Wb/nia/Moze IV/28

I. Sumange sero ma'ökhö

1 Ba humede Yehowa khö Moze, imane: 2 Be'e li ba Ndraono Gizeraeli, ömane khöra: Böi olifu ami wame'e ame'ela sumange andrö khögu na inötö, ögu, sumange nifatörö ba galitö, nihonogöi khögu, samohua khögu.

3 Ömane na khöra: Da'ö zumange nifatörö ba galitö, nibe'emi khö Yehowa: Sero ma'ökhö, ba dua rozi nono mbiri-biri, si lö sala, sumange nitunu, si lö aefa-aefa. 4 Ono mbiri-biri si sara, ba na mahemolu mbanua öbe'e, ba si sara, ba na tanö owi, ba tölu kata hamo si sökhi, 5 ninifakhöyö fanikha mbua zai nifufu, samba kata, sumange ni'a. 6 Da'ö zumange nitunu andrö, si lö aefa-aefa, nibe'e no, ba gahe hili Zina'i, samohua, nibe'e khö Yehowa, sumange nifatörö ba galitö. 7 Ba nifao ba zi sara-sara ono mbiri-biri, sumange nibadu, ba samba-samba kata. Ba ni'amoni'ö labe'e khö Yehowa zumange nibadu andrö, agu nilau famasa. 8 Ba ono mbiri-biri si sara, ba na tanö owi öbe'e; ba nifao zumange ni'a, si mane ba zanguhulö wongi mege, awö zumange nibadu andrö, nifao khönia, sumange nifatörö ba galitö, nibe'e khö Yehowa, samohua.

II. Sumange na luo sabato

9 Ba na luo sabato, ba dua rozi nono mbiri-biri si döfi fa'ebua, si lö sala, ba tölu hinaoya hamo si sökhi nifaruka fanikha, sumange ni'a, ba sumange nibadu andrö, nifao ba da'ö.

10 Da'ö zumange nitunu andrö, ero na luo sabato, baero zumange nitunu andrö, si lö aefa-aefa, ba sumange nibadu andrö, nifao ba da'ö.

III. Sumange na fasulöna mbaŵa

11 Ba ero na fasulöna mbaŵa khömi, ba mibe'e sumange Yehowa, ba dua rozi nono zawi, si matua ba sageu mbiri-biri si matua ba fitu rozi nono mbiri-biri, si döfi fa'ebua, si lö sala; 12 ba sara-sara ono zawi, ba dua-dua dumba nifao hamo si sökhi nifaruka fanikha, sumange ni'a, ba sage-sageu biri-biri si matua, ba tölu-tölu hinaoya hamo si sökhi, nifaruka fanikha, sumange ni'a, 13 ba sara-sara ono mbiri-biri, ba tölu-tölu kata hamo si sökhi, nifaruka fanikha, sumange ni'a — sumange nitunu, samohua, sumange nifatörö ba galitö, nibe'e khö Yehowa. 14 Ba ba zumange nibadu andrö, nifao ba da'ö, ba sara-sara ono zawi, ba samba-samba hinaoya nagu ba sage-sageu biri-biri si matua, ba samba-samba kata a matonga, ba sara-sara ono mbiri-biri, ba samba-samba kata.

Da'ö zumange nitunu andrö nibe'e, ero na fasulöna, döfi fasui manö.

15 Ba baero ö, ba sageu nambi si matua, sumange fameta horö, nibe'e khö Yehowa; baero zumange nitunu andrö, si lö aefa-aefa, ba baero zumange nibadu andrö, nifao ba da'ö, wame'e da'ö.

IV. Sumange fasa

16 Ba ba zi meweleöfa ba mbaŵa si föföna, ba telau wasa andrö, khö Yehowa. 17 Ba ba zi mewelelima ba mbaŵa da'ö, ba aekhu ba danö gowasa andrö. Fitu bongi wa'ara te'a roti si lö mu'aisöni. 18 Na luo si föföna andrö, ba owulo ba ni'amoni'ö ba lö tola mihalö hadia ia halöŵö ba da'ö. 19 Ba nibe'e khö Yehowa sumange nifatörö ba galitö, sumange nitunu, ba dua rozi nono zawi, si matua, ba sageu mbiri-biri si matua ba fitu rozi nono mbiri-biri; si lö sala, mibe'e. 20 Ba nifao ba da'ö, sumange ni'a, ba hamo si sökhi, nifaruka fanikha, dua dumba zi fao ba nono zawi, ba tölu hinaoya ba mbiri-biri si matua andrö; 21 ba sara-sara ono mbiri-biri si fitu andrö, ba tölu-tölu kata mifao. 22 Ba baero ö, ba sageu nambi si matua, sumange fameta horö, ba wameta salami andrö.

23 Da'ö [fefu] mibe'e, lö lai zumange nitunu andrö ba zanguhulö wongi, nibe'e sumange nitunu si lö aefa-aefa. 24 Sumange da'ö nibe'e khö Yehowa, ö sumange nifatörö ba galitö, samohua, ero ma'ökhö, fitu bongi wa'ara; baero zumange nitunu andrö si lö aefa-aefa andrö, ba baero zumange nibadu andrö, nifao ba da'ö wame'e ya'ia.

25 Ba na luo si fitu, ba owulo ami ba ni'amoni'ö, ba lö tola mihalö hadia ia halöŵö ba da'ö.

V. Sumange na luo wendrakose

26 Ba na baŵa wamasi sahulö, na mibe'e zumange Yehowa, sumange ni'a, föfö mbua zahulö, na owasa wendrakose khömi, ba owulo ami ba ni'amoni'ö; ba lö tola mihalö hadia ia halöŵö ba da'ö. 27 Ba sumange nitunu, samohua, nibe'emi khö Yehowa, ba dua rozi nono zawi ba sageu mbiri-biri si matua ba fitu rozi nono mbiri-biri. 28 Ba nifao ba da'ö sumange ni'a, ba hamo si sökhi nifaruka fanikha, sara-sara ono zawi ba dua-dua dumba, ba ba mbiri-biri si matua andrö, 29 ba tölu hinaoya, ba sara-sara ono mbiri-biri si fitu andrö, ba tölu-tölu kata; 30 ba sageu nambi si matua, ba wameta salami. 31 Baero zumange nitunu andrö, si lö aefa-aefa andrö, ba baero zumange ni'a ba sumange nibadu, nifao ba da'ö, wame'emi ya'ia; si lö sala mibe'e.

Famotokhi ba gahe

Fabaliŵa lala

Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö