Wb/nia/Moze I/40

I. Fangifi ngoni-ngoni Wara'o si so ba gurunga

1 Ba lö ara furi ö, ba mosala zama'oli gö khö razo Miserayi ba samazökhi kue khönia, so zalara khö zokhö ya'ira, razo Miserayi. 2 Ba mofönu Wara'o ba ngoni-ngoninia andrö, si darua, högö zama'oli gö ba högö zamazökhi kue, 3 ba ifabe'e'ö ba gurunga ira ba nono högö wazuri, ba gurunga andrö, ba nikuru Yosefo, 4 Ba ibe'e ngoni-ngonira Yosefo högö wazuri andrö; ba ara ma'ifu tetaha ira.5 Ba mangifi zi darua andrö, ha sara wongi, ba fasambua geluaha wangifira, fangifi zama'oli gö ba fangifi zamazökhi kue khö razo Miserayi, si so ba gurunga.

II. I'ombakha'ö Yosefo geluaha wangifi andrö

6 Ba me möi si bakha khöra Yosefo, sihulöwongi, ba oroma khönia, wa lö sökhi-sökhi dödöra. 7 Ba isofu khö ngoni-ngoni Wara'o andrö, nitaha awönia ba nomo zokhö ya'ia, imane: Hadia, wa mangerau mbawami ma'ökhö?

8 Ba lamane khönia: No mangifi ndra'aga ba lö sangombakha eluaha.

Ba imane khöra Yosefo: Lowalangi mbalazi ba wangombakha eluaha wangifi — ba mitunö khögu.

9 Ba itunö khö Yosefo wangifinia högö zama'oli gö, imane khönia: Ba wangifigu andrö, ba so fönagu ŵeŵe nagu, uŵa'ö. 10 Ba si tölu daha ŵeŵe nagu andrö. Ba me molehe ia, ba alua mbowo ba adölö mowua sasoso. 11 Ba so ba dangagu mako Wara'o. Ba uhalö mbua nagu andrö, ba uferaisi ba mako khö Wara'o ba ube'e ba danga Wara'o mako.

12 Ba imane khönia Yosefo: Da'ö geluaha: Daha andrö si tölu, ba no ngaluo. 13 Tölu bongi tö, i'otarai ma'ökhö, ba i'efa'ö ndra'ugö Fara'o ba ifuli ifataro ndra'ugö ba nahau. Ba öfuli öbe'e ba danga Warao makonia, si mane föna, me sama'oli gö ndra'ugö khönia. 14 Ba törö-törö tödöu ndra'odo, na ohahau dödöu, tolodo, wangombakha ya'o khö Wara'o, ena'ö ö'efa'ö ndra'o ba nomo andre. 15 Noa sa nitagö manö ndra'o ba danö Heberaio ba ba da'e göi, ba lö horögu, wa no labe'e ba gurunga ndra'odo.

16 Ba me irongo högö zamazökhi kue andrö, si sökhi geluaha andrö, ba imane khö Yosefo: Ba wangifigu, ba tölu kambu-kambu kue ba högögu, uŵa'ö. 17 Ba ba gambu-kambu tanö yaŵa, ba so ngawalö gö khö Wara'o, nifazökhi duka kue; ba la'a fofo ba gambu-kambu andrö ba högögu.

18 Ba itema linia Yosefo, imane: Da'ö geluaha da'ö: Kambu-kambu andrö, si tölu, ba tölu ngaluo. 19 Tölu bongi tö, i'otarai ma'ökhö, ba ifa'eŵa'ö mbagiu Fara'o ba ifataŵi'ö ba döla geu, ba tobali la'a nösiu fofo.

III. Itörö ni'ombakha'önia andrö

20 Ba tölu bongi aefa da'ö, me baŵa wa'atumbu Wara'o, ba ibe'e gö ngoni-ngoninia fefu. Ba ifahalö'ö miyaŵa högö zama'oli gö andrö, awö högö zamazökhi kue, ba zi so ngoni-ngoninia; 21 högö zama'oli gö andrö, ba ifuli ifataro ba halöŵönia, fa tola ifuli ibe'e ba danga Wara'o mako; 22 ba högö zamazökhi kue, ba ifataŵi'ö, itörö niŵa'ö Yosefo khöra. 23 Ba lö'ö sa'ae itörö tödö högö zama'oli gö Yosefo, olifu ia.

Famotokhi ba gahe

Fabaliŵa lala

Olayama Moze I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö