Wb/nia/Razo I/16

Ifeta'u Mbaesa sama'ele'ö andrö, Yehu, mama'ele'ö ia

I. 1 Ba humede Yehowa khö Yehu andrö, ono Hanani, fanegu Mbaesa andrö, imane: 2 Me no tou ba danö utuyu ndra'ugö ba me no ufataro'ö razo mbanuagu Iraono Gizeraeli, ba me noa zui ötörö lala Yerobeamo andrö ba me no öfowöhö mbanuagu Iraono Gizeraeli, ba wamazökhi horö, fa la'andrö wönugu, ba horöra andrö, 3 ba hiza, ba uhori Mbaesa, fabaya nga'ötönia, ba ufatörö ba zi sawu ya'ami nifatörögu ba zi sawu ndra Yerobeamo andrö, ono Nebati. 4 Si mate yomo ba mbanua, soroiyomo Mbaesa, ba ö nasu, ba si mate baero ba mbenua, ba ö wofo ba dalu mbanua. 5 Ba hadia na ena'ö nidunö-dunö ba khö Mbaesa andrö, hadia nilaunia, ba fa'abölönia andrö, ba noa sa mutanö ba zura hikaya razo Ndraono Gizeraeli. 6 Ba mate Mbaesa, itörö lala ndra amania ba ba Dirisa lako'o ia. Ba ononia Ela zi tobali razo, fangalinia. 7 Ba no ifa'ema sama'ele'ö andrö, Yehu, ono Hanani, niŵa'ö Yehowa fotu Mbaesa, fabaya si samba omo ya'ira; sambalö, ba zi lö sökhi andrö fefu, nilaunia, wamaigi Yehowa, me no i'andrö wönu Yehowa, ba nifazökhi dangania andrö, fa ifatörö khönia nifatörönia ba zi samba omo ndra Yerobeamo, ba sambalö, ba me no ihori da'ö.

Tobali razo Ndraono Gizeraeli nono Mbaesa Ela, nibunu Zimeri dania

II. 8 Me no alua 25 fakhe razo mado Yuda Asa, ba tobali razo Ndraono Gizeraeli Ela andrö, ono Mbaesa, ba mendrua fakhe razo ia ba Dirisa. 9 Ba ilaŵa ia enoninia Simeri, kumandra zi matonga gureta andrö, mamagölö ia ba niha bö'ö. Ba me no mabu agu Ela, ba Dirisa, ba nomo Garasa, mandru ba gödo ba Dirisa, 10 ba so moroi tou Zimeri, ibunu Ela, me no alua 26 fakhe razo mado Yuda Asa andrö: ba tobali razo Zimeri, fangali Ela. 11 Ba me no razo ia, me no dumadao ia ba dadaomania, ba ibunu fefu motöi si samba omo ndra Baesa, ma'ifu lö isaigö, irege zi kiöni bagolö, fabaya talifusöra ba si fahuwu khöra. 12 Tobali ihori zi samba omo ndra Baesa Simeri, dali niŵa'ö Yehowa andrö, nifa'ema Yehu, sama'ele'ö andrö, 13 fotu ba horö Mbaesa, börö horö Mbaesa andrö fefu, awö horö nononia Ela, nifazökhira, famaelungura Iraono Gizeraeli, fa la'andrö wönu Lowalangi Ndraono Gizeraeli, Yehowa, ba nadu faya andrö khöra. 14 Ba hadia na ena'ö nidunö-dunö ba khö Ela andrö, ba hadia ia fefu, nilaunia, ba noa sa mutanö ba zura hikaya razo Ndraono Gizeraeli.

Fa'amate Zimeri

III. 15 Me no alua 26 fakhe razo mado Yuda Asa, tobali razo Zimeri andrö, ha fitu bongi, ba Dirisa, me luo lasuwö Gibetono sato, Gibetono banua Ndrawa Wilisiti. 16 Ba me larongo niha sato, ba golombaseŵa, no mamagölö ba niha bö'ö Zimeri, ba no ibunu razo, ba latema lafataro razo Omeri andrö, kumandra sebua khöra, Iraono Gizeraeli fefu, me luo da'ö, ba da'ö, ba golombaseŵa. 17 Ba iröi Gibetono Omeri, i'ohe Ndraono Gizeraeli fefu, möi ira musuwö Dirisa. 18 Ba me i'ila Simeri atu'a ira ba mbanua, ba möi ia ba gödo razo, ba itunu gödo yaŵania, ba mate ia, akhozi, 19 börö horönia andrö, nifazökhinia, wolau si fatuwu khö Yehowa, wanörö lala Yerobeamo andrö, fabaya horönia andrö, nifazökhinia, wamaelungu ba horö Iraono Gizeraeli göi. 20 Ba hadia na ena'ö nidunö-dunö ba khö Zimeri andrö ba famagölönia andrö, folaŵania, ba noa sa mutanö ba zura hikaya razo Ndraono Gizeraeli.

Razo Omeri Itaru'ö Zamaria andrö

IV. 21 Ba me luo da'ö ba fabali Ndraono Gizeraeli. Si matonga niha sato, ba khö Dibini, ono Ginata, la'o'ö, ba wamataro razo da'ö, ba si matonga, ba si lö aefa khö Omeri. 22 Ba abölö zi fao khö Omeri, moroi ba zi fao khö Dibini, ono Ginata. Ba mate Dibini, ba tobali razo Omeri. 23 Me no alua 30 fakhe razo mado Yuda Asa tobali razo Ndraono Gizeraeli Omeri andrö, mewelendrua fakhe; meönö fakhe ba Dirisa. 24 Ba i'öli hili Zamaria andrö, khö Zemeri, 8824 rufia, ba i'aro'ö hili andrö, ba Samaria ibe'e töi mbanua andrö, nitaru'önia, i'ohia'ö döi Zemeri andrö, sokhö hili andrö mege. 25 Ba si fatuwu khö Yehowa ilau Omeri, abölö-bölö walösökhi, moroi ba razo fönania mege fefu; 26 itörö sibai lala Yerobeamo andrö, ono Nebati, awö horönia andrö, famaelungunia Iraono Gizeraeli, fa la'andrö wönu Lowalangi Ndraono Gizeraeli, Yehowa, ba nadu faya andrö khöra. 27 Ba hadia na ena'ö nidunö-dunö ba khö Omeri andrö, ba hadia ia fefu nilaunia, ba fa'abölönia andrö, ni'oroma'önia, ba noa sa mutanö ba zura hikaya razo Ndraono Gizeraeli. 28 Ba mate Omeri, itörö lala ndra amania, ba ba Zamaria lako'o ia. Ba razo fangalinia, ba ononia Ahabi.

Tobali razo Ndraono Gizeraeli nononia Ahabi. Mame'e adu da'ö. Lafuli lataru'ö Yerikho

V. 29 Me no alua 37 fakhe razo mado Yuda Asa, tobali razo Ndraono Gizeraeli Gahabi andrö, ono Omeri, ba 22 fakhe razo ia ba Zamaria. 30 Ba si fatuwu khö Yehowa ilau Ahabi, ono Omeri; abölö-bölö walösökhi, moroi ba razo fönania fefu. 31 Ba side-idenia na, wa ifazökhi göi horö Yerobeamo, ono Nebati; ba ihalö Izebela andrö, ono Etiba'ali, razo Zidona, ba möi ia mamosumange Ba'ali andrö, awö we'angaröfi li ya'ia. 32 Ba ifa'anö naha wame'e sumange khö Mba'ali, ba gosali Mba'ali andrö, nilaunia ba Zamaria. 33 Ba ifazökhi göi Gasera andrö Ahabi, ba ilau na göi wangala bö'ö, ba wangandrö fönu Lowalangi Ndraono Gizeraeli, Yehowa, abölö-bölö moroi ba razo Ndraono Gizeraeli fefu, fönania. 34 Ba me luo razo ia ifuli itaru'ö Yerikho Hieli andrö, banua Mbetieli, ba mate nononia si a'a Abiramo, me ibe'e tou doyo, ba ononia si akhi, Segubi, me i'asiwai mbawa göli, itörö niŵa'ö Yehowa, nifa'ema Yosua, ono Nuni.

Famotokhi ba gahe

Fabaliŵa lala

Olayama Razo I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö