Wikimedia Incubator

Wb/nia/Luka/11

< Wb | nia | Luka
Wb > nia > Luka > 11

Famahaö ba wangandrö

edit

I. 1 Ba i'alui naha wangandrö ba mangandrö ia. Ba me no ibato, ba imane khönia nifahaönia, samösa: He Tua, fahaöga ba wangandrö, si mane famahaö Yohane nifahaönia göi, föna.[1]

2 Ba imane khöra: Na mangandrö ami, ba mimane: He Ama! Yate'amoni'ö döiu. Yatobali banuau fefu niha. 3 Si rugi öma, be'e khöma ero ma'ökhö, 4 Ba efa'ö khöma horöma; ya'aga sa göi, ma'efa'ö zala ba zi so sala khöma, fefu. Ba böi ohe ndra'aga ba wanandraigö.

Tefondrondrongo wangandrö

edit

II. 5 Ba imane khöra: Ha niha ba khömi, zi so si fahuwu khönia, na möi khönia, na talu mbongi, na imane khönia: He le, be'e nifalaligu roti ma'ifu, ha tölu uhalö, 6 noa sa möi khögu zi fahuwu khögu, i'otarai kumoli, ba lö hadia ia khögu, önia. 7 Hadia, iŵa'ö dania moroi si bakha: Böi busi dödögu, noa sa kumusi mbawandruhö, ba no mörö sa'ae ba ngaigu ndraonogu; tebai maoso ndra'o, ba wame'e khöu?

8 Uŵa'ö khömi, he lö'ö göi ibe'e khönia, lö maoso ia, me si fahuwu khönia, ba maoso sa ia, me iforege wangandrö, ba ibe'e khönia, ha wa'oya zoguna khönia.[2] 9 Ba uŵa'ö khömi:[3] Mi'angandrö, ba tebe'e khömi. Mi'angalui, ba misöndra. Mibokö-bökö mbawandruhö, ba tebokai khömi. 10 Dozi sa sangandrö, ba manema, ba sangalui, ba isöndra, ba khö zamökö-mökö bawandruhö, ba tebokai.

11 Ba ha niha ba khömi so'ono, same'e khö nononia kara, na i'andrö roti, ba ma same'e salahi gi'a ulö, na i'andrö gia? 12 ba ma same'e khönia tongo, na i'andrö gadulo manu? 13 Ba na ya'ami, si lö sökhi, mi'ila mibe'e game'ela si sökhi ba ndraonomi ba tenga mendrua manö ibe'e Ama moroi ba zorugo Geheha ni'amoni'ö ba zangandrö khönia?

Fangorifi sobekhu

edit

III. 14 Ba ifofanö mbekhu si lö hede.[4] Ba tobali, me no aheta mbekhu andrö, ba humede zi lö hede andrö. Ba ahöli-höli dödö niha sato.

15 Ba so ösa ba khöra zanguma'ö: Moroi ba zalaŵa mbekhu, Belesebu andrö, wa ifofanö mbekhu andrö. 16 Ba so zanandraigö ya'ia, la'andrö dandra khönia moroi si yaŵa ba mbanua.[5]

17 Ba i'ila gera-erara, ba imane khöra: Dozi öri, na no fabali dödö, ba adudu; ilangö nomo si sambua si sambua. 18 Ba na no fabali göi dödö Zatana, ba he moroi wa'aro mbanuania? me miŵa'ö, moroi khö Mbelesebu, wa ufofanö mbekhu andrö. 19 Ba na moroi khö Mbelesebu, wa ufofanö mbekhu andrö, ba he moroi, wa lafofanö iraonomi? Andrö ya'ira zanguhuku ya'ami dania. 20 Ba na moroi ba duru Lowalangi, wamofanögu bekhu, ba noa sa'ae i'ondrasi ami banua Lowalangi andrö. 21 Na manaro ba golayamania zabölö, si no mangarö, ba ahono zi so khönia. 22 Ba na so zabölö moroi khönia, na ilaŵa ia, ba ihalö wangönania, tötönafönia, sabölö andrö ba ifaosa nirabunia. 23 Ha niha zi lö fa'awö khögu, ba no si fa'udu khögu, ba ha niha zi lö mangozara, awögu, ba no samazaewe.[6] 24 Na iheta ia ba niha bekhu si ra'iö,[7] ba itöröi danö si lö idanö, magalui sahono ia, ba me lö isöndra, ba imane: Da'ufulido ba nomogu andrö, ba zi otarai ndra'o. 25 Ba na irugi, ba i'ila, no mubözini ba no muhaogö. 26 Ba möi ia, ihalö awönia mbekhu bö'ö, si lö sökhi moroi khönia, fitu, ba möi ira bakha, labali'ö omora da'ö no mege, ba tobali tedou walösökhi gamozua niha andrö, moroi ba mböröta. [8]

27 Ba me iŵa'ö da'ö, ba humede ndra alawe, samösa, ba niha sato, imane khönia: Ya'ahowu dalu andrö sanabina ya'ugö föna, awö meme andrö, nibadumö ösi.[9] 28 Ba imane: Ya'ia, ya'ahowu zamondrongo taroma li Lowalangi ba same'e ba dödö.[10]

Fanegu ndra farizaio

edit

IV. 29 Ba me ato zo hurufai ya'ia niha,[11] ba ibörötaigö, imane: Niha si lö sökhi niha andre. La'andrö dandra, ba lö labe'e khöra dandra, baero dandra Yona andrö. 30 Hulö si mane Yona andrö sa, me tobali tandra ia ba mbanua Niniwe andrö, si manö göi dania Nono Niha ba niha andre. 31 Maoso dania razo ira alawe, moroi raya no, na fanguhuku dania, ba zi so niha da'e, ba i'etu'ö hukura, me no i'otarai wondrege danö, ba wamondrondrongo fa'atua-tua Zelomo andrö, ba hiza, no töra moroi khö Zelomo zi so ba da'e. 32 Maoso dania mbanua Niniwe andrö, na fanguhuku dania, udu niha andre, ba la'etu'ö hukura, me no lafalalini gera-erara, ba wangombakha Yona andrö, ba hiza no töra moroi khö Yona zi so ba da'e. 33 Lö itunu wandru niha, ba ibe'e ba zi tobini, ma barö dumba yöu, ibe'e ba naha wandru yaŵa, ena'ö oroma hagania ba zi möi yomo.[12] 34 Fandru mboto höröu. Na atulö höröu, ba mohaga göi mbotou ma'asambua, ba na si lö sökhi, ba sogömi-gömi göi mbotou.[13] 35 Andrö faigi, fa böi ogömi-gömi haga andrö, si so ba dödöu. 36 Ba na mohaga mbotou andrö ma'asambua, na lö hadia ia ba khönia zogömi-gömi, ba mohaga manö fefu, hulö na si göna haga wandru ndra'ugö.

Fanegu ba wamini tödö

edit

V. 37 Ba me fahuhuo ia, ba i'andrö khönia farizaio, samösa, ena'ö möi ia manga ahulö khönia. Ba möi ia yomo, manga.[14] 38 Ba ahöli-höli dödö warizaio andrö, me i'ila, lö ihönagö mombanö Yesu, me awena manga.[15] 39 Ba imane khönia So'aya: Ya'ami, farizaio ma'ökhö, mihaogö gero mako ba ero wiga, ba tanö bakha khömi, ba oi afönu nirabu, awö walösökhi.[16] 40 He si lö tödö! tenga ha samösa zamazökhi ya'ia, he tanö baero ba he tanö bakha?[17] 41 Mibe'e manö ame'ela ba zi numana zi so yaŵa, ba hiza, a'oi sa'ae sökhi khömi. 42 Ba alai ami farizaio andrö, me mibe'e zambua ni'ofulu lönga ba höwa, awö ngawalö gule-gule fefu, ba lö ba dödömi huku ba fa'omasi Lowalangi andrö. Ni'o'ö ena'ö zi sambalö, ba tenga göi ni'ositengagö zi sambalö.[18] 43 Alai ami, farizaio, me no omasi ami tanö föna so ami ba zekola ba la'owai ami ba kade.[19] 44 Alai ami! me hulö lewatö si lö oroma ami, latörö niha, ba lö la'ila.[20]

45 Ba itema linia sangila amakhoita, samösa, imane khönia: He samahaö, ya'aga göi ö'o'aya, wanguma'ö da'ö.

46 Ba imane: Ya'ami göi, sangila amakhöita, alai ami, me mihare'ö ba niha noro, si lö lokha lö la'ohe, ba ya'ami, ba sara turumi lö mibabaya noro andrö.[21] 47 Alai ami, me mifazökhi dandra lewatö zama'ele'ö andrö, ba ira tuami föna zamunu.[22] 48 Ba tobali samaduhu'ö nilau ndra tuami ami, oroma wa no omasi ami nilaura, ya'ira sa zamunu, ba ya'ami zamazökhi tandra lewatö. 49 Andrö göi imane fa'atua-tua Lowalangi andrö:[23] Ufatenge dania khöra zama'ele'ö ba sinenge, ba labunu ösa ba lagohi; 50 ena'ö te'alui ndro zama'ele'ö andrö fefu, niduwagö, i'otarai mböröta danö, irugi niha andre, si sagötö; 51 i'otarai ndro Habeli, irugi ndro Zakharia andrö, nibunu ba gotaluara naha wame'e sumange gosali. Si ndruhu, uŵa'ö khömi, te'alui ia dania ba niha andre. 52 Alai ami, sangila amakhoita, me no mihalö wogoe wangila lala andrö; ya'ami, ba lö si möi bakha, ba sedöna möi bakha, ba no misaisi.[24] 53 Ba me mofanö ia ba da'ö, ba ibörötaigö abua sibai ba zangila amakhoita ba ba warizaio, ba lasekhegö ia, oya ngawalö lazofu-zofu. 54 Latarogö ia, ena'ö lasöndra hadia ia zi sala linia. [25]

Famotokhi ba gahe

edit
  1. ↑ Faigi 5:33
  2. ↑ Faigi 18:5
  3. ↑ Ayati 9–13: Mat 7:7–11
  4. ↑ Ayati 14–23: Mat 9:32–34; 12:22–30; Mar 3:22–30
  5. ↑ Mat 12:38
  6. ↑ Mar 9:40
  7. ↑ Ayati 24–26: Mat 12:43–45
  8. ↑ Yoh 5:14; Heb 6:4–6; 10:26 b.t.
  9. ↑ Faigi 1:28,48
  10. ↑ Mat 7:21
  11. ↑ Ayati 29-32: Mat 12:38-42
  12. ↑ Faigi 8:16
  13. ↑ Mat 6:22
  14. ↑ Luk 7:36
  15. ↑ Mat 15:2 b.t.; Mar 7:2 b.t.
  16. ↑ Mat 23:25; Tit 1:15
  17. ↑ Yes 58:7
  18. ↑ Mat 23:23; 12:7
  19. ↑ Mat 23:6; Mar 12:38 b.t.
  20. ↑ Mat 23:27
  21. ↑ Mat 23:4
  22. ↑ Mat 23:29 b.t.
  23. ↑ Ayati 49–51: Mat 23:34-36
  24. ↑ Mat 23:13
  25. ↑ Faigi 20:20; Yoh 8:6

Fabaliŵa lala

edit

Olayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Luka/11&oldid=6462281"