Wb/nia/Razo I/9

Ifuli i'oroma'ö ia khö Zelomo Lowalangi

I. 1 Ba me no i'asiwai Selomo wolau osali Yehowa, awö gödo razo ba hadia ia fefu nifakhoi dödönia, somasi ia ifalua, 2 ba ifuli i'oroma'ö ia khö Zelomo Yehowa, si mane fangoroma'önia ya'ia ba Gibeona no. 3 Ba imane khönia Yehowa: No urongo wangandröu ba fakaosamö khögu. Osali andrö nilaumö, ba no ube'e ni'amoni'ö, wamonahia töigu ba da'ö, si lö mamalö-malö, ba hörögu ba tödögu, ba si lö aefa-aefa ba da'ö. 4 Ba na ötörö sa'ae lala nifakhoigu, si mane fanörö namau Dawido, ba wa'adölö dödö ba ba wa'atulö, fa ö'o'ö sibai niŵa'ögu khöu ba ötöngöni nifakhoigu, awö lala andrö khögu, 5 ba u'aro'ö dadaoma wa'arazomö ba Ndraono Gizeraeli, irugi zi lö aetu, si mane nifabu'ugu khö namau Dawido, me umane: Lö aetu dania khöu [nga'ötöu] sidadao ba dadaoma razo Ndraono Gizeraeli. 6 Ba na mi'erogö zui ndra'o, ya'ami ba iraonomi, na lö mi'o'ö goroisagu, awö nifakhoigu, niŵa'ögu khömi, na möi ami mamosumange Lowalangi bö'ö, na khöra mangalulu ami, 7 ba uhori Ndraono Gizeraeli ba danö andre, nibe'egu khöra; ba osali andre, si no u'amoni'ö nahia döigu, ba timba nitibo'ö ube'e, lö'ö sa'ae ufaigi; ba Iraono Gizeraeli, ba ube'e ni'o'aya niha bö'ö fefu ba niheraherai. 8 Ba osali andre, si no alaŵa yaŵa, ba tobali adudula dania; dozi sanörö, ba tobali dodö ba fasi, ba na lasofu: Hana wa ilau da'ö Yehowa ba danö andre ba ba gosali andre? 9 Ba lamane: Börö me no la'erogö Lowalangira, Yehowa andrö, si no mangeheta ira tuara ba danö Miserayi ba me no la'olembai Lowalangi bö'ö ba me no ba da'ö mangalulu ira, me no da'ö lafosumange, — andrö wa no ifatörö khöra Yehowa wamakao andrö fefu!

Dua wulu banua ibe'e khö Hiramo Selomo

II. 10 Ba me no numalö zi dua wulu fakhe andrö, ba nilau Zelomo omo andrö, si dombua, — osali Yehowa andrö, awö gödo razo, 11 ba nitolo Hiramo, razo Diro, Selomo balo eresi ba balo senobari ba ana'a, ha wa'ebua zomasi ia — ba me luo da'ö, ba 20 i'amualagö Selomo khö Hiramo banua ba danö Galilaia. 12 Ba so Hiramo, moroi ba Diro, ba wamaigi banua andrö, nitehe Zelomo khönia, ba lö omasi ia. 13 Ba imane: Hadia mbanua da'ö, nibe'eu khögu, ga'a? Andrö wa labe'e töi danö da'ö Kabuli (mane si lö boto), irugi ma'ökhö andre. 14 Ba 27.772 balaki zi no ifa'ohe'ö khö Zelomo ana'a Hiramo.

Rodi nibe'e Zelomo

III. 15 Ba si mane rodi andrö, niŵa'ö razo Selomo, ba wolau osali Yehowa andrö, awö gödonia, awö [hati] Milo andrö, awö göli Yeruzalema ba öli Hasora ba öli Megido ba öli Gezeri, oi öli kara. 16 Noa sa möi miyaŵa Wara'o, razo Miserayi, no atu'a ia ba Gezeri andrö ba no itunu ba no la'ö'ötö tou Ndrawa Gana'ana andrö, banua da'ö; ba no ibe'e buala [mbanua da'ö] khö nononia, fo'omo Zelomo. 17 Ba i'aro'ö Selomo Gezeri andrö ba Beti Horona tou, 18 ba Ba'alati ba Tamara ba danö si mate. 19 Ba banua, ba ni'irö'ö balazo, fefu, ba banua gureta ba banua zi fakudo andrö ba hadia ia na, somasi Zelomo ilau, he ba Yeruzalema, ba he ba hili Libano ba ba danö si so barö mbawania, ma'asagörö. 20 Ba dozi si tosai Iraono Gamori ba Iraono Kheti ba Iraono Weresi ba Iraono Hewi ba Iraono Yebusi, si tenga Iraono Gizeraeli, 21— nga'ötöra andrö, si tosai na ba danö, si tebai lahori Iraono Gizeraeli, — da'ö ni'ofaya Zelomo ba rodi andrö, ba irugi ma'ökhö andre. 22 Ba Iraono Gizeraeli, ba samösa lö ibali'ö sawuyu Selomo; ya'ira, ba no saradodu ba kumandru khönia ba kumandra ba si fasöndra moroi ba gureta khönia ba solohe kureta, awö zi fakudo. 23 Ba högö mandru andrö, sanaro sohalöŵö khö Zelomo, ba no 550.

Foloyo ba Gofiri

IV. 24 Ba möi miyaŵa nono Wara'o andrö, moroi ba mbanua Dawido, isaŵa nomonia nilau Zelomo khönia. Ba ilau Milo andrö Selomo. 25 Ba medölu zi döfi mame'e sumange Zelomo, sumange nitunu ba sumange fangorifi, ba naha wame'e sumange andrö, nifazökhinia khö Yehowa, ba manunu kumöyö. 26 Ba owo göi ilau Selomo ba Geseono Geberi, ba ngai Geloti, ba mbewe nasi zukhu ba danö Ndraono Gedomo. 27 Ba ifatenge ba nowo andrö mbanuania Hiramo — durumudi ba ono nowo, si no to'ölö ba nasi — ifa'amöi awö mbanua Zelomo. 28 Ba larugi Gofiri ba lahalö gana'a ba da'ö, 97.000 balaki, ba la'ohe khö Zelomo.

Famotokhi ba gahe

Fabaliŵa lala

Olayama Razo I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö