Sakaio
editI. 1 Be möi ia miyomo ba Yerikho, itörö mbanua.[1]
2 Ba hiza niha, Sakaio döi, satua zanema beo, so'ana'a. 3 I'alui wamaigi Yesu, ha niha ia, ba tebai, ba wa'ato niha, me no side-ide niha ia.[2] 4 Ba itari-tari, fagohi, i'anöisi döla marafala, ena'ö i'ila, me lalania dania da'ö.
5 Ba me irugi da'ö Yesu, ba ifaöga hörönia, imane khönia: He Sakaio, ta'i-ta'i, ae tou, lö'ö sa tola lö möido yomo khöu, tomeu, ma'ökhö.
6 Ba i'alio'ö mitou, i'ohe yomo Yesu, omuso dödönia.[3]
7 Ba me la'ila da'ö, ba kumökö-kökö ira fefu, lamane: No möi ia tome niha sebua horö,[4]
8 Ba so Zakaio andrö, imane khö Zo'aya: Hiza, ube'e ba zi numana zi matonga zi so khögu, Tua, ba na so nilimogu niha, hadia ia, ba mendrua ufabali wamuli.[5]
9 Ba imane khönia Yesu: No falukha wangorifi zi samba omo andre ma'ökhö; ma'uwu Gaberahamo sa atö ia göi.[6] 10 Ba da'ö sa möi Nono Niha, ba wangalui si no elungu ba ba wangorifi ya'ia.[7]
Amaedola gana'a nibe'e nifalali
editII. 11 Ba me no larongo da'ö,[8] ba ilau na gamaedola, me no ahatö ia ba Yeruzalema, ba me lawai i'anema'ö to'ele mbanua Lowalangi andrö.[9]
12 Imane sa'ae: So zofanö, salaŵa, isaŵa danö saröu, ena'ö tobali tuhe nöri ia ba da'ö, ba mangawuli. 13 Ba humede ia ba zawuyunia, dafulu, ibe'e khöra zi fulu balaki, ba imane khöra: Milau ba waniaga, irege mangawulido.
14 Ba no fatiu dödö mbanuania khönia, ba lafatenge zinenge, solo'ö ya'ia, lamane: Lö edönaga salaŵama da'ö.[10]
15 Ba me mangawuli ia, me no tobali tuhe nöri ia si yefo, ba ifakaoni'ö zawuyunia andrö, nibe'enia ana'a andrö, ena'ö irongo, he lawisa wolau.
16 Ba so zi föföna, imane: He Tua, fulu balaki hare zi samba fondruyu andrö khöu. 17 Ba imane khönia: Lau, sawuyu si sökhi! Me lö si faröi ndra'ugö ba zi lö oya-oya, ba yaso barö mbawau zi fulu banua.
18 Ba so wanete da'ö, imane: Si sambua fondruyu andrö khöu, Tua, ba no mohare, lima balaki. 19 Ba imane göi ba da'ö: Ba ya'ugö göi, yaso barö mbawau zi lima banua.
20 Ba so zi samösa, imane: Ya'e zi sambua fondruyu khöu, Tua, no u'irö'ö ba zaefu tanga. 21 Noa sa ata'udo ndra'ugö, me no sabe'e huku ndra'ugö, me öhalö zi tenga nibe'eu, ba me öbasi zi tenga nitarumö.
22 Imane khönia: Moroi ba mbeweu uhuku ndra'ugö, sawuyu si lö sökhi. Hadia, no ö'ila sabe'e huku ndra'odo, mangaido si tenga nibe'egu, ba mamasido si tenga nitarugu?[11] 23 Ba hana wa lö öbe'e ba zamalali gana'agu andrö? Ba ya'o, na sodo, ba uhalö fabaya hare, ena'ö.
24 Ba imane ba zi so ba da'ö: Mihalö khönia zi samba fondruyu andrö, ba mibe'e ba zi so si fulu balaki.
25 Ba lamane khönia: He Tua, ba no fulu balaki khönia.
26 Uŵa'ö khömi, dozi ba zi no so, ba tebe'e, ba khö zi lö'ö, ba lahalö göi zi no so khönia.[12] 27 Ba si fatiu tödö andrö khögu, si lö edöna salaŵara ndra'odo, ba mi'ohe ba da'e, ba mibunu ira fönagu.
