Wb/nia/Moze II/39

I. Fanagu nukha gere

1 Ba ungu sowu waru-waru ba soyo andrö ba kirimisi andrö, ba labali'ö nukha gere, si no maulu fanoso, nukha ba halöŵö ba ni'amoni'ö andrö; ba lafazökhi nukha ni'amoni'ö andrö khö Ga'aroni, la'o'ö niŵa'ö Yehowa khö Moze.

2 Ono mbaru ba doto andrö ifazökhi, böna ame ba ungu sowu waru-waru ba soyo ba kirimisi ba tarafali bana.

3 Laböbözi gana'a, la'anifi'ö, irege i'ila ikhoi, ibali'ö böna ame, ba wangorudugö da'ö ba ungu sowu waru-waru ba ba ungu soyo ba ba kirimisi ba ba darafali, nifolau duka wanoso.

4 Ba lafobalu-balu galisi, nifaböbö khönia; ba mbalönia si dua tefaböbö: 5 Ba böbö doto andrö khönia, ba wobaru ya'ia, ba no fadoro khönia, si manö göi wolau, böna ame ba ungu sowu waru-waru ba soyo ba kirimisi ba tarafali bana, si mane niŵa'ö Yehowa khö Moze. 6 Ba ifazökhi weremata una andrö, nifosinga kawa ana'a ba nisua, nifolau duka dandro, dali döi Ndraono Gizeraeli. 7 Ba ifakhai ba mbalu-balu galisi andrö ba nono mbaru ba doto, feremata famasugi ba dödö Yehowa Ndraono Gizeraeli, si mane niŵa'ö Yehowa khö Moze.

8 Ba ifazökhi mbola andrö, nifolau duka wanoso, si mane folau ono mbaru ba doto, böna ame ba ungu sowu waru-waru ba soyo ba kirimisi ba tarafali bana. 9 Si öfa sagi ia; dua winaeta labe'e mbola andrö, lalulalu'a wa'anau, nifodua winaeta. 10 Ba öfa ngenoli latagu khönia feremata: sambua weremata aki ba sambua weremata sabarazadi ba sambua weremata zumurudi nifa'oli ba ngenoli si sara.

11 Ba ba ngenoli fanete da'ö, ba sambua weremata manika ba sambua weremata nila ba sambua weremata ita. 12 Ba fanete da'ö, ba sambua weremata fusifaraga ba sambua mbatu siabu ba sambua weremata mariti. 13 Ba fanete da'ö, ba sambua weremata firusa ba sambua weremata una ba sambua weremata yasia; da'ö nitagu khönia, nifasui singa kawa ana'a nilalau.

14 Ba dali döi Ndraono Gizeraeli, wa 12 weremata; dali döira, sambu-sambua lasua yaŵa töi zi felendrua tua, nifolau duka dandro.

15 Awena laforaeŵe-raeŵe mbola andrö, ni'osinali, nitali, si ndruhu mbalaki, 16 ba lalalau rendra ana'a, dua, ba tumbo ni'ogaolo, dombua, ba ba watalinga mbola andrö, si dombua lafakhai dumbo andrö.

17 Ba ba dumbo andrö si dombua, ba watalinga mbola, si dombua lafakhai raeŵe-raeŵe andrö, si dua rozi. 18 Ba balö raeŵe-raeŵe andrö, si dua ba ba rendra nilalau andrö, si dua, lafakhai, ba da'ö nifakhai ba mbalu-balu galisi andrö, si dua görö, ba nono mbaru ba doto, tanö fönania.

19 Ba dombua lafazökhi tumbo ni'ogaolo ana'a, nifakhai ba watalinga mbola, si dombua, tanö barö, ba dagu-tagunia, tanö ba nono mbaru. 20 Ba dombua zui lafazökhi tumbo ni'ogaolo nifakhai ba mbalu-balu galisi andrö ba nono mbaru, ba wondrege tou, tanö föna, ba zi fahalö ia, yaŵa mböbö doto ba nono mbaru.

21 Awena lafakhai ba dumbo nono mbaru mbola andrö ba tumbonia sinali ungu sowu waru-waru wamakhai — tobali yaŵa mböbö doto ba nono mbaru si lö liŵa-liŵa, si mane niŵa'ö Yehowa khö Moze.

22 Ba ifazökhi mbaru sebua andrö, awö nono mbaru no mege, nisoso, ungu sowu waru-waru, ma'asagörö.

23 Ba lala högö ba mbaru sebua andrö, ba si mane lala högö ba göröba, nifasui tagu-tagu, fa böi atika. 24 Ba tagu-tagu ba gahe mbaru sebua andrö, ba lafobua dalimo, ungu sowu waru-waru ba soyo ba kirimisi ba tarafali bana, 25 ba lafazökhi riti-riti, si ndruhu mbalaki, ba lafasolisi ba ni'obua dalimo andrö riti-riti andrö, lafasui gahe mbaru sebua andrö, ba gota'otalua ni'obua dalimo no mege, 26 tobali sambu-sambua riti-riti ba sambu-sambua ni'obua dalimo, si fazoli-zoli ba gahe mbaru sebua andrö, ba wangai halöŵö andrö, si mane niŵa'ö Yehowa khö Moze.

27 Ba lafazökhi gameza andrö, tarafali, khö Ga'aroni ba ba nononia, nisoso, 28 awö mbala högö andrö, tarafali, ba kofia famoadu andrö, tarafali, ba saraeŵa andrö, tarafali bana, 29 awö mböbö talu andrö, tarafali bana ba ungu sowu waru-waru ba soyo ba kirimisi, nifolau zanoso sola'a-la'a, si mane niŵa'ö Yehowa khö Moze.

30 Ba lafazökhi dete mbala högö andrö, diadema ni'amoni'ö, si ndruhu mbalaki, ba lasua yaŵa, nifolau zogao tandro: "Ni'amoni'ö khö Yehowa". 3 Ba lafosinali ungu sowu waru-waru, ba wamöbögö ya'ia ba dete mbala högö, si mane niŵa'ö Yehowa khö Moze.

II. Te'erai fefu nilau ba wamosumange Lowalangi

32 Si manö wangasiwai halöŵö andrö fefu ba nahia ose wama'ele'ö andrö; la'o'ö sibai Iraono Gizeraeli niŵa'ö Yehowa khö Moze — si manö wolaura.

33 Ba la'ohe khö Moze nahia andrö, ose andrö, awö wakake khönia fefu, famakhainia andrö ba fafa ba lazi ba taru nahe, fabaya ahe, ba balu-balu zagö andrö, 34 uli mbiri-biri si matua, nilau soyo ba balu-balu uli guaza mina ba ba'a-ba'a andrö, 35 ba tawöla zura goroisa, fabaya hea-heania ba lagönia, ba meza andrö, 36 awö wakake andrö khönia fefu, awö roti nifaigi-faigi, 37 awö naha wandru andrö, si ndruhu mbalaki, fabaya fandru andrö, nifa'oli khönia, ba fakake khönia, fefu, ba fanikha ba wandru andrö, 38 awö naha wame'e sumange andrö, ana'a, ba fanikha famayoini ba hadia nitunu, samohua, ba'a-ba'a andrö ba mbawandruhö nose, 39 ba naha wame'e sumange andrö, töla, ba tarali andrö khönia, töla, ba hea-heania ba fakake andrö khönia, fefu, ba gala andrö fabaya ahenia.

40 Ba ba'a-ba'a golayama andrö ba taru nahe khönia, fabaya ahe, ba ba'a-ba'a ba mbawa göli ba golayama ba sinalinia ba taru-taru, ba fakake andrö fefu ba halöŵö andrö ba nahia ose wama'ele'ö andrö. 41 Awö nukha andrö, si no maulu fanoso, ba halöŵö ba ni'amoni'ö andrö, nukha ni'amoni'ö andrö khö Ga'aroni ere andrö, awö nukha ba nononia, ba halöŵöra halöŵö gere.

42 La'o'ö sibai niŵa'ö Yehowa khö Moze Iraono Gizeraeli, wolau da'ö fefu.

43 Ba me i'ila Moze, awai sa'ae khöra halöŵö andrö fefu — si mane niŵa'ö Yehowa wolaura — ba ifahowu'ö ira Moze.

Famotokhi ba gahe

Fabaliŵa lala

Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö