Wb/nia/Moze III/7

I. Tohu-tohu gamakhoita ba zumange ogauta

1 Ba da'ö gamakhoita ba zumange ogauta andrö; ni'amoni'ö sibai ia.

2 Ba nitataba sumange nitunu andrö, ba da'ö göi lataba zumange ogauta, ba donia, ba fanefe naha wame'e sumange, fasui. 3 Ba tawönia fefu, ba nibe'e sumange: i'o sotawö andrö ba tawö wali'a ba bua si dombua, 4 fabaya tawönia ba ba rami lafoyo ba si faböbö ba gate; ba mbua i'etu'ö. 5 Ba itunu ere ba naha wame'e sumange sumange nibe'e khö Yehowa, nifatörö ba galitö; sumange ogauta ia.

6 Dozi motöi matua ba gere zi manga ya'ia; ba naha ni'amoni'ö te'a; ni'amoni'ö sibai ia.

7 Si mane ba zumange fameta horö, si manö göi ba zumange ogauta, fagölö-gölö: khö gere andrö, same'e ya'ia, fameta horö ia. 8 Ba khö gere andrö, same'e sumange nitunu andrö, ni'ohe niha, guli zumange nitunu andrö, nibe'enia. 9 Si manö göi zumange ni'a andrö, nibogö bawu, fefu, ba he nirino ba mbowoa, fefu, ba he nigore ba gali, ba khö gere, same'e ya'ia. 10 Ba fefu zumange ni'a, he nifaruka fanikha ba he sotufo ba ba ndraono Ga'aroni, faoma khöra.

II. Sumange fangandrö saoha gölö ba sumange fanuno ba sumange amabu'ula li

11 Ba da'ö gamakhoita ba zumange fangorifi, nibe'e khö Yehowa:

12 Na so zame'e ya'ia fangandrö saoha gölö, ba ifo'awö zumange fangandrö saoha gölö andrö kue nifaruka fanikha, si lö mu'aisöni ba kue sanifi, si lö mu'aisöni nigule'ö fanikha, ba hamo si sökhi, si no mufaruka — kue nilau fanikha ba wamazökhi — 13 Ba kue roti si lö mu'aisöni ifao ba zumange andrö khönia, lö lai zumange urifö, nibe'enia sumange fanuno, fangandrö saoha gölö. 14 Ba sagö-sagörö kue zambalö sumange ibe'e amaedola zumange fegero khö Yehowa; ba khö gere andrö, sanefe do zumange fangorifi andrö ia.

15 Ba ösi zumange fangorifi andrö fangandrö saoha gölö, ba na luo tebe'e zumange andrö te'a ia; lö tola lasaigö hadia ia irege mahemolu mbanua.

16 Ba na amabu'ula li mbörö zumange andrö, nibe'enia, ba ma na saoha gölö, ba na luo da'ö göi te'a, ba si tosai, ba hana na mahemolu ö la'a; 17 ba hadia zi tosai na ösi zumange, ba zi dua wongi, ba nitunu.

18 Ba na te'a na ba zi dua wongi nösi zumange fangorifi andrö, ba lö ibe'e ni'omasi'ö zame'e ya'ia andrö; lö'ö sa tebe'e hare, tobali sa amaedola no i'a zobou, ba si manga ya'ia, ba ifalu'igö khönia horö. 19 Ba he nagole si no fabaya ba zalakha, hadia ia, ba lö tola te'a, nitunu ia. Ba ba nagole [bö'ö], ba dozi si lö hadia ia salakha, ba tola la'a nagole.

20 Ba si manga nösi zumange fangorifi andrö nibe'e khö Yehowa, fatua so khönia zalakha, ba nihori da'ö ba niwara andrö. 21 Ba na so zi fabaya ba zalakha, hadia ia, he ba zalakha ba niha ba he ba zalakha urifö ba he ba zogoro ita, hadia ia, si ta'unö, ba na i'a [zui] nösi zumange fangorifi andrö, nibe'e khö Yehowa, ba nihori da'ö ba niwara andrö.

III. Fanenaŵa femanga daŵo ba do

22 Ba humede Yehowa khö Moze, imane:

23 Hede ba Ndraono Gizeraeli, ba ŵa'ö khöra: Lö tola mi'a hadia ia dawö zaŵi ba tawö mbiri-biri ba tawö nambi. 24 Tawö gurifö si mate ba he nisasawi, ba hana na la'oguna'ö ba ngawalö hadia ia, ba lö tola mi'a.

25 Dozi sa si manga dawö gurifö andrö, nibe'e sumange Yehowa, nifatörö ba galitö, ba nihori da'ö — si manga ya'ia — ba niwara andrö. 26 Ba lö'ö göi tola mi'a ndro, ba nahiami fefu, he do wofo, ba he do zi öfa ahe. 27 Dozi si manga ndro, ba nihori ba niwara.

IV. Urakha gere ba zumange andrö

28 Ba humede Yehowa khö Moze, imane:

29 Hede ba Ndraono Gizeraeli ba ŵa'ö khöra: Same'e khö Yehowa sumange fangorifi, ba ibe'e khö Yehowa ndrohu-ndrohu, ba zumange fangorifi andrö, ömönia khönia.

30 Ya'ia zolohe ngawua andrö, tana khö Yehowa, sumange nifatörö ba galitö: tawö ba osu yamu'ohe; osu andrö, ena'ö lahahae, nihahae föna Yehowa. 31 Ba tawö, ba itunu ere ba naha wa'me'e sumange, ba osu andrö, ba khö Ga'aroni ba ba ndraononia. 32 Ba faha kambölö ba zumange fangorifi andrö khömi, ba ba gere göi mibe'e, amaedola fegero.

33 Ono Ga'aroni andrö, same'e do zumange fangorifi andrö ba tawönia, zanema faha kambolö, tana khönia.

34 Osu andrö sa, nihahae andrö ba faha andrö nibe'e fegero, ba zumange fangorifi andrö, nibe'e Ndraono Gizeraeli, ba ya'o zi okhögö, ba ube'e khö Ga'aroni ere andrö, ba ba ndraononia, tana khöra, ömö Ndraono Gizeraeli, si lö mamalö-malö.

35 Da'ö dana khö Ga'aroni ba tana ba ndraononia, ba zumange Yehowa andrö, nifatörö ba galitö, na baŵa nifa'asonia ya'ira, ba wangai halöŵö gere khö Yehowa, 36 nihonogöi Yehowa khöra, me luo ibayoini ira, ame'ela Ndraono Gizeraeli, tana khö, ömöra si lö mamalö-malö, götö-götö wa'ara.

37 Da'ö gamakhoita ba zumange nitunu andrö ba ba zumange ni'a ba ba zumange fameta horö ba ba zumange ogauta ba ba zumange famataro ba ba zumange fangorifi, 38 niŵa'ö Yehowa khö Mose ba hili Zina'i, me iŵa'ö lala ba Ndraono Gizeraeli, ba wame'e sumange khö Yehowa, ba danö si mate Sina'i.

Famotokhi ba gahe

Fabaliŵa lala

Olayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö