöi matua. 8 Ba he razo ba Ndraono Midiano ba labubunu, awö ni'ö'ötöra andrö, ya'ia Ewi andrö ba Dekemi ba Suri ba Huri ba Reba, razo Ndraono Midiano, si dalima; ba he Bileamo andrö, ono Mbeori, ba labunu bawa zi'öli.[2]
9 Ba lara'u ndra alawe Ndraono Midiano Iraono Gizeraeli, fabaya iraono sawuyu khöra, ba la'ohe, ba uriföra sonoro fefu ba uriföra bö'ö fefu, awö nibaya-bayara fefu, ba la'ohe, ahuluara. 10 Ba banuara ba nahiara fefu, ba osera fefu, ba latunu.
11 Ba lahalö fefu nihalöra andrö, ahulua andrö fefu, he niha, ba he urifö, 12 ba la'ohe khö Moze niha andrö, nira'ura ba ahulua bö'ö, awö nibaya-baya andrö, nihalöra, ba khö Geleazari ere ba ba Ndraono Gizeraeli sato, ba golombaseŵa ba zalo'o tanö Ndraono Moabi ba ndraso Yoridano, ba gamaudu Yerikho.
II. Lasala'ö ira si möi manuwö mege ba lasala'ö göi gahulua edit
13 Ba lafaondragö ira ira Moze Eleazari ere ba satua mbanua fefu, baero golombaseŵa.
14 Ba mofönu Moze ba zolohe sanuwö, ba gumandra zi hönö ba ba gumandra zi otu, si oroi, manuwö. 15 Imane khöra Moze: Hadia, no ahori mi'orifi ndra alawe? 16 No ya'ira mbörö wangerogö Ndraono Gizeraeli Yehowa, me no iŵa'ö khöra Bileamo andrö, ba Weoro andrö, tobali itörö mbanua Yehowa famakao.[3] 17 Ba mibunu fefu motöi matua ba ndraono andrö, ba dozi ira alawe ba zi no orudu ira matua, ba mibunu;[4] 18 ba dozi ono alawe ba zi lö irai orudu ira matua, ba mi'orifi khömi.
19 Ba ya'ami, ba fitu bongi mi'iagö baero golombaseŵa; dozi ami si no mamunu niha ba si no mombambaya nibunu, ba na luo si tölu ba na luo si fitu, ba misala'ö ami, fabaya ni'ohemi andrö, nirabu.[5] 20 Ba si manö göi nukha fefu ba gama-gama uli zawi ba gama-gama bu mbiri-biri fefu ba fakake eu fefu, misala'ö.
21 Ba imane Eleazari ere ba zabölö andrö, si no möi manuwö mege: Da'ö goroisa andrö, ni'oroi'ö Yehowa khö Moze. 22 Ba ana'a ba firö ba töla ba si'öli ba simo mbanua ba simo itö, 23 fefu hadia ia zanaha ba galitö, ba mifatörö ba galitö, ba aheta wa'ara'iönia; hatö fanasa ya'ia ba nidanö fangehao andrö. Ba fefu hadia ia zi lö manaha ba galitö, ba ba nidanö mifatörö. 24 Ba na no mibabago nukhami, na luo si fitu andrö, ba no aheta wa'ara'iömi, ba tola sa'ae mifuli ami ba golombaseŵa.
III. Lafaosa gahulua edit
25 Ba humede Yehowa khö Moze, imane: 26 Ofaya fefu ha wa'oya gahulua andrö, nihalö, he niha, ba he urifö, ya'ugö ba Eleazari ere ba satua mbanua. 27 Ba si matonga, ba öbe'e ba zi no fao ba wanuwö, si no möi mege, ba si matonga, ba ba zato.[6] 28 Ba ba zanuwö andrö, si no möi mege, ba öhalö mbeo, khö Yehowa, sambua ba zi 500, he niha ba he sawi ba he kalide ba he biri-biri. 29 Ba zi matonga tana khöra mihalö ba mibe'e ba danga Geleazari ere, sumange fegero khö Yehowa. 30 Ba ba zi matonga ba Ndraono Gizeraeli, ba sambu-sambua ötutuyu ba zi lima-lima wulu, he niha ba he sawi ba he kalide ba he biri-biri — urifö andrö fefu — ba öbe'e ba danga nono Lewi, sangai-ngai halöŵö andrö ba nose Yehowa.
31 Ba la'o'ö niŵa'ö Yehowa khö Moze ira Moze Eleazari ere.
32 Ba fa'oya gahulua andrö, si tosai ahulua zanuwö andrö, ba no 675.000 nga'eu mbiri-biri, 33 ba 72.000 zawi, 34 ba 61.000 galide: 35 ba ba niha, ba fa'ato nono alawe andrö, ba zi lö irai orudu ira matua, ba no 32.000 niha.
36 Ba si matongania andrö, tana ba zi no möi manuwö, ba 337.500 mbiri-biri, 37 ba beo khö Yehowa, biri-biri andrö, ba no 675 nga'eu, ba 36.000 zawi, 38 ba beo da'ö khö Yehowa, ba 72 nga'eu, ba 30.500 galide, 39 ba beo da'ö khö Yehowa, ba 61 nga'eu; 40 ba 16.000 niha ba beo da'ö khö Yehowa, ba 32 niha. 41 Ba beo andrö, nibe'e sumange fegero khö Yehowa, ba ibe'e ba danga Geleazari ere Moze, dali niŵa'ö Yehowa khö Moze. 42 Ba ba zi matongania andrö, tana ba Ndraono Gizeraeli, ni'oniagö Moze ba dana ba zanuwö andrö, 43 (ba dana ba zato, si matonga andrö, ba no 337.500 mbiri-biri, 44 ba 36.000 zawi, 45 ba 30.500 galide, 46 ba 16.000 niha) — 47 ba zi matonga andrö, tana ba Ndraono Gizeraeli, ba itutuyu Moze, sambu-sambua ba zi limalima wulu, he niha, ba he urifö, ba ibe'e ba danga nono Lewi, sangai-ngai halöŵö andrö ba nose Yehowa, dali niŵa'ö Yehowa khö Moze.
48 Ba la'ondrasi Moze kumandra ngahö-ngahönö zanuwö andrö, kumandra zi hönö ba kumandra zi otu, lamane khö Moze: 49 No la'ofaya wa'ato zanuwö andrö ni'ohema, enonimö, ba samösa lö nirongoma si lö'ö; 50 andrö mabe'e zumange Yehowa, fangandrö nosoma khö Yehowa, hadia nihalö zamösana ahulua gama-gama ana'a ba köla ba töla gasa ba laeduru ba saeru dalinga ba aya bö'ö.
51 Ba lahalö khöra gana'a andrö ira Moze Eleazari ere — hadia ia ngawalö naya. 52 Ba fa'ebua gana'a andrö, nibe'era sumange si no amaedola wegero khö Yehowa, ba no 16.750 sekeli; nibe'e gumandra zi hönö ba kumandra zi otu. 53 Ba sanuwö sato, ba no oi zara morabu göi:
54 Ba lahalö gana'a andrö khö gumandra zi hönö ba khö gumandra zi otu ira Moze Eleazari ere, ba labe'e ba nose wama'ele'ö, ena'ö itörö-törö tödö Yehowa Ndraono Gizeraeli.
Famotokhi ba gahe edit
Fabaliŵa lala edit
Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö