Wb/nia/Razo I/13

Itenaŵa Yerobeamo sama'ele'ö andrö, mado Yuda. Ira'u ia Yerobeamo ba oköliköli dangania

I. 1 Ba hiza genoni Lowalangi, mado Yuda, niŵa'ö Yehowa, irugi si'aikö Mbetieli, me ba zinga naha wame'e sumange so Yerobeamo, ba wanunu kumöyö. 2 Ba ihede-hede'ö naha wame'e sumange, niŵa'ö Yehowa khönia, imane: He naha wame'e sumange! Da'ö niŵa'ö Yehowa: So dania nga'ötö Dawido, Yosia döinia, sanaba bagi gere hili-hili andrö ba detemö, bagi gere sanunu kumöyö ba detemö iada'e, ba töla niha itunu ba detemö! 3 Ba i'ombakha'ö dandra me luo da'ö, imane: Da'ö dania dandra, wa no Yehowa zanguma'ö: Si fabali dania naha wame'e sumange andrö ba muzaewe nawu dawö andrö, si so ba detenia. 4 Ba me irongo razo niŵa'ö genoni Lowalangi andrö, fanegunia naha wame'e sumange andrö ba Mbetieli, ba i'oro'ö dangania, moroi ba zinga naha wame'e sumange, imane: Mira'u ia! Ba oköliköli dangania, ni'oro'önia ba khönia, ba tebai ifuli iböda. 5 Ba fabali naha wame'e sumange no mege, ba muzaewe nawu dawö andrö moroi yaŵa, itörö dandra andrö ni'ombakha'ö genoni Lowalangi andrö, niŵa'ö Yehowa khönia. 6 Ba humede razo, imane khö genoni Lowalangi andrö: Tema andrö wa'ahakhö dödö Lowalangiu Yehowa, andrö khönia, salahigu, ena'ö u'ila ufuli uböda dangagu! Ba i'andrö wa'ahakhö dödö Yehowa enoni Lowalangi andrö, ba i'ila ifuli iböda dangania razo, tobali si mane mege. 7 Aefa da'ö ba humede zui razo khö genoni Lowalangi andrö, imane: Tabu ba nomogu, lau manga, ba mamuala ndra'o khöu! 8 Ba imane enoni Lowalangi andrö khö razo: Ba he öbe'e khögu zi matonga zi so khöu, fefu, ba lo'ö zui möido awöu; lö mangado ba lö ubadu nidanö ba khömi andre. 9 Noa sa muŵa'ö khögu, taroma li Yehowa, no imane: Lö tola manga'ö, ba lö tola öbadu nidanö ba lö tola ötörö mangawuli lalamö mege, me so'ö! 10 Ba mofanö ia, itörö lala bö'ö, lö ifuli itörö lalania mege, me awena möi ia ba Mbetieli.

Lö i'o'ö li Lowalangi sama'ele'ö andrö

II. 11 Ba so ba Mbetieli zama'ele'ö satua; khönia möi ndraononia ba ladunö-dunö khönia fefu hadia ia nilau genoni Lowalangi andrö ba Mbetieli, me luo da'ö, ba hadia huhuonia khö razo. Ba me no la'ombakha'ö da'ö khö namara, 12 ba isofu khöra amara, imane: Heza itörö ba wangawuli? Ba latuturu khönia ira ononia lala nitörö genoni Lowalangi andrö, si otarai ba mado Yuda. 13 Ba imane ba ndraononia: Mifosela khögu galide. Ba me no lafosela galide, ba möi ia yaŵa, fakudo ia, 14 i'o'ö genoni Lowalangi andrö ba ikhamö ia, me dumadao ia ba mbörö manawa andrö. Ba imane khönia: Hadia, ya'ugö genoni Lowalangi andrö, si otarai mado Yuda? Ba imane: Ya'ia. 15 Ba imane khönia: Tabu awögu ba lau manga. 16 Ba imane: Tebai mangado ba lö ubadu nidanö ba da'e. 17 Noa sa mufa'ema khögu li Yehowa, imane: Lö tola manga'ö ba lö tola öbadu nidanö, ba lö tola öfuli ötörö lalamö mege, me awena so'ö! 18 Ba imane khönia sama'ele'ö andrö: Sama'ele'ö göi ndra'odo, si mane ya'ugö, ba no muhede khögu mala'ika, niŵa'ö Yehowa, no imane: Ohe mangawuli ia, awöu, ena'ö manga ia ba ena'ö ibadu nidanö. Ba fayania. 19 Ba ifuli ia, awönia, manga ia khö zama'ele'ö andrö ba mamadu idanö.

I'otu'ö ia Lowalangi

III. 20 Ba barö wemangara andrö, ba humede Yehowa khö zama'ele'ö andrö, solohe mangawuli ya'ia. 21 Ba amaedola ihangoi genoni Lowalangi andrö, si otarai mado Yuda, imane: Da'ö niŵa'ö Yehowa: Me no lö nifondrondrongou niŵa'ö Yehowa, ba me lö nitöngöniu oroisa andrö, nibe'e Lowalangiu Yehowa khöu, me no öfuli ndra'ugö, 22 me no manga'ö ba me no öbadu nidanö ba mbanua andrö niŵa'önia khöu: Lö tola manga'ö ba lö tola öbadu nidanö! ba lö möi ba lewatö ndra tuau dania mbotou! 23 Ba me no manga ia ba me no ibadu nidanö, ba lafosela khönia galide zama'ele'ö andrö, solohe mangawuli ya'ia mege. 24 Ba me no mofanö ia, ba falukha khönia zingo, ba lala, samunu ya'ia. Ba adölö manö ba lala mbotonia, ba kalidenia ba singo andrö, ba no so ba ngai mboto. 25 Ba me so zanörö, ba la'ila mboto zi mate andrö, si no adölö ba lala, ba hiza zingo andrö ba ngainia. Ba möi ira mu'ombakha'ö yomo ba mbanua andrö, ba zi so sama'ele'ö satua andrö. 26 Ba me irongo sama'ele'ö andrö, solohe mangawuli ya'ia mege, ba imane: Enoni Lowalangi andrö, si lö molo'ö oroisa Yehowa mege, andrö ilulu ba mbawa zingo ia Yehowa: da'ö zi bohagö ya'ia ba samunu, itörö li Yehowa andrö, niŵa'önia khönia. 27 Ba imane ba ndraononia: Mifosela khögu galide! 28 Ba lafosela. Ba fakudo ia, isaŵa, ba hiza mbotonia no mege, no adölö ba lala, ba kalide ba singo ba ngai mboto zi mate. Lö ni'a zingo boto zi mate ba lö nisasawinia kalide. 29 Ba ituyu mboto genoni Lowalangi andrö sama'ele'ö andrö, ihare'ö ba hulu galide, ba i'ohe mangawuli. Ba irugi mbanuara, ba wange'esi si mate andrö ba ba wogo'o ya'ia. 30 Ba ba lewatönia ibe'e mboto zi mate andrö, ba la'e'esi: Alai ndra'o ndra'ugö ga'a! 31 Ba me no iko'o, ba imane ba ndraononia: Na no mate ndra'o, ba ba lewatö ba niko'o enoni Lowalangi andrö miko'o ndra'o; ba ngai dölania mibe'e dölagu, fa böi lafufu dania dölama, daruaga. 32 Lö'ö sa zi lö itörö dania nidaö'ö-daö'önia, niŵa'ö Yehowa khönia, ba naha wame'e sumange andrö ba Mbetieli ba ba gosali ba hili-hili andrö, ba mbanua Zamaria misa, fefu.

Lö iböhöli lala si lö sökhi andrö Yerobeamo

IV. 33 Ba he me no aefa da'ö no mege, ba lö'ö sa iböhöli lala si lö sökhi andrö khönia Yerobeamo, ifuli a'ine ifataro ere ba hili-hili andrö gofu ha niha manö. Ha niha zomasi, ba ifo'ösi danga ba tobali ere ba hili-hili andrö. 34 Ba tobali horö zi samba omo ndra Yerobeamo da'ö, tobali famakikora ba fangohori ya'ira ba guli danö dania.

Famotokhi ba gahe

Fabaliŵa lala

Olayama Razo I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö