Wb/nia/Moze IV/7

I. Sumange nibe'e zatua Ndraono Gizeraeli ba we'amoni'ö ose wama'ele'ö

1 Ba me no awai ifa'anö nose andrö Moze ba me no ibayoini ba me no i'amoni'ö, awö wakake khönia fefu, ba me no ibayoini göi naha wame'e sumange ba me no i'amoni'ö, awö wakake khönia fefu, 2 ba la'ohe zumange satua Ndraono Gizeraeli, högö madora andrö — salaŵa ganara andrö, satua ni'ofaya no.

3 Ni'ohera khö Yehowa, ame'elara, ba önö gureta nifosagö, ba felendrua nono zawi — daru-darua zalaŵa, ba sambu-sambua kureta ba sara nono zawi zamösa; da'ö la'ohe föna nose.

4 Ba imane Yehowa khö Moze: 5 Tema khöra, ena'ö te'oguna'ö ba nilau andrö, ba nose wama'ele'ö; ba ba danga Nono Lewi öbe'e, öfaigi hadia zoguna ba halöŵö zamösana.

6 Ba itema Moze gureta andrö, awö nono zawi ba ibe'e ba danga Nono Lewi. 7 Dombua gureta ba öfa nono zawi ibe'e ba danga ndraono Gereso, balazi hadia zoguna ba halöŵöra. 8 Ba öfa gureta ba ŵalu nono zawi ibe'e ba danga ndraono Merari, balazi hadia zoguna ba halöŵöra, barö mbawa Gitamari andrö, ono Ga'aroni ere. 9 Ba ba ndraono Gahati, ba lö'ö, me solohe ni'amoni'ö [sibai] andrö ira; ni'osa'ö da'ö.

10 Ba la'ohe salaŵa game'ela ba we'amoni'ö naha wame'e sumange, me luo tebayoini ia; föna naha wame'e sumange labe'e zumange andrö khöra salaŵa.

11 Ba imane Yehowa khö Moze: Samösa ma'ökhö ndramube'e salaŵa zumange andrö khöra, ba we'amoni'ö naha wame'e sumange.

II. Nibe'e zamösana högö mado andrö, si felendrua, buala

12 Ba si börötaigö mame'e sumange khönia, ba Nahaso, ono Gaminadabi, mado Yuda. 13 Ba sumange andrö khönia, ba mako firö, 130 rufia fanulo, ba figa sebua, firö, 70 rufia fanulo ba zaga ni'amoni'ö, faoma nifo'ösi hamo si sökhi, nifaruka fanikha, sumange ni'a, ba sambua wiga ana'a, 14 10 rufia fanulo, nifo'ösi samohua nitunu, ba sara nono zawi, 15 si matua, ba sageu mbiri-biri si matua, ba sara nono mbiri-biri, si matua, si döfi fa'ebua, sumange nitunu, ba sageu nambi si matua, 16 sumange fameta horö; 17 ba sumange fangorifi, ba dua rozi nono zawi, ba lima nga'eu mbiri-biri si matua ba lima nga'eu nambi si matua, ba lima rozi nono mbiri-biri, si matua, si döfi fa'ebua. Da'ö game'ela Nahaso andrö, ono Gaminadabi.

18 Ba mahemolu ö, ba Natana'eli, ono Zuara, salaŵa mado Izasari. 19–23 Ba sumange khönia ba mako firö, 130 rufia fanulo, ba si manö sa'ae, si mane khö Nahaso no mege. Da'ö game'ela Natana'eli andrö, ono Zuara.

24 Ba me luo si tölu, ba salaŵa Ndraono Zebuloni, Eliabi andrö, ono Helono. 25–29 Ba sumange khönia, ba mako firö, ba si manö sa'ae, si mane khö Nahaso no mege. Da'ö game'ela Geliabi andrö, ono Helono.

30 Ba me luo si öfa, ba salaŵa Ndraono Rubeno, Elisuri andrö, ono Zedeuri. 31–35 Ba sumange khönia, ba mako firö, ba si manö sa'ae, si mane khö Nahaso no mege. Da'ö game'ela Gelisuri andrö, ono Zedeuri.

36 Ba me luo si lima, ba salaŵa Ndraono Zimeoni, Selumieli andrö, ono Zuri-Sada'i. 37–41 Ba sumange khönia, ba mako firö, ba si manö sa'ae, si mane khö Nahaso no mege. Da'ö game'ela Zelumieli andrö, ono Zuri-Sada'i.

42 Ba me luo si önö, ba salaŵa Ndraono Gado, Eliazafi andrö, ono Degueli. 43–47 Ba sumange khönia, ba mako firö, ba si manö sa'ae, si mane khö Nahaso no mege. Da'ö game'ela Geliazafi andrö, ono Degueli.

48 Ba me luo si fitu, ba salaŵa Ndraono Geferayi, Eliazama andrö, ono Gamihudi. 49–53 Ba sumange khönia, ba mako firö, ba si manö sa'ae, si mane khö Nahaso no mege. Da'ö game'ela Geliazama andrö, ono Gamihudi.

54 Ba me luo si ŵalu, ba salaŵa Ndraono Manase, Gamelieli andrö, ono Wedasuri. 55–59 Ba sumange khönia, ba mako firö, ba si manö sa'ae, si mane khö Nahaso no mege. Da'ö game'ela Gamelieli andrö, ono Wedasuri.

60 Ba me luo si siŵa, ba salaŵa Ndraono Mbeniyami, Abidano andrö, ono Gideono. 61–65 Ba sumange khönia, ba mako firö, ba si manö sa'ae, si mane khö Nahaso no mege. Da'ö game'ela Gabidano andrö, ono Gideono.

66 Ba me luo si fulu, ba salaŵa Ndraono Dano, Ahiezeri andrö, ono Ami-Sada'i. 67–71 Ba sumange khönia, ba mako firö, ba si manö sa'ae, si mane khö Nahaso no mege. Da'ö game'ela Gahiezeri andrö, ono Ami-Sada'i.

72 Ba me luo si felezara, ba salaŵa Ndraono Gaseri, Fagieli andrö, ono Okherana. 73–77 Ba sumange khönia, ba mako firö, ba si manö sa'ae, si mane khö Nahaso no mege. Da'ö game'ela Wagieli andrö, ono Okherana.

78 Be me luo si felendrua, ba salaŵa Ndraono Nafetali, Ahira andrö, ono Genani. 79–83Ba sumange khönia, ba mako firö, ba si manö sa'ae, si mane khö Nahaso no mege. Da'ö game'ela Gahira andrö, ono Genani.

III. Orudua nibe'e andrö fefu

84 Da'ö we'amoni'ö naha wame'e sumange andrö, me luo tebayoini ia, nibe'e zalaŵa Ndraono Gizeraeli: 12 mako firö ba 12 wiga sebua firö ba 12 wiga ana'a; sambu-sambua mako, 85 ba 130 rufia fanulo, ba sambu-sambua figa sebua, ba 70 rufia; firö gama-gama andrö fefu, ba 2400 rufia fanulo, ba zaga ni'amoni'ö. 86 Felendrua wiga ana'a, nifo'ösi samohua nitunu; sambu-sambua figa ba 10 rufia fanulo, ba zaga ni'amoni'ö; ana'a wiga andrö fefu, ba 120 rufia fanulo. 87 Ba sawi fefu, sumange nitunu, ba 12 nono zawi; ba 12 mbiri-biri si matua, ba 12 rozi nono mbiri-biri, si matua, si döfi fa'ebua, awö zumange ni'a andrö, nifao ba da'ö, ba 12 nambi si matua, sumange fameta horö. 88 Ba fefu zawi, sumange fangandrö saoha gölö, ba 24 nono zawi; ba 60 mbiri-biri si matua, ba 60 nambi si matua, ba 60 rozi nono mbiri-biri, si matua, si döfi fa'ebua.

Da'ö we'amoni'ö naha wame'e sumange andrö, me no tebayoini ia.

89 Ba na möi bakha Moze ba nose wama'ele'ö, fahuhuo khö Yehowa, ba irongo linia khönia, moroi ba lagö-lagö andrö, ba dete dawöla zura goroisa, moroi ba naha andrö ba gotalua gerubi andrö, si dombua; si manö wehedenia khönia.

Famotokhi ba gahe

Fabaliŵa lala

Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö