Wikimedia Incubator

Wb/nia/Yohane/6

< Wb | nia | Yohane
Wb > nia > Yohane > 6

Fame'e gö zi lima ngahönö

edit

I. 1 Aefa da'ö, ba mofanö Yesu, i'ötö mbaŵa Galilaia andrö, baŵa Diberia. 2 Ba ato zolo'ö ya'ia niha, me no la'ila dandra andrö, nifazökhinia ba zofökhö. 3 Ba möi ba hili Yesu, mudadao ia ba da'ö, awö ndra nifahaönia. 4 Ba no ahatö wasa, owasa niha Yehuda andrö.[1]

5 Ba ifaöga hörönia Yesu, ba i'ila, ato zi möi khönia niha, ba imane khö Wilifo: Heza ta'öli gö, ena'ö manga da'ö?[2]

6 Ba wanandraigö ya'ia iŵa'ö da'ö, noa sa i'ila, he iwisa dania.

7 Itema linia Filifo, imane: Lö irugi öra si otu rufia fowöli roti, he ha ma'ifu zamösa tebe'e.

8 Imane khönia nifahaönia samösa, Andrea, talifusö Zimoni Fetero andrö: 9 So ba da'e ndraono, si so roti gandru, lima, ba dua rozi gi'a. Ba ha wa'aröu da'ö ba zi manö fa ato?

10 Imane Yesu: Mifedadao niha.

Ba no abölö ndru'u ba naha andrö. Ba mudadao ndra matua, mato lima ngahönö ira.

11 Ba ihalö roti no mege Yesu, i'aohasi gölö Lowalangi, ba ibe'e ba zidadao andrö, si manö göi ba gi'a andrö, ha wa'oya zomasi ira.[3]

12 Ba me no abuso ira, ba imane ba nifahaönia; Mi'ozaragö gakhökhöla, si tosai, fa böi tefara'u hadia ia.

13 Ba la'ozaragö ba felendrua lafo'ösi kude, akhökhöla roti gandru andrö, si lima, si tosai ba zi no manga andrö.

14 Ba me la'ila niha dandra andrö, nifazökhinia, ba lamane: Si ndruhu, da'ö zama'ele'ö andrö, si möi ba guli danö.[4]

15 Ba me i'ila Yesu,[5] möi ira dania, lara'u ia, ba wamali'ö razo ya'ia ba ifuli iheta ia, isaŵa hili, ha ya'ia.[6]

Mowaö-waö Yesu ba dete nidanö

edit

II. 16 Ba me tanö owi, ba möi mitou ndra nifahaönia ba mbaŵa möi ira baowo, 17 la'ötö mbaŵa, lasaŵa Gafanauma; ba ikhamö ira fa'abongi, ba lö'ö na si möi khöra Yesu. 18 Modulu sibai mbaŵa, me angi sabe'e.

19 Ba me no töra saza woloyora, ba la'ila Yesu, sowaö-waö ba dete nidanö, no ahatö ia ba nowo, ba ata'u ira.

20 Ba imane khöra: Ya'odo, böi mi'ata'ufi!

21 Ba lafa'amöi ia baowo mena'ö, ba irugi si'aikö owo danö si möi ira.

Huhuo ba Gafanauma

edit

III. 22 Ba mahemolu ö, ba la'ila niha si so yefo mbaŵa lö owo bö'ö ba da'ö, baero zi sambua andrö, ba no la'ila, lö fao Yesu khö ndra nifahaönia, we'amöi baowo, ha nifahaönia zoloyo. 23 — So sa nowo bö'ö, si otarai Diberia, si möi ba zahatö ba naha andrö, ba ni'ara roti andrö me no mangandrö saoha gölö Zo'aya. — 24 Ba me la'ila niha, lö Yesu ba da'ö ba lö'ö göi ira nifahaönia, ba möi ira göi ba nowo andrö, lasaŵa Gafanauma, mangalui Yesu.

25 Ba me lasöndra ia, yefo mbaŵa, ba lamane khönia: He samahaö, ha mega örugi da'e?

26 Itema lira Yesu, imane: Si ndruhu-ndruhu niŵa'ögu khömi, tenga ba da'ö mi'alui ndra'o, me no mi'ila dandra; me no mi'a roti andrö, me no abuso ami, andrö mi'alui ndra'o. 27 Böi mi'a'asogö gö andrö sobou dania, ö si lö tebulö-bulö andrö, ba wa'auri si lö aetu, mi'asogö, nibe'e Nono Niha khömi; da'ö sa nifaduhu'ö Nama, Lowalangi.[7]

28 Ba lamane khönia: He mawisa ena'ö, ba wangai halöŵö andrö khö Lowalangi?

29 Itema lira Yesu, imane khöra: Da'ö halöŵö khö Lowalangi, na mamati ami khö nifatengenia andrö.[8]

30 Ba lamane khönia: Ba hadia dandra, nifazökhiu, ena'ö ma'ila, ba ena'ö mamati ndra'aga khöu? Hadia ni'asogömö?[9] 31 No la'a "mana" ira tuada, ba danö si mate; si mane ba zura: "No ibe'e öra roti moroi ba mbanua si yaŵa".[10]

32 Ba imane khöra Yesu: Si ndruhu-ndruhu niŵa'ögu khömi, tenga Moze zame'e khömi gö andrö, moroi ba mbanua si yaŵa, Amagu zame'e khömi gö si ndruhu andrö, moroi ba mbanua si yaŵa.[11] 33 Da'ö sa gö andrö, nibe'e Lowalangi, si möi mitou moroi ba mbanua si yaŵa, fangorifi nösi guli danö.

34 Ba lamane khönia: He Tua, böi bulö'ö wame'e khöma gö andrö.

35 Ba imane khöra Yesu: Ya'odo gö fangorifi, lö'ö sa'ae olofo zi möi khögu, ba lö'ö manö sa'ae owökhi dödö zamati khögu. 36 Ba uŵa'ö khömi, noa göi mi'ila ndra'odo, ba lö mamati ami. 37 Si möi khögu fefu nibe'e Namagu khögu, ba lö'ö manö utibo'ö zi möi khögu.[12] 38 Tenga ba wolau somasi ndra'o möido tou moroi ba zorugo, ba wolau somasi samatenge ya'o möido tou.[13] 39 Da'ö zomasi zamatenge ya'o, ena'ö lö si taya khögu ba nibe'enia khögu fefu, ena'ö na ususugi ia, na luo safuria andrö.[14] 40 Da'ö sa zomasi Namagu, ena'ö so wa'auri si lö aetu khö zangila Ono fefu, samati khönia, ba ya'o zanusugi ya'ira, na luo safuria andrö.[15]

41 Ba kumökö-kökö niha Yehuda khönia, me no iŵa'ö: ya'odo gö andrö, si no möi mitou moroi ba mbanua si yaŵa, ba lamane: 42 Tenga Yesu da'ö, ono Yosefo, ni'ilada ama ba ina? Ba hana wa iŵa'ö da'ö: Moroi ba mbanua si yaŵa u'otarai?[16]

43 Itema lira Yesu, imane khöra: Böi mikökö-kökö khö nawömi. 44 Lö sangila möi khögu, na tenga Amagu, samatenge ya'o, zondrönisi ya'ia; ba ya'o zanusugi ya'ia na luo safuria andrö.[17] 45 No so ba zura zama'ele'ö: "Nifahaö Lowalangi ira dania, fefu". Dozi möi khögu samondrongo khö Nama, sanöngöni.[18] 46 Tenga fa no i'ila Nama niha, baero zi otarai Lowalangi andrö, da'ö zi no mangila Lowalangi.[19] 47 Si ndruhu-ndruhu niŵa'ögu khömi, khö zamati so wa'auri si lö aetu.[20] 48 Ya'o roti fangorifi andrö. 49 No la'a "mana" ira tuami, ba danö si mate, ba no mate ira.[21] 50 Da'ö roti fangorifi, si otarai mbanua si yaŵa, ena'ö na i'a ia niha, ba lö mate ia. 51 Ya'o roti andrö, sauri, si otarai mbanua si yaŵa, na so zi manga roti andrö, ba auri ia, irugi zi lö aetu; ba roti andrö göi, nibe'egu dania, ösigu andre, ba no fangorifi nösi guli danö.[22]

52 Ba mowasoso niha Yehuda, lamane: He iwisa da'ö fa tola ibe'e ni'ada nösinia?

53 Ba imane khöra Yesu: Si ndruhu-ndruhu niŵa'ögu khömi, na lö mi'a nösi Nono Niha, na lö mibadu ndronia, ba lö fa'auri khömi, ba dödömi.[23] 54 Si manga nösigu, samadu dogu, da'ö zi so fa'auri si lö aetu, ba ya'o zanusugi ya'ia, na luo safuria andrö. 55 Ösigu sa zi ndruhu gö ba dogu zi ndruhu nibadu. 56 Lö aheta khögu zi manga nösigu, samadu dogu, ba lö aheta ndra'o khönia.[24] 57 Si mane famatenge Nama sauri andrö ya'o, awö wa no börö Nama, wa no sauri ndra'o, si manö göi zi manga ya'o, börö ndra'o, wa sauri ia.[25] 58 Da'ö roti andrö, si otarai mbanua si yaŵa; tenga si mane ira tuami, si manga ba mate: Si manga roti andrö, ba auri, irugi zi lö aetu.

59 Ba zekola iŵa'ö da'ö, me mamahaö ia, ba Gafanauma. 60 Ba ato nifahaönia, ba lamane, me larongo da'ö; Huhuo sabe'e da'ö, ha niha zanaha mamondrongo da'ö?

61 Ba me i'ila tödönia Yesu, kumökö-kökö nifahaönia ba da'ö, ba imane khöra: Hadia, fatuwu khömi da'ö? 62 Ba he wisa, na mi'ila dania, möi yaŵa Nono Niha, ba zi so ia föna?[26] 63 Eheha zangorifi, lö'ö manö guna nösi niha. Eheha ba fa'auri daroma ligu andrö, niŵa'ögu khömi.[27] 64 Ba so ösa ba khömi, zi lö mamati.

Noa sa i'otarai mböröta i'ila Yesu, ha niha zi lö mamati, ba ha niha zi manga mbölinia dania.[28]

65 Ba imane: Andrö uŵa'ö khömi: Lö sangila möi khögu, na tenga nibe'e Nama khönia.[29]

Famaduhu'ö Wetero

edit

IV. 66 I'otarai da'ö, ba ato zamuli ya'ira, nifahaönia, ba lö'ö sa'ae fao-fao ira khönia.

67 Ba imane Yesu ba zi felendrua: Hadia, sofanö göi ami?

68 Itema linia Simoni Fetero, imane: He Tua, ba ökhö möiga? So khöu daroma li fangorifi, ba wa'auri si lö aetu. 69 Ba no mamati ndra'aga ba no aboto ba dödöma, ya'ugö ni'amoni'ö andrö khö Lowalangi.[30]

70 Itema lira Yesu: Tenga felendrua ami, nitutuyugu? Ba afökha zi samösa.[31]

71 Yuda andrö, ono Zimoni, banua Kariota, niŵa'önia; da'ö sa zi manga mbölinia dania; samösa ia ba zi felendrua.[32]

Famotokhi ba gahe

edit
  1. ↑ MozIII 23:5 b.t.
  2. ↑ Faigi 1:44
  3. ↑ Sin 145:16
  4. ↑ Faigi 7:40; MozV 18:15 b.t.
  5. ↑ Ayati 15-21: Mat 14:22-36; Mar 6:45-56
  6. ↑ Faigi 18:36
  7. ↑ Faigi 4:14; 10:36
  8. ↑ YohI 3:23
  9. ↑ Faigi 4:18; Mat 12:38
  10. ↑ MozII 16:4,15; Sin 78:24
  11. ↑ Faigi 6:49 b.t.; MozV 8:3
  12. ↑ Faigi 17:6,9,11
  13. ↑ Faigi 4:34; Luk 22:42
  14. ↑ Faigi 10:28,29
  15. ↑ Faigi 3:14 b.t.
  16. ↑ Mat 13:55 b.t.
  17. ↑ Faigi 6:37,39,65; Mat 16:17
  18. ↑ Yes 54:13; Yer 31:33-34
  19. ↑ Faigi 1:18; TimI 6:16
  20. ↑ Faigi 3:36
  21. ↑ KorI 10:3,5
  22. ↑ Luk 22:19
  23. ↑ Mat 26:26 b.t.; KorI 11:27
  24. ↑ Faigi 15:5
  25. ↑ Faigi 5:26
  26. ↑ Yoh 3:13; 20:17; Mar 16:19
  27. ↑ KorII 3:6
  28. ↑ Faigi 2:25
  29. ↑ Faigi 6:44
  30. ↑ Faigi 1:50; 11:27
  31. ↑ Luk 6:13
  32. ↑ Faigi 12:4; 18:3

Fabaliŵa lala

edit

Olayama Zura Yohane: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Yohane/6&oldid=6458439"