Amaedola zanguhuku si lö atulö
editI. 1 Ba ilau khöra gamaedola, ba wangoroma'ö wa lö tola lö fadoro wangandrö, wa böi atage, [1] 2 imane:
So me föna zanguhuku ba mbanua, lö i'ata'ufi Lowalangi, ba lö ba dödönia hadia niŵa'ö niha. 3 Ba so lakha mbanua ba mbanua andrö, ba möi da'ö khönia, imane: Tolodo ba zi fa'udu khögu andrö.[2]
4 Ba ara lö edöna ia. Ba dania, ba imane dödönia: He lö u'ata'ufi Lowalangi ba he lö ba dödögu hadia niŵa'ö niha, 5 ba edönado zui utolo lakha mbanua andrö, me ifakao ndra'o, fa böi afökhö högögu ibe'e, na lö ibato-bato we'amöi.
6 Ba imane So'aya: Mifondrondrongo, hadia niŵa'ö zanguhuku andrö, si lö atulö tödö. 7 Ba hadia, lö itolo Lowalangi nitutuyunia andrö, si'angaröfi li ya'ia bongi ma'ökhö; ba hadia arörö ia ba khöra?[3] 8 Uŵa'ö khömi, itolo ira, lö ara sibai. Ba na so Nono Niha, hadia falukha ia maö wamati ba guli danö?[4]
Farizaio sanema beo
editII. 9 Ba so ösa zanguma'ö tödöra satulö ira, abe'e dödöra ba khöra, ba la'ositengagö danö bö'ö, ba ilau göi gamaedola ba da'ö, imane:[5]
10 Darua zi möi miyaŵa ba gosali, niha, farizaio zi samösa ba sanema beo zi samösa.
11 So warizaio andrö, imane wangandrö: He Lowalangi, u'andrö saoha gölö khöu, me tenga si mane niha bö'ö ndra'odo, tenga si mane sorabu, ba tenga si mane sohorö, ba tenga göi si mane sanema beo andrö.[6] 12 Mendrua zi samigu mamoni ba gö ndra'o, ba ube'e zambua ni'ofulu zi so khögu fefu.[7]
13 Ba sanema beo andrö, ba no so ba zaröu, lö'ö göi edöna ia ifaöga hörönia miyaŵa ba zorugo, ibözi manö dötö'ania, imane: He Lowalangi, hakhösi tödö ndra'o, si no ebua horö.[8]
14 Uŵa'ö khömi, satulö da'ö, me mangawuli ia mitou ba nomonia, moroi ba zi samösa. Dozi sa, ha niha zangebua ya'ia, da'ö ni'ide-ide'ö, ba ha niha zangide-ide'ö ya'ia, da'ö nibe'e sebua.[9]
Famahowu'ö iraono
editIII. 15 Ba la'ohe göi khönia ndraono sawuyu,[10] ena'ö itufa ira tanga. Ba me la'ila da'ö nifahaö, ba lategu ira.
16 Ba humede khöra Yesu, imane: Mifa'amöi khögu ndraono, böi mitenaŵa; ba zi manö sa mbanua Lowalangi andrö.17 Si ndruhu niŵa'ögu khömi, si tenga hulö ndraono, wanema banua Lowalangi andrö, ba tebai manö möi ia bakha.
Ono matua sebua ana'a
editIV. 18 Ba isofu khönia salaŵa, imane:[11] He samahaö si sökhi, he uwisa, ena'ö usöndra wa'auri andrö, si lö aetu?
19 Ba imane khönia Yesu: Hana wa öŵa'ö, si sökhi ndra'o? Lö si sökhi, baero Lowalangi, si ha samösa. 20 Oroisa andrö, ba no ö'ila: böi ohorö, böi ange'e, böi anagö, böi böbögö zi lö duhu, fosumange namau, awö ninau.
21 Ba imane: No ahori u'o'ö da'ö, i'otarai iraono ndra'o.
22 Ba me irongo da'ö Yesu, ba imane khönia: Sambalö na zi lö'ö khöu. Tema amawa fefu hadia ia zi so khöu, ba faosa ba zi numana mbölinia, ba so khöu girö-girö ba zorugo, ba tabu o'ö ndra'o.
23 Ba me irongo da'ö, ba abu sibai dödönia; no sebua sibai ana'a ia.
24 Ba me inehegö ia Yesu,[12] ba imane: Afökhö sibai ba zo'ana'a, wogamö banua Lowalangi andrö. 25 Aoha na na i itörö dögi walölöŵa kudo, moroi möi ba mbanua Lowalangi andrö zo'ana'a.
26 Ba lamane samondrongo da'ö: Ba ha niha zanöndra fa'auri?
27 Ba imane: Si tebai ba niha, ba tola ba Lowalangi.
28 Ba imane Fetero: Hiza, ya'aga, ba no maröi manö zi so khöma, ba no ma'o'ö ndra'ugö.
29 Ba imane khöra: Si ndruhu niŵa'ögu khömi, samösa lö'ö, si no mondröi omo, ba ma soroiyomo, ba ma talifusö, ba ma ira amania, ba ma ono, na börö mbanua Lowalangi andrö, 30 si lö manema ya'ia mangawuli, oya winaeta ba götö da'e, ba fa'auri si lö aetu ba götö dania.
Fangombakha wamakao Yesu
editV. 31 Ba i'ohe awönia zi felendrua,[13] ba imane khöra: Hiza, möi ita misi yaŵa ba Yeruzalema, ba itörö dania fefu nisura zama'ele'ö andrö, ba khö Nono Niha. 32 Labe'e sa ia ba danga niha baero dania, ba la'o'aya ba la'osiwawöi ba ladidiloi, 33 ba na no labözi-bözi dania, ba labunu, ba tölu ngaluo, ba maoso ia, ifuli auri.
34 Ba ma'ifu lö aboto ba dödöra da'ö, si tobini khöra daroma li andrö ba lö la'ila hadia niŵa'ö. [14]
Famokai hörö zau'a
editVI. 35 Ba me no ahatö ia ba Yerikho,[15] ba so zidadao ba zinga lala, niha sau'a, mangandrö-ngandrö böli gönia. 36 Ba irongo niha sanörö, ba izofu-zofu hadia da'ö.
37 Ba la'ombakha'ö khönia, itörö Yesu, banua Nazareta andrö.
38 Ba mu'ao ia imane: He Yesu, ma'uwu Dawido, hakhösi tödö ndra'o!
39 Ba latenaŵa ia si so föna, ena'ö ibato.
Ba ihötöi fe'ao: He ma'uwu Dawido, hakhösi tödö ndra'o!
40 Ba ibadugö ia Yesu, iŵa'ö, la'ohe khönia. Ba me no ahatö ia, ba isofu khönia: 41 Hadia zomasi'ö, he uwisa khöu?
Ba imane: He Tua, ena'ö na ifuli u'ila niha.
42 Ba imane khönia Yesu; Yagö mu'ila zui niha! Noa i'orifi ndra'ugö famatimö andrö.
43 Ba i'anema'ö ifuli i'ila niha, ba i'o'ö, isuno Lowalangi. Ba lasuno Lowalangi niha fefu, sangila da'ö.
Famotokhi ba gahe
edit- ↑ Rom 12:12; Efes 6:18; Kol 4:2; TesI 1:5,17
- ↑ MozII 22:22 b.t.; Yes 1:17
- ↑ Sin 55:17,18
- ↑ Sin 145:18,19
- ↑ Faigi 16:15
- ↑ Yes 58:2 b.t.
- ↑ Faigi 11:42; Mat 9:14
- ↑ Eser 9:6
- ↑ Faigi 14:11
- ↑ Ayati 15-17: Mat 19:13-15; Mar 10:13-16
- ↑ Ayati 18-23: Mat 19:16-22; Mar 10:17-22
- ↑ Ayati 24-30: Mat 19:23-29; Mar 10:23-30
- ↑ Ayati 31-34: Mat 20:17-19; Mar 10:32-34
- ↑ Faigi 9:45; Mar 9:32
- ↑ Ayati 35-43: Mat 20:29-34; Mar 10:40-52
Fabaliŵa lala
editOlayama Zura Luka: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö