1 Noa sa fakhili-khili ira mbanua zorugo andrö niha, satua baomo, si möi, si hulö wongi, mangoni sohalöŵö ba kabu nagu khönia.[1]
2 Ba me no mamagölö ira zohalöŵö, sasuku ma'ökhö luora, ba ifatenge ira ba kabu nagu andrö khönia.
3 Ba me ifuli möi, me labözi siŵa, ba i'ila danö bö'ö, si so ba kade, si lö halöŵö, 4 ba imane khöra: Mi'ae'e, ya'ami göi, ba kabu nagu, ba si nangea luomi, ba ube'e khömi.
5 Ba möi ira. Ba ifuli möi me laluo ba me labözi tölu, ba imanö zui.
6 Ba me möi ia me labözi lima, ba falukha ia danö bö'ö, si so ba da'ö, ba imane khöra: Hadia wa mi'oma'ökhöi manö ba da'e, lö halöŵö?
7 Lamane khönia: Me lö sangoni ya'aga.
Imane khöra: Mi'ae'e göi, ba kabu nagu andrö.
8 Ba me bongi sa'ae, ba imane sokhö kabu nagu andrö khö durutulinia: Hede ba zohalöŵö andrö ba be'e luora; börögö ba zafuria möi, numalö ba zi föföna andrö.[2]
9 Ba la'ondrasi ni'oni me labözi lima, ba sasuku zamösa luora.
10 Ba me so zi föföna andrö, ba lawai ebua zinemara. Ba tebe'e sasuku zamösa khöra göi.
11 Ba me no latema da'ö, ba kumökö-kökö ira khö zatua baomo andrö,[3] 12 lamane: Ha saza wohalöŵö zafuria andrö, ba no fagölö-gölö ndra'aga öbe'e, ya'aga si no manaha fa'afökhö andrö, ma'ö-ma'ökhö, awö wa'aukhu zino.[4]
13 Ba itema li zi samösa andrö, imane: He le, lö ulimo ndra'ugö. Tenga no mamagölö ita ba zi sasuku? 14 Halö dana khöu ba ofanö. Somasido, ufagölö-gölö wame'e khömi safuria andre.
15 Ma lö tola u'o'ö manö nilau dödögu ba zi so khögu? Ma afökhö dödöu, me no sebua tödö ndra'o?[5]
16 Si manö wa tobali si so föna zi so furi, awö wa tobali si so furi zi so föna.[6]
17 Ba me möi misi yaŵa Yesu ba Yeruzalema,[7] ba i'ohe awönia zi felendrua, ba zi ha ya'ira ba imane khöra ba lala: 18 Hiza, möi ita misi yaŵa ba Yeruzalema; ba tebe'e dania ba danga gere sebua ba ba danga zangila amakhoita andrö Nono Niha, ba la'etu'ö hukunia, huku famunu,[8] 19 ba labe'e ia ba danga niha baero, ba wango'aya ya'ia ba ba wamöbözi ba ba wamoröfa; ba na no irugi tölu ngaluo, ba maoso ia, ifuli auri.[9]
III. Ina nono Zebedaio andrö edit
20 Ba möi khönia nina nono Zebedaio andrö,[10] awö nononia, ituhi danö fönania, so ni'andrönia khönia.[11]
21 Ba imane khönia: Hadia niŵa'öu?
Imane khönia: Ŵa'ö, ena'ö dumadao dania nonogu andre, si darua, samösa ba gambölöu ba samösa ba gaberau, ba mbanuau andrö.
22 Ba itema linia Yesu, imane: Lö mi'ila watahögö hadia ni'andrömi. Hadia mi'ila mibadu nösi mako andrö, nibadugu dania?
Lamane khönia: Ma'ila.[12]
23 Imane khöra: Mibadu sa nösi mako andrö khögu dania, ba fedadao andrö ba gambölögu ba ba gaberagu, ba tenga ya'o zanguma'ö; ha da'ö zidadao ba da'ö, nihonogöi Namagu fedadao.[13]
24 Ba me larongo da'ö si dafulu, ba lö sökhi-sökhi dödöra ba zi darua andrö, si fatalifusö.
25 Ba humede khöra Yesu, imane: Mi'ila, lafatörö mbanuara salaŵa niha ba labe'e barö mbawara niha sebuara.[14]
26 Ba ba khömi, ba böi si manö; ha niha zomasi ebua ba khömi, ba yamöi enonimi;[15] 27 ba na so ba khömi zomasi möi fönami, ba yamöi sawuyumi.
28 Si mane Ono Niha, tenga si möi mangoni, no si möi enoni, si möi mame'e nosonia höli zato.[16]
29 Ba me mofanö ira, me aefa ira ba Yerikho,[17] ba ato zolo'ö ya'ia niha.
30 Ba hiza niha sau'a, darua, sidadao ba zinga lala; me larongo itörö Yesu, ba mu'ao ira, lamane: Hakhösi tödö ndra'aga, ma'uwu Dawido![18]
31 Ba latenaŵa ira sato, ena'ö labato. Ba lahötöi fe'ao, lamane: He Tua, ma'uwu Dawido, hakhösi tödö ndra'aga!
32 Ba ibadugö ia Yesu, muhede ia khöra, imane: Hadia zomasi ami, he uwisa khömi?
33 Lamane khönia: He Tua, ena'ö teboka höröma!
34 Ba ahakhö dödö Yesu ba ibabaya höröra, ba i'anema'ö ifuli la'ila niha ba la'o'ö ia.
Famotokhi ba gahe edit
- ↑ Faigi 21:33
- ↑ Faigi 19:30
- ↑ Luk 15:29 b.t.
- ↑ Faigi 19:29
- ↑ Rom 9:21 b.t.
- ↑ Faigi 19:30; 22:14
- ↑ Ayati 17–19: Mar 10:32–34; Luk 18:31–34
- ↑ Faigi 16:21
- ↑ Faigi 27:2 b.t.
- ↑ Ayati 20–28: Mar 10:35–45
- ↑ Faigi 10:2
- ↑ Faigi 26:39; Luk 12:50
- ↑ Faigi 25:34
- ↑ Luk 22:25 b.t.
- ↑ Faigi 23:11; Mar 9:35; Efes 5:21
- ↑ Luk 22:27; Yes 53:10,12; TimI 2:6; FetI 1:18,19
- ↑ Ayati 29–34: Mar 10:46–52; Luk 18:35–43
- ↑ Faigi 9:27
Fabaliŵa lala edit
Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö