Amaedola zamazaewe tanömö edit
I. 1 Ba me aefa da'ö, ba itörö mbanua sebua, awö zide-ide, mangombakha ia, manuriagö turia mbanua Lowalangi andrö; ba awönia zi felendrua,[1] 2 ba ira alawe ösa, nifofanö bekhu si lö sökhi ba nifadöhö fökhö, Maria andrö, banua Magadala, ba zaheta bekhu andrö, si fitu,[2] 3 ba Yohana, fo'omo Khusa andrö, durutuli Herode ba Susana ba tanö bö'ö na, ato, sanolo ya'ira balazo.
4 Ba me ato zowulo niha,[3] ba me la'o'ö ia moroi ba mbanua misa, ba ilau khöra gamaedola, imane:
5 No möi zamazaewe tanömö, ba wamazaewe tanömö zinanö könia. Ba ba wamazaewenia, ba so zi göna ba lala, ba lahundra-hundra niha ba la'a fofo ba dalu mbanua. 6 Ba so zi göna ba dete gara, ba me motalinga, ba aleu, me no oköli-köli danö. 7 Ba so zi göna barö ndroi, ba molewiö göi ndroi, ba mate zinanö ibe'e. 8 Ba so zi göna ba danö si sökhi, ba motalinga ba i'owua zi dua wulu zamba yöu.
Me iŵa'ö da'ö, ba mu'ao ia, imane: Ha niha zi so tögi dalinga, ba wamondrongo, ba yamufondrondrongo!
9 Ba lasofu khönia nifahaönia, hadia geluaha gamaedola andrö.
10 Ba imane: Khömi no mube'e wa'aboto ba dödömi zi tobini andrö, lala mbanua Lowalangi andrö. Ba da danö bö'ö, ba ba gamaedola, ena'ö lö la'ila, he no anehe ira, ba ena'ö lö aboto ba dödöra, he no larongo.
11 Ba da'ö geluaha gamaedola no mege: Tanömö zinanö andrö, ba taroma li Lowalangi andrö.[4] 12 Ba si so ba lala, ba ya'ia na so zamondrongo, ba aefa da'ö, ba so Gafökha, ba iheta daroma li andrö ba dödöra, ena'ö lö mamati ira, ena'ö lö auri. 13 Ba si so ba dete gara, ba na larongo, ba labe'e ba dödöra, omuso dödöra, ba ya'ira, ba si lö ŵa'a, götö iada'e mamati ira, ba na baŵa wanandraigö, ba lafuli furi. 14 Ba si göna barö ndroi, ba ya'ia zi no mamondrongo, ba mofanö, ba mate, ba wa'abu dödö ba ba gana'a andrö, ba ba zomasi dödöra ba guli danö andre, ba lö fakhamö atua mbua.
15 Ba si so ba danö si sökhi, ba ya'ia zananö ba dödö taroma li andrö, nirongora, ba dödö si sökhi, satulö, ba mowua, anau gölöra. [5] 16 Lö samalugö fandru bowoa, na no itunu, ba lö same'e barö warate, ba naha wandru ibe'e, ena'ö la'ila hagania si möi yomo andrö.[6] 17 Lö'ö sa hadia ia zi tobini, si lö oroma dania, ba lö hadia ia nibalugö, si lö te'ila dania ba si lö to'ele dania.[7] 18 Ba mifaigi, he wisa wamondrongomi. Ha niha sa zi so, ba da'ö tebe'e, ba ha niha zi lö'ö, ba ba da'ö laheta göi zi no so khönia, niŵa'önia.[8]
La'ondrasi Yesu ira inania ba talifusönia edit
II. 19 Ba möi khönia ninania ba talifusönia, ba tebai falukha ira khönia, ba wa'ato niha.[9] 20 Ba te'ombakha'ö khönia: So tou ninau ba talifusöu, si möi mamaigi ya'ugö. 21 Ba itema li, imane khöra: Inagu ba talifusögu da'ö, samondrongo taroma li Lowalangi, ba solo'ö.
Itenaŵa mbade edit
III. 22 Ba ha samuza ma'ökhö,[10] ba möi ia baowo, awö nifahaönia, ba imane khöra: Tasaŵa si yefo.
Ba mangefa ira. 23 Ba me moloyo, ba mörö ia; ba ilabu bade ba mbaŵa, afönu nowo idanö, ba tosasa ira.
24 Ba möi ira khönia, lasusugi ia, lamane: He samahaö! he samahaö! tekiko ita! Ba maoso ia, itenaŵa nangi, awö ndrulu, ba tebato ba ahono.
25 Ba imane khöra: Heza so wamatimi? Ba ata'u ira ba ahöli-höli dödöra, faoma lamane khö nawöra: Ta'ila ha niha da'ö, wa ibe'e goroisa ba nangi göi ba ba ndrulu, ba la'o'ö khönia?
Ifofanö mbekhu edit
IV. 26 Ba lasaŵa danö Gadara, si fatahö Galilaia.[11] 27 Ba me no möi ia ba danö, ba ifaondragö ia niha, moroi yomo ba mbanua, si so bekhu, no ara sa'ae lö sonukha ia, ba tenga yomo so ia, no ba lewatö misa.
28 Ba me i'ila Yesu, ba mu'ao ia, itibo'ö tou ia fönania, i'ebua'ö linia, imane: Hadia niŵa'öu khögu, Yesu, Ono Lowalangi Fondrege Zalaŵa? U'andrö khöu, böi fakao ndra'o.
29 Me iŵa'ö ba mbekhu si ra'iö andrö, iheta ia ba niha andrö; noa sa asese idöni-döni, ba laböbö-böbö ia rate ba fesu gahe fangelama, ba i'etu-etu'ö wesu andrö, ba i'ohe ia bekhu andrö ba danö si mate. [12]
30 Ba isofu khönia Yesu, imane: Ha niha döiu? Ba imane: Liwu, me ato mbekhu, sanaŵa ya'ia.
31 Ba la'andrö khönia, ena'ö lö iŵa'ö khöra we'amöi ba gawuwukha.[13] 32 Ba so ba da'ö mbawi sambawa sebua, nikubaloi ba hili, ba la'andrö khönia, ena'ö itehe khöra lasaŵa da'ö; ba itehe khöra.
33 Ba laheta ira ba niha andrö bekhu andrö, lasaŵa mbawi. Ba latibo'ö ira ba nasi bawi andrö, si sambawa, moroi ba zanaere, ba alömö.
34 Ba me la'ila da'ö kubalo, ba moloi ira, la'ombakha'ö ba mbanua ba ba zi fahalama misa.
35 Ba möi ira baero, ba wamaigi hadia, ba la'ondrasi Yesu, ba la'ila niha no mege, ba zaheta bekhu andrö, no dumadao ia föna Yesu, no monukha, no döhö wa'owöhö, ba ata'u ira. 36 Ba si no anehe mege, ba la'ombakha'ö khöra he wisa wangorifi sobekhu andrö. 37 Ba la'andrö khönia, dozi niha andrö, si fasui Gadara, ena'ö iheta ia khöra, me no ihawui ira fa'ata'u sabölö-bölö.
Ba möi ia baowo, ifuli ia. [14]
38 Ba i'andrö khönia niha andrö, ba zaheta bekhu no mege, ena'ö tola möi ia awönia.
39 Ba ifofanö, imane: Fuli'ö khömi, ba dunö-dunö hadia nilau Lowalangi khöu.
Ba mofanö ia, itöröi mbanua andrö ma'asambua, wanuriagö hadia nilau Yesu khönia.
Ifadöhö wökhö ndra alawe sendro talu edit
V. 40 Ba me mangawuli Yesu, ba lafaondragö ia niha sato; dozi sa'ae labalo-baloi ia.[15]
41 Ba hiza niha, Ya'iro döi, satua zekola, ituhi danö föna Yesu, i'andrö khönia, ena'ö möi ia ba nomonia. 42 So khönia nono alawe, ha sambua, so mewelendrua fakhe wa'ebua, ba si onali mate da'ö. Ba me möi ia, ba lafadege ira khönia niha sato.
43 Ba so ndra alawe sendro talu, no mewelendrua fakhe wa'ara, no ahori gana'ania ba zame'e dalu-dalu, ba lö sangila mamadöhö fökhönia. 44 I'ondrasi Yesu moroi furi, ibabaya gahe mbarunia, ba i'anema'ö tebato ndro andrö khönia.
45 Ba imane Yesu: Ha niha zombambaya ya'o?
Ba me la'osilö'ögö fefu, ba lamane ira Fetero: Niha sato ladegeni ira khömö, samahaö, lalazi'ö.
46 Ba imane Yesu: So zi no mombambaya ya'o niha, no sa u'ila, so zaheta khögu fangabölö.[16]
47 Ba me i'ila ira alawe andrö, tebai tobini, ba möi ia, manizi-nizi ia, ituhi danö fönania, i'ombakha'ö, ba zi so niha fefu, hadia mbörö, wa no ibabaya, awö wa no i'anema'ö döhö wökhönia.
48 Ba imane khönia: Famatimö zangorifi ya'ugö, onogu alawe; fuli'ö, ya'ohahau dödöu.[17]
Isusugi nono Ya'iro edit
VI. 49 Ba me humede ia na, ba so genoni zatua zekola no mege, imane: No mate nonou, böi sa'ae fakao zamahaö andrö.
50 Ba me irongo Yesu, ba imane khönia: Böi ata'ufi, amati manö, ba auri ia dania. 51 Ba me no irugi nomo andrö, ba lö ifa'amöi yomo niha, awönia, ha Fetero ba Yohane ba Yakobo ba ama nono andrö no mege ba inania. [18]
52 Ba oi mege-ege ira, la'e'esi.
Ba imane: Böi mi'ege-ege; tenga si mate, si mörö. [19]
53 Ba la'igi-igi'ö ia, me no la'ila wa si no mate.
54 Ba ira'u danga, imane: He onogu, faoso! 55 Ba mangawuli nosonia, ba i'anema'ö maoso: ba iŵa'ö khöra Yesu, labe'e gönia.[20]
56 Ba tobali dödö ndra amania; ba iŵa'ö khöra, böi la'ombakha'ö da'ö, gofu ha ökhö.
Famotokhi ba gahe edit
- ↑ Faigi 4:43; 13:22
- ↑ Mar 15:40,41; 16:9
- ↑ Ayati 8:4-15: Mat 13:1-23; Mar 4:1-20
- ↑ FetI 1:23
- ↑ Faigi 11:28; HalZin 16:14
- ↑ Faigi 11:33; Mat 5:15
- ↑ Faigi 12:2
- ↑ Faigi 19:26; Mat 13:12
- ↑ Ayati 19-21: Mat 12:46-50; Mar 3:21,31-35
- ↑ Ayati 8:22-25; Mat 8:18,23-27; Mar 4:35-41
- ↑ Ayati 8:26-39; Mat 8:29-34; Mar 5:1-20
- ↑ Faigi 9:39,42
- ↑ Fam 20:3
- ↑ Mat 8:28 b.t.
- ↑ Ayati 40-56; Mat 9:18-26; Mar 5:21-43
- ↑ Faigi 6:19
- ↑ Faigi 7:50
- ↑ Mat 17:1
- ↑ Faigi 7:13; Yoh 11:11
- ↑ Yoh 11:44
Fabaliŵa lala edit
Olayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö