I. Ifuli ifabu'u wangefa Lowalangi ba ifuli ibe'e goroisa khö Moze
edit1 Ba imane Yehowa khö Mose: Iada'e dania ö'ila hadia nilaugu khö Wara'o andrö: ni'anösö'ö tanga sabe'e ifofanö ira, ba ni'anösö'ö tanga sabe'e itimba ira, iheta ira ba danönia.[1]
2 Ba humede Lowalangi khö Moze, imane khönia: Yehowa ndra'odo! 3 No u'oroma'ö ndra'odo no, Lowalangi si lö ambö fa'abölö, khö ndra Aberahamo, Iza'aki, Yakobo; ba tenga Yehowa döigu ba wangoroma'ögu ya'odo khöra.[2] 4 Ba noa na'i ulau fawu'u li khöra, wa ube'e khöra danö Gana'ana andrö, tanö andrö ba zi fatewu ira mege[3] 5 Ba iya'e, ba no ufondrodrongo wangarö-ngarö Ndraono Gizeraeli andrö ba wangosawuyu Ndrawa Miserayi andrö ya'ira, ba no itörö tödögu gamabu'ula ligu andrö.
6 Andrö ömane ba Ndraono Gizeraeli: Yehowa ndra'odo, u'efa'ö ami ba halöŵö zawuyu andrö, halöŵömi ba Ndrawa Miserayi, usöbi ami, wameta ya'ami ba halöŵömi andrö, halöŵö zawuyu, u'efa'ö ami tangagu ni'oro'ö andrö ba fao wangoroma'ö fa'abölö si lö ambö. 7 Ba utuyu ami banuagu, ba Lowalangimi ndra'odo ba ya'aboto dania ba dödömi, wa no Yehowa ndra'odo, Lowalangimi, sangefa'ö ya'ami ba halöŵö zawuyu andrö, ba danö Miserayi. 8 Ba u'ohe ami ba danö andrö nifabu'ugu fahölusa khö ndra Aberahamo, Iza'aki, Yakobo, fame'e khöra; ba ube'e okhötami, ya'odo, Yehowa andre!
9 Ba ifa'ema da'ö ba Ndraono Gizeraeli Moze. Ba lö lafondrondrongo khö Moze, ba wa'alangu dödöra andrö ba me no si manö wa'abe'e halöŵöra.
10 Ba humede Yehowa khö Moze, imane: 11 Ae ŵa'ö khö Wara'o andrö, razo Miserayi, yamufofanö Ndraono Gizeraeli, ya'aheta ba danönia.
12 Ba humede Moze khö Yehowa, imane: Me lö nifondrondrongo Ndraono Gizeraeli khögu, ba he moroi ifondrondrongo Fara'o? ba mendrua manö, me tenga si to'ölö ba wahuhuosa ndra'odo.[4]
13 Ba humede Yehowa khö ndra Moze A'aroni, ifatenge ira ba Ndraono Gizeraeli ba khö Wara'o, razo Miserayi, ba wangeheta Iraono Gizeraeli ba danö Miserayi.
II. Nga'ötö ndra Rubeno, Simeoni, Lewi. Mose ba A'aroni
edit14 Da'e zatua baomo, ira tuara:
Ono Rubeno andrö, si a'a ndraono Gizeraeli, ba Hanokhi ba Falu ba Heseroni ba kharimi; da'ö nga'ötö Rubeno.[5]
15 Ba ono Zimeoni, ba Yemueli ba Yamini ba Ohadi ba Yakhino ba Sohara, ba Saulo, ono ndrongania Dawa Gana'ana andrö; da'ö nga'ötö Zimeoni.
16 Ba töi nono Lewi ba nga'ötöra, ba Gereso ba Kahati ba Merari. Ba 137 fakhe wa'anau noso Lewi.[6]
17 Ono Gereso andrö, ba Libini ba Simei, ba nga'ötöra.
18 Ba ono Gahati, ba Ameramo ba Yeseari ba Heberona ba uzieli. Ba 133 fakhe wa'anau noso Gahati.
19 Ba ono Merari, ba Maheli ba Musi. Da'ö ma'uwu Lewi, ba nga'ötöra andrö.
20 Ba Ameramo andrö, ba ihalö Yokhebe, inania si akhi; ba mo'ono da'ö khönia, A'aroni ba Moze nononia. Ba 137 fakhe wa'anau noso Gameramo.[7]
21 Ba ono Yeseari andrö, ba Kora ba Nefegi ba Sikhiri.
22 Ba ono Guzieli, ba Mizaeli ba Elisafa ba Sitiri.
23 Ba A'aroni andrö, ba ihalö Gelizabe, ono Gaminadabi, talifusö Nahaso. Ba mo'ono da'ö khönia; ya'ia Nadabi ba Abihu ba Eleazari ba Itamaro.
24 Ba ono Gora andrö, ba Asiri ba Elikana ba Abiazafi; da'ö nga'ötö Gora andrö.
25 Ba Eleazari andrö ono Ga'aroni, ba ihalö nono Wutieli sambua; ba mo'ono da'ö khönia; ya'ia Wineha andrö. Da'ö wurugö nono Lewi, ba nga'ötöra andrö.[8]
26 Da'ö Ga'aroni andrö ba Moze andrö, ba niŵa'ö Yehowa: Miheta ba danö Miserayi ngahönö Ndraono Gizeraeli andrö.
27 Da'ö ira, sama'ema khö Wara'o, razo Miserayi, wa edöna laheta ba danö Miserayi Ndraono Gizeraeli — Mose ba A'aroni.
28 Ba me humede Yehowa khö Moze ba danö Miserayi, ba imane Yehowa khö Moze: 29 Fa'ema khö Wara'o, razo Miserayi, fefu hadia ia, niŵa'ögu khöu.
30 Ba imane Moze khö Yehowa: Ba si lö to'ölö ba wahuhuosa ndra'odo; he moroi ifondrondrongo khögu Fara'o?
Famotokhi ba gahe
editFabaliŵa lala
editOlayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö