Wb/nia/Moze II/29

I. Amakhoita ba we'amoni'ö ere andrö

1 Ba ömane khöra we'amoni'ö ya'ira, ena'ö ere ira khögu: Halö zi matua nono zaŵi ba dua geu zi matua mbiri-biri, si lö sinegu, 2 ba roti si lö mu'aisöni, nifaruka fanikha ba kue bö'ö si lö mu'aisöni, nigule'ö fanikha; hamo gandru wamazökhi ya'ia fefu. 3 Ba öbe'e ba gambu-kambu, ba ohe, fabaya kambu-kambu, awö zaŵi andrö ba awö mbiri-biri andrö, si dua geu.

4 Ba A'aroni ba iraononia, ba ohe ba mbawandruhö nose ba femondri ira.

5 Ba halö nukha andrö ba fonukha Ga'aroni kameza ba baru sebua, daya-daya nono mbaru andrö, ba ono mbaru ba doto ba bola andrö, ba öböbö khönia mböbö nono mbaru andrö.

6 Bala högö andrö be'e ba högönia ba öfaböbö ba mbala högö detenia andrö ni'amoni'ö.

7 Ba öhalö wanikha famayoini andrö, ölau ba högönia, öbayoini ia.

8 Ba ö'ohe ba da'ö göi ndraononia ba öfonukha ira kameza. 9 Foböbö talu ira, he A'aroni ba he iraononia ba fokofia, ena'ö tetehe khöra wa'a'ere, gotö-götö wa'ara, huku si lö tebulö. Ba öfo'ösi danga ndra A'aroni iraononia.

10 Ba ö'ohe föna nose wama'ele'ö zaŵi andrö, ena'ö latufa högönia A'aroni ba ira ononia tangara.

11 Awena dania ötaba zaŵi föna Yehowa, ba zinga mbawandruhö nose wama'ele'ö, 12 ba halö ösa ndro zaŵi andrö, ba gule'ö ba dandru naha wame'e sumange turumö; ba do soya, ba duwagö ba danö, ba gahe nahe wame'e sumange.

13 Ba halö dawö fefu, balu-balu galakhaö ba si falemba ga gate, ba bua, si dombua, awö dawönia, ba tunu ba dete naha wame'e sumange. 14 Ba ösi zaŵi andrö ba ulinia ba tainia, ba baero golombaseŵa ötunu — sumange fameta horö ia.

15 Ba sageu öhalö biri-biri andrö, ena'ö latufa högönia A'aroni ba iraononia, tangara. 16 Awena dania ötaba mbiri-biri andrö ba öhalö ndro ba öbe'e fanefe naha wame'e sumange, fasui. 17 Ba biri-biri andrö, ba ötatawi, sasai mbetu'ania ba ahenia, ba orudugö ba nösinia bö'ö ba ba högönia.

18 Ba tunu mbiri-biri andrö ma'asageu ba dete naha wame'e sumange — sumange nitunu ia, sumange Yehowa, samohua, sumange ba galitö, nibe'e khö Yehowa.

19 Ba öhalö mbiri-biri si sageu, ena'ö latufa högönia A'aroni ba iraononia, tangara; 20 ba taba mbiri-biri andrö ba halö ösa ndronia ba gule'ö ba mbörö dalinga Ga'aroni, ba gambölö, ba ba mbörö dalinga ndraononia ba gambölö ba ba duturura sebua ba dangara kambölö ba ba duturu kahe sebua ba gambölöra, ba do soya, ba be'e fanefe naha wame'e sumange, fasui. 21 Ba öhalö ndro andrö ma'ifu, ba naha wame'e sumange, awö wanikha famayoini andrö, ma'ifu, ba ötefe Ga'aroni ba nukhania, ba iraononia ba nukhara, ena'ö ni'amoni'ö ia, awö nukhania, ba he iraononia, awö nukhara.

22 Ba halö dawö mbiri-biri andrö ba i'onia sotawö andrö, fabaya tawö balu-balu galakhaö, ba si falemba ba gate ba bua, si dombua, awö dawönia ba faha ba gambölö — biri-biri famataro ia — 23 ba sambua roti ba sagörö kue nifaruka fanikha ba sagörö kue bö'ö ba gambu-kambu andrö, nibe'e si lö mu'aisöni andrö, si so föna Yehowa. 24 Ba öbe'e ba danga Ga'aroni ba ba danga ndraononia da'ö fefu, ba öhahae nihahae khö Yehowa.

25 Ba öfuli öhalö ba dangara ba ötunu ba dete naha wame'e sumange, awö zumange nitunu andrö, samohua khö Yehowa: sumange ba galitö ia, nibe'e khö Yehowa. 26 Ba öhalö nosu mbiri-biri famataro Ga'aroni andrö ba öhahae nihahae khö Yehowa, ba urakhau dania ia. 27 Ba ni'amoni'ö öŵa'ö nosu andrö, nihahae, ba faha andrö fegero, nihalö mege fegero, faha mbiri-biri famataro Ga'aroni ba iraononia.

II. Urakha gere ba zumange andrö

28 Urakha ndra A'aroni iraononia da'ö, nifakhoi ba Ndraono Gizeraeli, si lö mamalö-malö; sumange nihalö fegero ia, ba sumange nihalö fegero labe'e ia Iraono Gizeraeli, föfö zumange fangorifi andrö khöra, sumange nihalö fegero khöra, nibe'e khö Yehowa.

29 Ba nukha ni'amoni'ö andrö khö Ga'aroni, ba möi ba nononia na furi ena'ö la'onukha na tebayoini ira ba na tefo'ösi dangara. 30 Fitu ngaluo wa'ara i'onukha ononia andrö si tobali ere fangalinia, si möi-möi ba nose wama'ele'ö andrö, ba wangai halöŵö andrö ba ni'amoni'ö.

31 Ba biri-biri famataro andrö, ba öhalö, ba ba naha ni'amoni'ö örino nösinia. 32 Ba A'aroni ba iraononia zi manga nösi mbiri-biri andrö, awö roti andrö, ba gambu-kambu, ba zinga mbawandruhö nose wama'ele'ö la'a. 33 Fameta horö andrö, me lafo'ösi dangara, me la'amoni'ö ira, da'ö la'a; lö töla i'a niha bö'ö, me no ni'amoni'ö.

34 Ba na so zi tosai, irege mahemolu mbanua, ösi mbiri-biri famataro andrö, ba ma roti andrö, ba ötunu zi tosai andrö: lö tola la'a niha, me no ni'amoni'ö.

35 Si manö wolaumö khö Ga'aroni ba ba ndraononia, ö'o'ö sibai niŵa'ögu khöu: fitu bongi wa'ara öfo'ösi dangara.

III. Amakhoita ba zumange sero ma'ökhö

36 Ba ö'erogö ma'ökhö wangasogö si matua nono zaŵi, sumange fameta horö, ba wangefa'ö horö andrö, ba öheta zala ba naha wame'e sumange, na ölau wangefa horö andrö ba khönia, ba öbayoini ia, ba we'amoni'ö ya'ia.

37 Fitu bongi wa'ara ölau wangefa horö andrö ba naha wame'e sumange, ba we'amoni'ö ya'ia; ba tobali ni'amoni'ö sibai naha wame'e sumange andrö, ba dozi sombambaya naha wame'e sumange andrö, ba no ni'amoni'ö göi.

38 Ba da'ö nibe'eu ba naha wame'e sumange: Ero ma'ökhö ba dua rozi nono mbiri-biri, si döfi fa'ebua; si lö mamalö-malö da'ö.

39 Ono mbiri-biri si sara, ba na mahemolu mbanua öbe'e, ba si sara, ba na tanö owī. 40 Ba samba hinaoya hamo safusi, nifaruka fanikha mbua zai nitutu, samba kata; ba sumange nibadu, samba kata agu, nifao ba nono mbiri-biri si sara.

41 Ba ono mbiri-biri si sara, ba tanö owi öbe'e — ba ba zumange ni'a ba ba zumange nibadu, ba si mane na mahemolu mbanua ölau, samohua omasiö, ö nifatörö ba galitö, nibe'e khö Yehowa, 42 sumange nitunu khömi, si lö mamalö-malö, götö-götö wa'ara, ba zinga mbawandruhö nose wama'ele'ö, föna Yehowa, ba ni'oroma'ögu ya'o khöu dania ba zi fahuhuodo khöu.

IV. Amabu'ula li Lowalangi

43 Ba ba da'ö u'oroma'ö ndra'odo ba Ndraono Gizeraeli, ba ni'amoni'ö dania ia, ba lakhömigu andrö. 44 Ba u'amoni'ö nose wama'ele'ö andrö, awö naha wame'e sumange; ba A'aroni göi ba iraononia, ba u'amoni'ö, ena'ö ere ira khögu.

45 Ba u'iagö ba hunö Ndraono Gizeraeli, ba Lowalangira ndra'odo; 46 ba ya'aboto ba dödöra, wa no ya'odo, Yehowa, Lowalangira, si no mangeheta ya'ira ba danö Miserayi, ba wangiagö khöra — ya'odo andre, Yehowa, Lowalangira.

Famotokhi ba gahe

Fabaliŵa lala

Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö