Wikimedia Incubator

Wb/nia/Luka/24

< Wb | nia | Luka
Wb > nia > Luka > 24

Femaoso Yesu

edit

I. 1 Ba me luo migu,[1] ba möi ira ba lewatö, ahulö sibai, la'ohe zamohua andrö, ni'asiwaira.

2 Ba la'ila, no mufagaölö gowe andrö, no aheta ba lewatö. 3 Ba me möi ira bakha, ba lö lasöndra mboto Yesu, So'aya. 4 Ba me la'abusi tödö da'ö, ba hiza niha, darua, no so ba ngaira, no mobaru safusi, sihaga.[2]

5 Ba me ata'u ira, ba me lafatugu ira, ba lamane khöra: Hadia wa mi'alui zauri ba zi mate? 6 Lö ya'ia ba da'e, noa sa maoso ia; mitörö-törö tödömi niŵa'önia khömi, me so ia ba Galilaia na, 7 me itörö linia Nono Niha andrö, wa lö tola lö tebe'e ia ba danga niha si so horö, awö wa niforöfa, ia, awö wemaosonia, na no irugi tölu ngaluo.[3]

8 Ba itörö tödöra niŵa'önia andrö.[4]

9 Ba lafuli ira, laröi lewatö, la'ombakha'ö da'ö fefu ba zi felezara andrö ba ba danö bö'ö fefu. 10 Ira Maria, banua Magadala andrö, ira, ba Yohane ba Maria, ina Yakobo ba awöra andrö, la'ombakha'ö da'ö ba zinenge andrö.[5]

11 Ba ba dödöra, ba hulö waya niŵa'öra andrö, ba lö faduhu dödöra khöra.

12 Ba maoso Wetero, isaŵa lewatö, fagohi, ba ifaöndrö ia, ba i'ila lembe muko andrö, no so tou, ha da'ö, ba ifuli ia khöra, ahöli-höli dödönia da'ö.[6]

I'oroma'ö ia khö darua nifaha'önia ba lala

edit

II. 13 Ba hiza, darua khöra me luo da'ö zi möi ba mbanua side-ide, mato dua za a matonga fofanö, i'otarai Yeruzalema, Ema'usa döi.[7] 14 Ba itörö lira da'ö no mege fefu.

15 Ba me fahuo-huo ira, me lafatunö, ba so Yesu, fao ia khöra ba lala.[8] 16 Ba tetaha höröra, fa lö la'ila wa ya'ia.

17 Ba imane khöra: Hadia huo-huo andrö khömi ba lala?

18 Ba lafatugu ira. Ba itema li si samösa, Kelofasi döinia, imane khönia: Hadia, ha ya'ugö ba dome andrö ba Yeruzalema, si lö mamondrongo da'ö, si bohou na.

19 Ba imane khöra: Hadia?

Ba lamane khönia: Da'ö, ba khö Yesu andrö, banua Nazareta, no sama'ele'ö ia, sabölö ba nilaunia ba ba huhuo, föna Lowalangi ba föna niha fefu.[9] 20 Awö wa no lafa'etu'ögö hukunia ere sebua khöma, awö zalaŵa, huku famunu, awö wa no laforöfa. 21 Ba ya'aga, ba mawai ya'ia zi möi mangorifi Iraono Gizeraeli.

Ba baero ö fefu, ba no irugi tölu ngaluo ma'ökhö, aefa da'ö.[10] 22 Ba no göi tobali dödöma labe'e ira alawe khöma ösa, si no möi ba lewatö, si hulö wongi. 23 Lö nisöndrara botonia, ba so ira, ba laŵa'ö, no la'ila gangilata, mala'ika, sanguma'ö no auri ia. 24 Ba no möi nawöma ösa, ba no la'ila, duhu niŵa'ö ndra alawe andrö, ba ya'ia ba lö ni'ilara.

25 Ba imane khöra: He ya'ami, sambö era-era, ba sareu tödö wamati fefu hadia ia niŵa'ö zama'ele'ö andrö! 26 Tenga lö tola lö itaögö da'ö Keriso andrö, ba möi ba lakhöminia? [11]

27 Ba i'otarai khö Moze ba ba zama'ele'ö andrö fefu, ibotokhi khöra ba zura andrö fefu hadia ia, ba khönia andrö.[12]

28 Ba ahatö sa'ae ira ba mbanua andrö, ba zi möi ira, ba hulö edöna italu'i laŵa'ö. 29 Ba la'andrö khönia, lamane: Iagö khöma, bongi, lö'ö sa'ae alaŵa yaŵa luo. Ba möi ia yomo, aŵora.

30 Ba me manga ira, ba ihalö göra roti, ifahowu'ö ba iboboto, ibe'e khöra.[13] 31 Ba teboka höröra, ba la'ila wa ya'ia; ba taya manö ia fönara.

32 Ba faoma lamane khö naŵora: Tenga no aukhu-aukhu bakha dödöda, me fahuhuo ia khöda ba lala, me ibotokhi khöda zi so ba zura?

33 Ba maoso ira, ba da'ö sibai, lafuli ira ba Yeruzalema, ba no owulo fönara zi felezara, awö zi fao-fao khöra andrö, ba lamane da'ö: 34 Si ndruhu, no maoso Zo'aya, ba no i'oroma'ö ia khö Zimoni.[14]

35 Ba ya'ira, ba ladunö-dunö, he wisa ba lala no mege, ba he wisa wangilara, wa ya'ia, ba wamoboto roti andrö.

I'oroma'ö ia khö ndra si felezara

edit

III. 36 Ba me lafatunö da'ö, ba so manö Yesu, ba hunöra bakha.[15] 37 Ba tobali dödöra ba ata'u ira, lawai bekhu ni'ilara [16]

38 Ba imane khöra: Hadia wa tokea ami, ba hana wa manufa dödömi? 39 Mifaigi dangagu ba ahegu, wa ya'odo; mibabaya ndra'o, ba mifaigi, ba mbekhu sa, ba lö nagole, ba lö töla, si mane ni'ilami khögu.[17]

40 Ba me iŵa'ö da'ö, ba i'oroma'ö khöra gahe ba tanga.[18]

41 Ba me lö faduhu dödöra na, ba wa'omuso dödö, ba me ahöli-höli dödöra, ba imane khöra: Hadia, so göda ma'ifu khömi ba da'e?

42 Ba labe'e khönia gi'a nisala ösa.

43 Ba ihalö, i'a fönara.

44 Ba imane khöra: Da'ö niŵa'ögu khömi, me sodo khömi na, wa lö tola lö itörö fefu zi so ba zura goroisa andrö khö Moze ba ba zura zama'ele'ö ba ba zura zinunö, ba khögu andre.[19] 45 Awena ibokai dödöra, fa aboto ba dödöra zi so ba zura.[20]

46 Ba imane khöra: Si manö ba zura, sanaögö famakao Keriso ba si maoso moroi ba ngai zi mate, na no irugi tölu ngaluo, 47 ba ni'o'mbakha'ö wamalalini era-era ba fangefa horö, ba döinia, ba niha fefu misa, nibörötaigö ba Yeruzalema.[21] 48 Ya'ami zi so ba mbörö ba da'ö. 49 Ba ufatenge ba khömi nifabu'u Namagu andrö; ba ya'ami, ba sahono ba mbanua, irege no te'abölö'ö ami fa'abölö andrö moroi si yaŵa.[22]

Fanahaenia

edit

IV. 50 Ba i'ohe ira baero, irugi tanö ba Mbetania andrö, ba ifazaŵa dangania, ifahowu'ö ira.

51 Ba barö wamahowu'önia ya'ira, ba aheta ia khöra.[23]

52 Ba lafuli ira ba Yeruzalema, omuso sibai dödöra.[24] 53 Ba lö tebulö ba gosali so ira, manuno Lowalangi.[25]

Famotokhi ba gahe

edit
  1. ↑ Ayati 1-11: Mat 28:1-8; Mar 16:1-11; Yoh 20:1-18
  2. ↑ HalZin 1:10
  3. ↑ Faigi 18:31 b.t.; Mat 17:22 b.t.
  4. ↑ Yoh 2:22
  5. ↑ Faigi 8:2,3
  6. ↑ Yoh 20:3,6
  7. ↑ Mar 16:12,13
  8. ↑ Mat 18:20
  9. ↑ Faigi 7:16,22; HalZin 2:22
  10. ↑ HalZin 1:6
  11. ↑ FetI 1:11; Heb 2:8 b.t.; Yes 50:5,6; 53:3 b.t.
  12. ↑ MozI 3:15; 22:18; 49:10; MozV 18:15; Sin 22; Yes 9:6; Dan 9:24
  13. ↑ Faigi 22:19
  14. ↑ KorI 15:5
  15. ↑ Mar 16:14; Yoh 20:19
  16. ↑ Mat 14:26
  17. ↑ YohI 1:1
  18. ↑ Yoh 20:20,25,27; Sin 22:17
  19. ↑ Mat 16:21; HalZin 2:25 b.t.
  20. ↑ HalZin 17:3
  21. ↑ Mat 24:14; HalZin 2:38; 13:38
  22. ↑ Yoh 14:26; 16:7; HalZin 1:4,8
  23. ↑ Mar 16:19; HalZin 1:9 b.t.; Yoh 20:17
  24. ↑ Yoh 5:23; 16:22
  25. ↑ HalZin 1:14

Fabaliŵa lala

edit

Olayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Luka/24&oldid=6458377"