Wikimedia Incubator

Wb/nia/Mataio/6

< Wb | nia | Mataio
Wb > nia > Mataio > 6

I. He wisa wame'e ame'ela ba zi numana

edit

1 Ba mifaigi wa'atulömi andrö, böi ha ba zanehe niha atulö ami, ena'ö la'ila ami; ba na si manö, ba lö luomi khö Namami andrö, si so ba zorugo.[1]

2 Andrö, na öbe'e game'ela ba zi numana, ba böi falau'ö dorofe fönau, si mane samini tödö andrö, ba zekola ba ba newali, ena'ö lasuno ira niha. Si ndruhu niŵa'ögu khömi, no latema luora.

3 Ba na mame'e ame'e la ndra'ugö ba zi numana, ba böi ya'i'ila tangau kabera hadia nilau dangau kambölö,[2] 4 ena'ö lö oroma game'elamö andrö; ba isulöni khöu Amau andrö, sangila si tobini.[3]

II. He wisa wangandrö

edit

5 Ba na mangandrö ami, ba böi simane samini tödö ami. Noa sa omasi ira ba zekola so'ira, ba ma ba newali, ba waerua lala misa, na mangandrö ira, afura oroma ira ba niha. Sindruhu niŵa'ögu khömi, no latema luora.

6 Ba ya'ugö, na mangandrö'ö, ba ae si bakha ba mbate'e khöu ba kusi mbawandruhö khömö, ba angandrö khö Namau andrö, ba zi tobini, ba isulöni khöu Amau andrö, sangila si tobini.[4]

7 Ba na mangandrö ami, ba böi mi'oya'ö li, si mane niha baero; lawai sa tefondro-ndrongo khöra, ba wa'oya lira.[5] 8 Andrö böi mifaomagö ami khöra, noa sa i'ila Amami andrö, hadia zoguna khömi, he lö'ö na ni'andrömi khönia.[6]

9 Andrö mimane wangandrö: He Ama khöma si so ba zorugo! Yate'amoni'ö döiu.[7]

10 Yatobali banuau fefu niha. Ya'itörö zomasi ndra'ugö, hulö ba zorugo, yasimanö göi ba gulidanö.[8]

11 Öma sirugi ma'ökhö be'e khöma ma'ökhö andre.[9]

12 Ba efa'ö khöma horöma, si mane fangefa'öma sala ba zi so sala khöma.[10]

13 Ba böi ohe ndra'aga ba wanandraigö, ba efa'öga ba Gafökha. Me khöu mbanua, awö wa'abölö, awö lakhömi, irugi zi lö aetu. Yaduhu.[11]

14 Na mi'efa'ö sa'ae zala niha ba i'efa'ö göi khömi Amami andrö, si so ba zorugo.[12] 15 Ba na lö mi'efa'ö zala niha, ba lö'ö göi i'efa'ö khömi horömi Amami andrö.

III. He wisa wamoni

edit

16 Ba na mamoni ami, ba böi mifangerau mbawami, si mane samini tödö; me labalugö mbawara, afura oroma ira ba niha, ba wamonira andrö. Si ndruhu niŵa'ögu khömi no latema luora.[13]

17 Ba ya'ugö, na mamoni'ö, ba bayoini högöu ba sasai mbawau; 18 ena'ö lö oroma ba niha, na mamoni'ö, ba ena'ö oroma khö Namau andrö, si so ba zi tobini, ba isulöni khöu Amau andrö, sangila si tobini.

IV. Böi omasi ita gana'a

edit

19 Böi mihöna khömi girö-girö ba guli danö, nifakiko hama ba ni'a howu, nikharu zanagö ba nitagö.[14] 20 Ba zorugo mihöna khömi girö-girö, ba zi lö ifakiko hama, ba zi lö i'a howu, ba zi lö lakharu sanagö, ba zi lö latago.[15]

21 Ba zi so girö-girö khöu sa, ba da'ö göi so dödöu dania.

22 Haga mboto hörö; na si sökhi höröu, ba mohaga mbotou ma'asambua.[16] 23 Ba na no mofökhö höröu, ba ogömi-gömi mbotou ma'asambua. Andrö, na no sogömi-gömi haga andrö, si so ba dödöu, ba ha wa'abölö wa'ogömi-gömi andrö.

24 Tebai enoni zi darua niha, ma fa'udu ia ba zi samösa ba i'omasi'ö zi samösa, ba ma zui molemba ia ba zi samösa, ba i'ositengagö zi samösa. Tebai enoni Lowalangi ami ba enoni gana'a göi.[17]

V. Böi ta'abusi tödö mbalazo

edit

25 Andrö uŵa'ö khömi:[18] Böi mi'abusi tödö nosomi, hadia mbalazomi, ba ma botomi, hadia nukhami. Tenga no ebua noso, moroi ba gö, ba tenga no ebua mboto, moroi ba nukha?[19]

26 Mifaigi wofo andrö, ba dalu mbanua, lö manaru ira ba lö mamasi, lö mangöhöna ba halasa ira, ba ibalazoi ira Amami andrö, si so ba zorugo. Tenga no aröu faehu ami wofo?[20] 27 Ba ha niha ba khömi zangila mondrou'ö fa'anau nosonia samba si'u, na i'abusi tödö?

28 Ba ba nukha, ba hana wa mi'abusi tödö? Mitöngöni ladari mböhö andrö ba danö, he wisa wanöinia, lö mohalöŵö ia, lö managu. 29 Ba uŵa'ö khömi, lö si manö wa'asökhi nukha Zelomo, ba lakhöminia andrö fefu, si mane nukha zi sara da'ö. 30 Ba na imanö Lowalangi wamonukha du'u ba danö, si so ma'ökhö andre, nitibo'ö ba galitö mahemolu, ba tenga mendrua manö imanö khömi, ya'ami sambö famati?

31 Andrö böi mibusi dödömi ba böi miŵa'ö: Ha ma'a? ma: ha mabadu? ma: ha ma'onukha? 32 A'oi sa ni'alui niha baero da'ö fefu; no'a sa i'ila Amami andrö, ba zorugo, wa soguna khömi da'ö fefu.

33 Mi'ofönai'ö wangalui banua Lowalangi andrö, awö wa'atulö dödö andrö khönia, ba tebe'e nönö-nönö dania khömi da'ö fefu.[21]

34 Andrö böi mi'abusi tödö zoguna mahemolu; mahemolu tesöndra lala zabu dödö mahemolu. Noa manö wamakao zi sara-sara ngaluo.

Famotokhi ba gahe

edit
  1. ↑ Faigi 23:5
  2. ↑ Rom 12:8
  3. ↑ Luk 14:14
  4. ↑ SalII 4:33
  5. ↑ SalI 18:26; Yes 1:15
  6. ↑ Sin 38:10
  7. ↑ Luk 11:2–4; Sin 115:1
  8. ↑ Luk 17:20 b.t.; 22:42; Sin 103:21
  9. ↑ Amaed 30:8
  10. ↑ Faigi 18:21 b.t.
  11. ↑ Faigi 26:41; KorI 10:13; TimII 4:18
  12. ↑ Mar 11:25,26; Kol 3:13
  13. ↑ Yes 58:5
  14. ↑ Faigi 19:21; Luk 16:9
  15. ↑ Luk 12:33; TimI 6:17 b.t.
  16. ↑ Luk 11:34 b.t.
  17. ↑ Luk 16:13; KorII 6:14 b.t.; SalI 18:21
  18. ↑ Ayati 25–33: Luk 12:22–31
  19. ↑ Fil 4:6; FetI 5:7
  20. ↑ Faigi 10:29–31
  21. ↑ Luk 10:42; 12:31

Fabaliŵa lala

edit

Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Mataio/6&oldid=6272328"