I. Sonana si ra'iö ba ndra matua
edit1 Ba humede Yehowa khö ndra Moze A'aroni, imane:
2 Mihede ba Ndraono Gizeraeli, ba mimane khöra: Na so zi hulö zonana famatua, ba fonana si ra'i-ra'iö zi manö. 3 Ba da'ö wa'ara'iönia ba wonana andrö: he na mowöi wamatunia, ba he na no teduhu, fa lö alua nana — si ra'iö ia. 4 Fefu gaso, niföröni zi so sonana andrö, ba si ra'iö, ba fefu dadaoma nidadaoninia, ba si ra'iö. 5 Sombambaya kasonia, ba ibabago nukhania ba mondri, ba si ra'iö ia, irege bongi. 6 Ba si dadaoni dadaoma andrö, nidadaoni zi so sonana andrö, ba isasai nukhania ba mondri, ba si ra'iö ia, irege bongi. 7 Ba sombambaya ösi zi so sonana andrö, ba ibabago nukhania ba mondri, ba si ra'iö ia, irege bongi. 8 Ba na idiloi zi lö si ra'iö si so sonana andrö, ba ibabago nukhania da'ö ba mondri, ba si ra'iö ia, irege bongi. 9 Ba fefu sela, ba zi fakudo zi so sonana andrö, ba si ra'iö. 10 Ba sombambaya hadia ia dane-danenia, ba si ra'iö, irege bongi. Ba solohe misa, ba ibabago nukhania ba mondri, ba si ra'iö ia, irege bongi. 11 Ba dozi nibabaya zi so sonana andrö na lö nisasainia tangania, ba lababago nukhara ba mondri, ba si ra'iö, irege bongi. 12 Nahia tanö, nibabaya zi so sonana andrö, ba niboto, ba nahia eu, ba nisasai ba nidanö.
13 Ba na döhö zonana andrö khönia, ba i'erai mbongi, fitu bongi, i'otarai döhö khönia; ba awena dania ibabago nukhania ba mondri ba nidanö gumbu — ba aheta wa'ara'iönia.
14 Ba na no alua fitu bongi, ba ihalö wune, dombua, ba ma ono marafadi dombua, ba möi ia föna Yehowa, ba zinga mbawandruhö nose wama'ele'ö, ba ibe'e ba danga gere wofo andrö. 15 Ba i'asiwai ere: si sambua, ba sumange fameta horö, ba si sambua, ba sumange nitunu; ba si manö gere wamaigi khönia fameta zala khö Yehowa, ba zonana andrö khönia.
16 Na no ahele gula ba niha, ba ifemondri nösinia ma'asageu, ba si ra'iö ia, irege bongi. 17 Ba fefu nukha ba uli zaŵi, si göna ula andrö, ba nibabago, ba si ra'iö, irege bongi.
18 Ba na so zorudu ba ndra alawe ba na no ahele gula, ba faoma mondri ira, ba si ra'iö ira, irege bongi.
Sonana si ra'iö ba ndra alawe
edit19 Na afökhö dalu ndra alawe, landro, ba fitu bongi wa'ara ra'iö ia, ba dozi sombambaya ya'ia, ba si ra'iö, irege bongi. 20 Ba hadia niföröninia fefu, götö wa'ara'iönia, ba ra'iö, awö nidadaoninia fefu, ba ra'iö. 21 Ba dozi sombambaya kasonia, ba lababago nukhara ba mondri, ba si ra'iö, irege bongi. 22 Ba dozi sombambaya hadia ia nidadaoninia, ba lababago nukhara ba mondri, ba si ra'iö, irege bongi. 23 Ba sombambaya hadia ia zi so ba gasonia, ba ma ba dadaomania, ba ra'iö, irege bongi.
24 Ba na so zorudu khönia, ba na göna khönia zi rai'önia, ba fitu bongi wa'ara ra'iö ia ba fefu gaso, ba zi mörö ia, ba ra'iö.
25 Ba na ara wa'afökhö dalu ndra alawe, na tenga baŵa landro khönia, ba na mendro, sanalu'i baŵa landro khönia, ba si ra'iö ia, götö wa'ara wendro andrö khönia, si mane na baŵa zatulö landro khönia, si ra'iö ia.[1] 26 Fefu gaso niföröninia, götö wendro andrö khönia ba si mane kasonia, na satulö landro khönia, iŵa'ö, ba fefu dadaoma, nidadaoninia, ba ra'iö, si mane fa'ara'iönia na satulö landro khönia. 27 Sombambaya da'ö no mege, ba ra'iö; ibabago nukhania ba mondri, ba dörö-dörö ra'iö, irege bongi.
28 Ba na no döhö khönia wendro andrö, ba yamu'erai mbongi, fitu bongi: ba awai wa'ara'iönia laŵa'ö. 29 Ba na no alua fitu bongi, ba yamuhalö wune, dombua, ba ma ono marafadi, dombua, ba i'ohe khö gere ba zinga mbawandruhö nose wama'ele'ö. 30 Ba yamu'asiwai ere: si sambua, ba sumange fameta horö, ba si sambua, ba sumange nitunu; ifaigi khönia wameta zala khö Yehowa ere, ba zi manö, ba wendronia andrö, si ra'iö.
31 Si manö wanenaŵamö Iraono Gizeraeli, ba wa'ara'iö andrö khöra, fa böi mate ira börö wa'ara'i'öra andrö, na lata'unöi nahiagu andrö, ba khöra.
32 Da'ö nihonogöi ba zi so sonana ba ba zahele ula, fa ra'iö ia ba da'ö, 33 ba ba zolandro satulö, ba ba zi so si hulö zonana, he ira matua, ba he ira alawe, ba ba zorudu ba zi no ra'iö.
Famotokhi ba gahe
edit- ↑ Mat 9:20
Fabaliŵa lala
editOlayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö