Wikimedia Incubator

Wb/nia/Yohane/17

< Wb | nia | Yohane
Wb > nia > Yohane > 17

Hadia khönia

edit

I. 1 Da'ö niŵa'ö Yesu, ba ifaöga hörönia miyaŵa ba zorugo, ba imane: He Ama, no irugi inötö; folakhömi Nonou, ena'ö ifolakhömi ndra'ugö Ono.[1] 2 Si mane fame'eu barö mbawania fefu niha, ena'ö idozigö fa'auri si lö aetu nibe'eu khönia andrö.[2]

3 Da'ö wa'auri si lö aetu, ena'ö aboto ba dödöra ndra'ugö, Lowalangi si ndruhu andrö, si ha sambua, ba ena'ö, aboto ba dödöra zinengeu andrö, Yesu Keriso.[3] 4 No ufolakhömi ndra'ugö ba guli danö, no u'asiwaligö halöŵö andrö, nibe'eu khögu, ba wangai ya'ia.[4] 5 Ba iada'e, ba folakhömi ndra'o, awöu, ya'ugö, Ama, lakhömi si no so khögu ba khöu, föna wa'aso danö'a[5] andrö.[6]

Hadia khö zinengenia

edit

II. 6 No ufa'ele'ö döimö ba niha andrö, nibe'eu khögu, moroi ba niha guli danö. Khöu ira, ba no öbe'e khögu, ba no la'o'ö liu. 7 Aboto sa'ae ba dödöra, wa moroi khöu fefu hadia ia nibe'eu khögu. 8 Me no ufa'ema khöra daroma li andrö, nibe'eu khögu, ba no latema, ba si ndruhu no aboto ba dödöra, wa moroi khöu u'otarai, ba no faduhu dödöra, wa no ya'ugö zamatenge ya'o.[7]

9 Mangandrö ndra'o, salahira, tenga salahi niha guli danö mangandrödo, khöra sa, nibe'eu khögu, me no khöu ira.[8] 10 Ba khöu fefu zi so khögu, ba khögu fefu zi so khöu, ba no tefolakhömi ndra'o ba khöra[9]

11 Ba lö'ö sa'ae sodo ba guli danö, ba so sa ira ba guli danö, khöu möi ndra'odo. He Ama ni'amoni'ö! Taha ira, ba döimö, nibe'eu khögu andrö, ena'ö ha sambua dödöra, si mane tödöda andrö.[10] 12 Me sodo khöra, ba ya'o zanaha ya'ira, ba döimö, nibe'eu khögu andrö ba no urorogö ira, ba lö si tekiko ba khöra, baero nono wa'atekiko andrö, ena'ö itörö zi so ba zura andrö[11]

13 Ba möido khöu iada'e, ba uŵa'ö da'ö ba guli danö, ena'ö a'oi so khöra wa'omuso dödö andrö khögu, ba dödöra[12] 14 No ufa'ema khöra daroma limö, ba no fatiu dödö niha guli danö khöra, me tenga moroi ba niha guli danö ira, si mane ya'o, si tenga moroi ba niha guli danö[13] 15 Lö u'andrö, öheta ira ba guli danö, ba ena'ö örorogö ira, ba ö'efa'ö ba Gafökha.[14] 16 Tenga moroi ba niha guli danö ira, si mane ya'o, si tenga moroi ba niha guli danö.

17 Amoni'ö ira ba zi duhu; taroma limö zi duhu.[15] 18 Si mane famatengeu ya'o ba guli danö, si manö göi wamatengegu ya'ira ba guli danö.[16] 19 Ba u'amoni'ö ndra'o salahira, ena'ö ni'amoni'ö ira göi ba zi duhu.[17]

Hadia khö zamati khönia

edit

III. 20 Ba tenga ha khöra ni'andrögu, ba zamati khögu ba lira no göi,[18] 21 ena'ö ha sambua dödöra, dozi ira, si mane ya'ugö, Ama, ba khögu, ba si mane ya'o ba khöu, ena'ö ya'ira göi, ba khöda so ira; ena'ö faduhu dödö niha guli danö, ya'ugö zamatenge ya'o.[19]

22 Ba no ube'e khöra lakhömi andrö, nibe'eu khögu, ena'ö ha sambua dödöra, si mane tödöda andrö, si ha sambua.[20]

23 Ya'o ba khöra ba ya'ugö ba khögu, ena'ö mo'ahonoa wa ha sambua dödöra, ena'ö aboto ba dödö niha guli danö, ya'ugö zamatenge ya'o, ba no ö'omasi'ö ira, si mane fa'omasiu ndra'o.[21]

24 He Ama, omasido na awögu ba zi so ya'o nibe'eu khögu andrö, ena'ö anehe ira lakhömigu, nibe'eu khögu, me no ö'omasi'ö ndra'o, föna wamazökhi danö'a.[22] 25 He Ama satulö! lö'ö sa aboto ba dödö niha guli danö ndra'ugö, ba ba dödögu aboto ndra'ugö, ba na aboto ba dödö da'e, wa no ya'ugö zamatenge ya'o.[23] 26 Ba no u'ombakha'ö khöra doimö, ba u'ombakha'ö na dania, ena'ö so ba dödöra wa'omasi andrö, fa'omasiu ndra'o, ba ena'ö so ba dödöra ndra'odo.[24]

Famotokhi ba gahe

edit
  1. ↑ Faigi 12:23-28
  2. ↑ Mat 28:18; Faigi 3:35; 6:37
  3. ↑ KorI 8:6
  4. ↑ Faigi 4:34
  5. ↑ Tanö'a: I'oguna'ö wehede tanö'a Sundermann ba wangali fehede dunia ma zui planet bumi ba li Indonesia.
  6. ↑ Faigi 1:1 b.t.; Fil 2:6
  7. ↑ Faigi 16:27,30
  8. ↑ Heb 7:25
  9. ↑ Faigi 16:15
  10. ↑ Faigi 10:30
  11. ↑ Faigi 13:18; 6:70; Sin 109:8
  12. ↑ Faigi 15:11
  13. ↑ Faigi 15:18-19
  14. ↑ YohI 5:18; TesII 3:3
  15. ↑ SamII 7:28; Sin 119:160
  16. ↑ Faigi 20:21
  17. ↑ Heb 7:27; 10:9,10; Tit 2:14
  18. ↑ Rom 10:17
  19. ↑ HalZin 4:32
  20. ↑ Rom 8:15 b.t.; 29 b.t.
  21. ↑ Efes 4:3,13-16; KorI 6:17
  22. ↑ Faigi 12:26; YohI 3:2; Mat 25:34
  23. ↑ Faigi 8:19 Mat 11:25
  24. ↑ Sin 22:23; Faigi 15:9

Fabaliŵa lala

edit

Olayama Zura Yohane: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Yohane/17&oldid=6229729"