28 Ba me no iŵa'ö da'ö, ba mofanö ia, isaŵa misi yaŵa Yeruzalema.
Fe'amöi ba Yerusalema
editIII. 29 Ba me no ahatö ia ba Mbetifage[13] ba ba Mbetania ba gahe hili andrö, sotöi hili wanikha, ba ifatenge nifahaönia, darua, 30 imane: Mi'ae ba mbanua side-ide andrö, fönami, ba na mirugi yomo ba da'ö, ba mi'ila nono galide ni'amöhögö, si lö irai la'okudo niha; ba mitoto'ö wesu, ba mi'ohe ia. 31 Ba na so zanofu khömi: Hana wa mitoto'ö? ba mimane: Moguna khö Dua.[14]
32 Ba möi zinenge andrö, ba itörö niŵa'önia khöra. 33 Ba me latoto'ö wesu nono galide andrö, ba lamane khöra sokhö ya'ia: Hadia wa mitoto'ö wesu nono galide andrö? 34 Ba lamane: Moguna khö Dua.
35 Ba la'ohe khö Yesu, labe'e ba hulu nono galide andrö nukhara, ba lafakudo Yesu yaŵa.
36 Ba me mofanö ia, ba labologö nukhara ba lala. 37 Ba me arakha irugi zanue hili wanikha andrö, ba labörötaigö nifahaö fefu lasuno Lowalangi, omuso dödöra, la'ebua'ö lira, börö wa'abölö andrö fefu, ni'ilara lamane: 38 Ya'ahowu razo andrö, ba döi Zo'aya, fa'ohahau dödö ba zorugo ba sumange ba mbanua si yaŵa![15]
39 Ba so warizaio ösa, awö niha sato, ba lamane khönia: He samahaö, tenaŵa nifahaömö andrö.
40 Ba itema lira, imane: Uŵa'ö khömi, na lö'ö sa'ae hede-hede da'ö, ba mu'ao gara.
41 Ba me ahatö ia, me i'ila mbanua, ba me'e ia ba khönia, imane:[16] 42 Ena'ö na aboto ba dödöu göi, ba mbaŵamö andre, hadia wangohahau dödöu, ba iya'e, ba no tobini ia khöu! 43 Irugi sa dania baŵa khöu, ba lakölini ndra'ugö emaliu ba lafasui ndra'ugö, ba laforege, fasui manö.[17] 44 Ba larasa ndra'ugö, fabaya onou, awöu, ba lö tosai khöu zi dombua kara, si falaete, labe'e, börö wa lö saboto ba dödöu mbaŵa wamaigi ya'ugö andrö.[18]
Fangehao gosali
editIV. 45 Ba möi ia ba gosali,[19] ibörötaigö ifofanö baero zaniaga andrö, 46 imane khöra: No so ba zura: "Ba omo wangandrö dania nomogu andrö"; ba ya'ami, ba no mibali'ö tögi narö hili, naha zorabu.
47 Ba mamahaö ia ba gosali, ero ma'ökhö. Ba la'alui wamunu ya'ia ere sebua ba sangila amakhoita, ba si manö göi zalaŵa.[20] 48 Ba lö lasöndra lala. A'oi sa la'omasi'ö ia niha sato, wamondrongo linia.
Famotokhi ba gahe
edit- ↑ Faigi 18:35
- ↑ Yoh 12:21
- ↑ Yoh 1:12
- ↑ Faigi 15:2; Mat 9:11
- ↑ MozII 22:1,9; Hes 33:14,15
- ↑ Gal 3:7
- ↑ Faigi 15:4; Mat 18:11
- ↑ Ayati 11-28: Mat 25:14-30
- ↑ Faigi 17:20
- ↑ Yoh 1:11
- ↑ Mat 12:37
- ↑ Faigi 8:18
- ↑ Ayati 29-40: Mat 21:1-11; Mar 11:1-10; Yoh 12:1,12-19
- ↑ Faigi 22:11 b.t.
- ↑ Faigi 2:14
- ↑ Yoh 11:35
- ↑ Faigi 23:28 b.t.; MozV 28:52 b.t.; Yes 22:2,3; Yer 6:6; Sakh 14:2
- ↑ Faigi 21:6; Mat 24:2
- ↑ Ayati 45-46: Mat 21:12,13; Mar 11:15-18
- ↑ Mat 21:45,46
Fabaliŵa lala
editOlayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö