Wb/nia/Moze II/38

I. Famazökhi naha wame'e sumange nitunu, awö wakake andrö khönia ba gala andrö, naha wanasa

1 Ba ifa'anö naha wame'e sumange nitunu andrö, bana geunia; 5 hela wa'anau ba 5 hela wa'ebolo, si öfa sagi, ba tölu hela wa'alaŵa. 2 Ba tandrunia, ba ba watalingania si öfa ibe'e, tobali si fadoro khönia dandrunia andrö, ba ifo'uli töla.

3 Ba ifazökhi wakake fefu, soguna ba naha wame'e sumange andrö, bowoa ba sundru-sundru ba figa ba garafu ba gali; fefu wakakenia, ba töla ibe'e.

4 Ba ifotarali naha wame'e sumange andrö, ni'o'u'ö, töla, tou lambe-lambenia, irugi dalu wa'alaŵania. 5 Ba öfa ifahele tumbo ni'ogaolo, nibe'e ba watalinga darali töla andrö, si öfa, ba nifatörö hea-hea. 6 Ba hea-hea andrö, ba bana ibe'e, ba ifo'uli töla. 7 Ba ifatörö ba dumbo no mege hea-hea andrö, fatambai naha wame'e sumange, ba wamahea, ya'ia. Fafa döladölania, tobali mo'arö, wamazökhinia ya'ia.

8 Ba ifazökhi gala andrö, töla, ba ahenia töla, sörömi ndra alawe, sangai-ngai halöŵö, si so halöŵö ba zinga mbawandruhö nose wama'ele'ö.

II. Folau olayama, awö gulambunia

9 Ba ifazökhi golayama tanö raya, ba da'ö ibe'e gulambu ba'a-ba'a golayama andrö tarafali bana, otu hela wa'anau, 10 ba 20 daru nahe, fabaya ahe töla, 20 — ba osö-osö ba daru nahe andrö ba tumbo ni'ogaolo andrö khönia, ba firö.

11 Ba tanö yöu, ba otu hela göi wa'anau [mba'a-ba'a], ba 20 daru nahe, fabaya ahe töla, 26 — ba osö-osö ba daru nahe andrö ba tumbo andrö khönia, ba firö.

12 Ba tanö ba gaekhula luo, ba 50 hela mba'a-ba'a ba fulu daru nahe, awö gahe, fulu; ba osö-osö ba daru nahe andrö ba tumbo andrö khönia, ba firö.

13 Ba tanö ba gatumbukha, ba 50 hela, 14 ba'a-ba'a si 15 hela ba zi tambai, ba tölu daru nahe, fabaya ahe, 15 ba si manö ba zi tambai: 15 hela mba'a-ba'a, ba tölu daru nahe, fabaya ahe; faoma fatambai mbawa göli ba golayama.

16 Fefu mba'a-ba'a golayama, fasui, ba tarafali bana, 17 ba ahe daru nahe andrö, ba töla, ba osö-osö, ba firö, ba uli högö, ba firö; ba fefu daru nahe ba golayama, ba nifotumbo firö.

18 Ba ba'a-ba'a mbawa göli ba golayama, ba no nifolau zanoso sola'a-la'a, ungu sowu waru-waru ba soyo ba kirimisi ba tarafali bana, 20 hela wa'anau ba 5 hela wa'alaŵa, fa'ebolonia, dali mba'a-ba'a golayama andrö.

19 Ba taru nahe andrö, si öfa, fabaya ahe si öfa, ba töla, ba osö-osö, ba firö, ba si manö guli högö, ba tumbo andrö khönia, ba firö. 20 Ba fefu daru-taru ba nose ba ba golayama, fasui, ba töla.

III. Fa'ebua mbobotolö andrö

21 Ba da'e wangerai balazo nose andrö, ose zura goroisa, niŵa'ö Moze fangerai, folau nono Lewi andrö, högö Gitamari, ono Ga'aroni, ere andrö.

22 Ba Besale'eli andrö, ono Guri, ma'uwu Huri, mado Juda, zamazökhi fefu hadia ia, niŵa'ö Yehowa khö Moze, 23 ba awönia Goholiabi, ono Gahizamakhi, mado Dano, da'ö ziambu ba tuka geu, ba tuka wanoso ba sanoso sola'a-la'a, ungu sowu waru-waru ba soyo ba kirimisi ba tarafali.

24 Ba ana'a andrö fefu, ba wolau ya'ia, ba nifazökhi andrö fefu, ba wolau ni'amoni'ö andrö, ana'a nifalau, ame'ela ni'amoni'ö, ba no 77.408 balaki ba zaga ni'amoni'ö.

25 Ba firö nibe'e, ba wangofaya banua, ba 301.775 ba rufia, ba zaga ni'amoni'ö; 26 sasuku zamösa, dozi ni'ofaya andrö, si 20 fakhe ba si a'a moroi andrö, 603.550 ira. 27 Si 300.000 rufia fa'abua firö, ba la'oguna'ö ba wamahele ahe ni'amoni'ö andrö, fabaya ahe mba'a-ba'a andrö 300.000 ba rufia, ba gahe andrö si otu, 3000 zara ahe.

28 Ba si 1.775 fa'abua, ba i'oguna'ö ba wamazökhi osö-osö andrö ba daru nahe andrö, ba ifo'uli högö ba ifotumbo.

29 Ba töla andrö nifalau, ame'ela ni'amoni'ö, ba 212.400 rufia wa'abua.

30 Da'ö i'oguna'ö ba wamazökhi ahe mba'a-ba'a ba mbawandruhö nose wama'ele'ö, awö naha wame'e sumange andrö töla, fabaya taralinia andrö töla, awö fefu wakake ba naha wame'e sumange, 31 awö gahe mba'a-ba'a golayama, fasui, ba ahe mba'a-ba'a mbawa göli ba golayama, fabaya taru-taru andrö ba nose ba taru-taru ba golayama fefu, fasui.

Famotokhi ba gahe

Fabaliŵa lala

Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö