I. Saliŵa-liŵa ba danö si tola la'a ba salakha
edit1 Ba humede Yehowa khö ndra Moze A'aroni,[1] iŵa'ö li khöra, imane: 2 Mimane ba Ndraono Gizeraeli:
Da'ö zaliŵa-liŵa ba danö, si tola mi'a, fefu, si öfa ahe ba guli danö.[2]
3 Fefu zi öfa ahe ba si no fabali sa'a, si no alua fabali, ba samomendrua fonganga göra ba tola mi'a. 4 Ba ba zamomendrua fonganga göra ba ba zi no fabali sa'a, ba da'ö zi lö tola mi'a: ondra andrö; ifomendrua sa wonganga gönia, ba tenga si no alua fabali sa'a — salakha ia miŵa'ö. 5 Ba kelindri; ifomendrua sa wonganga gönia, ba tenga si no fabali sa'a, ba salakha ia miŵa'ö. 6 Ba kawelu, ifomendrua wonganga gönia, ba tenga si no fabali sa'a: ba salakha ia miŵa'ö. 7 Ba bawi; noa sa salua fabali sa'ania, ba tenga samomendrua fonganga gönia; salakha ia miŵa'ö. 8 Lö tola mi'a nösira ba lö tola mibabaya gamatela; salakha ira miŵa'ö.
9 Ba da'ö zi töla mi'a, saliŵa-liŵa ba nidanö, fefu:
fefu zaliŵa-liŵa ba nidanö, he ba nasi, ba he ba nidanö, sofere-fere ba sohuna-huna, ba tola mi'a. 10 Ba fefu zi so ba nasi ba ba nidanö, si lö fere-fere ba si lö huna-huna, ba zaliŵa-liŵa ba nidanö, fefu, ba ba zi so noso, si so ba nidanö, ba sogoro ami da'ö. 11 Sogoro ami ira: ösira, ba lö tola mi'a, ba amatelara, ba mi'ogorofi. 12 Fefu zaliŵa-liŵa ba nidanö, si lö fere-fere, ba si lö huna-huna, ba sogoro ami.
13 Ba ba wofo, ba da'ö ni'ogorofimi — tebai ni'a, ni'ogorofi: moyo ba fofo basi ba moyo nasi.
14 Ba razo wali, awö ngawalö ala-ala, 15 awö ngawalö gaga fefu. 16 Ba fofo ondra, ba katawaena ba samari, awö ngawalö wötö. 17 Ba tugöu ba belibi ba lamuhu, 18 ba meu ba engangi ba banga. 19 Ba laki-laki,[3] awö ngawalö mbangau, ba meragai ba bögi.
20 Fefu zaliŵa-liŵa side-ide, si so afi ba si öfa ahe, ba sogoro ami. 21 Fefu zaliŵa-liŵa side-ide, si so afi ba si öfa ahe, ba ha da'ö zi tola mi'a, si dua faha, yaŵa gahera, ba wanoka ba danö. 22 Ba da'ö ba tola mi'a ngawalö damo andrö, ya'ia ngawalö damo solama, awö ngawalö damo hara goli, awö ngawalö damo hagabi. 23 Ba bö'önia, saliŵa-liŵa side-ide, si so afi, ba si öfa ahe, ba sogoro ami.
24 Tobali si ra'i-ra'iö da'ö mibe'e; dozi sombambaya amatela, ba si ra'iö, irege bongi.[4] 25 Ba ha niha zolohe amatela, zambua, ba lö tola lö ibabago nukhania, ba si ra'iö ia, irege bongi — 26 ba zaliŵa-liŵa ba danö, fefu, si no fabali sa'a, si lö alua fabali, ba si tenga samomendrua fonganga gönia. Salakha ira miŵa'ö, dozi sombambaya ya'ira ba ra'iö. 27 Ba fefu göi zosa'a, sa'a mao, ba zaliŵa-liŵa ba danö, si öfa ahe, ba salakha miŵa'ö; dozi sombambaya amatela, ba ra'iö, irege bongi. 28 Ba solohe amatela, ba lö tola lö ibabago nukhania, ba ra'iö ia, irege bongi — salakha ira miŵa'ö.
II. Amatela ba kuö-kuö
edit29 Ba da'ö zalakha, miŵa'ö, ba zaliŵa-liŵa ba danö side-ide: bituru ba te'u ba bayakomo, hadia ngawalö. 30 Ba anaka ba koakhi ba leta'a ba khometi ba loa.
31 Da'ö ira zalakha, miŵa'ö, ba zaliŵa-liŵa ba danö side-ide; dozi sombambaya, na no mate, ba ra'iö irege bongi.
32 Ba fefu hadia ia nilangö zi manö, ba wa'amate, ba ra'iö, he nahia eu fefu ba he nukha ba he uli ba he goni — fefu wakake, ni'oguna'ö. Ni'ungugö ba nidanö, ba lö tebulö wa'ata'unö irege bongi; awena ifuli sökhi. 33 Ba na aekhu ba nahia tanö zara, da'ö, ba ta'unö nösi ma'afefu, ba nirasa [nahia andrö]. 34 Fefu ngawalö gö, ni'aga-aga niha, ba ta'unö, na göna nidanö si manö; ba si manö göi nibadu hadia ia, nibadu-badu niha, gofu hadia ia nahia, ba ta'unö [ba zi manö]. 35 Ba fefu hadia ia, nilangö gamatela zi manö, ba ta'unö: bowoa roti ba nirasa ba awu, ba nidudugö. Si ta'unö ia ba si ta'unö miŵa'ö. 36 Ha umbu ba ba'a, ö idanö, ba tenga si ta'unö; ba ha niha zombambaya amatela bakha, ba ra'iö. 37 Ba na göna ba mbua zinanö hadia ia, tanömö, gamatela zi manö, ba tenga si ta'unö da'ö. 38 Ba na no muwuwui idanö danömö zinanö andrö, ba ilangö dania amatela zi manö, ba si ta'unö ia miŵa'ö.
39 Ba na mate zaliŵa-liŵa ba danö andrö, si tola mi'a, ba na so zombambaya amatelania, ba ra'iö ia, irege bongi. 40 Ba na so zi manga gamatela andrö, ba ibabago nukhania, ba ra'iö ia, irege bongi; ba solohe amatela, ba ibabago nukhania, ba ra'iö ia, irege bongi.
41 Fefu zaliŵa-liŵa ba danö, side-ide, ba sogoro ami, miŵa'ö, ba lö tola te'a. 42 Fefu zi'anana'ö talu ba fefu zi öfa ahe, fabaya fefu, soya ahe, moroi andrö, ba zaliŵa-liŵa ba danö, side-ide andrö, ba lö tola mi'a, sogoro ami sa ira miŵa'ö. 43 Böi mibali'ö sogoro niha ami ba guö-kuö andrö, hadia ia, ba böi mita'unöi ami ba da'ö, fa ra'iö ami ba da'ö. 44 Me no Yehowa ndra'o, Lowalangimi; ba mi'amoni'ö ami; yani'amoni'ö ami, me no ni'amoni'ö ndra'odo. Ba böi mita'unöi ami ba zaliŵa-liŵa ba danö andrö, side-ide, soliha-liha ba guli danö.[5] 45 Me no Yehowa ndra'odo, si no mangeheta ya'ami ba danö Miserayi, ena'ö Lowalangimi ndra'o; andrö yani'amoni'ö ami, me no ni'amoni'ö ndra'odo.
46 Da'ö nihonogöi ba zi öfa ahe andrö ba ba wofo ba ba zonoso fefu, saliŵa-liŵa ba nidanö, ba ba zaliŵa-liŵa ba danö fefu, 47 ena'ö lafaehusi ira zalakha zi tenga salakha ba si tola te'a ba si lö tola te'a.
Famotokhi ba gahe
editFabaliŵa lala
editOlayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö