Wb/nia/Mataio/28

I. Femaoso Yesu

Niha sanunu lilira ba lili nitunu si so bakha ba lewatö Yesu ba Yerusalema.

1 Ba ba zi bongi, me no aefa luo sabato, me arakha moluo luo migu, ba möi Maria andrö, banua Magadala, awö Maria si sambua andrö, mamaigi lewatö.

Gambara wemaoso Yesu nihaogö Szymon Czechowicz, 1758

2 Ba hiza ziheu sabölö-bölö. No möi tou mala'ika Zo'aya, moroi ba zorugo, möi ia mameta gowe andrö, ba idadaoni. 3 Ba hulö gari mbanua wamaigira ya'ia, ba barunia, ba no afusi, hulö mbetua.

4 Ba manizi-nizi zanaro andrö, fa'ata'ura ia ba tobali hulö zi mate ira.

5 Ba humede mala'ika andrö, imane ba ndra alawe andrö: Böi mi'ata'ufi! u'ila sa, mi'alui Yesu andrö, niforöfa. 6 Lö ya'ia ba da'e; noa sa maoso ia, itörö niŵa'önia; mi'ae mifaigi naha andrö, ba zi so ia mege.

7 Ba mita'i-ta'i, mi'ae miŵa'ö khö ndra nifahaönia, wa no maoso ia moria ba ngai zi mate, ba hiza, mowaö-waö ia ba Galilaia, ba da'ö mi'ila ia dania.

8 Hiza, no uŵa'ö khömi. Ba la'ailo'ö ira, laröi lewatö, ata'u ira, ba omuso sibai dödöra, fagohi ira, ba wangombakha ba nifahaönia.

9 Ba hiza, falukha ira Yesu, ba imane khöra: Ya'ami! Ba la'ondrasi ia, lara'u gahenia, latuhi danö fönania.

10 Ba imane khöra Yesu: Böi mi'ata'ufi, mi'ae miŵa'ö ba dalifusögu, ena'ö möi ira ba Galilaia, ba ba da'ö la'ilado dania.

II. La'a gana'a sanaro andrö

11 Ba me möi ira, ba hiza zanaro ösa, möi ira miyomo ba mbanua, ba la'ombakha'ö da'ö no mege fefu khö ndra ere sebua.

12 Ba falukha ira, awö zatua mbanua andrö, mamagölö ira, ba labe'e gana'a sabönö ba zaradadu andrö, lamane: 13 Mimane: No möi ndra nifahaönia andrö, ba zi bongi, no latagö ia, me no alau höröma. 14 Ba na terongo khö gumandru, ba ya'aga zi honogö ya'ia, ba lö mabe'e abu dödömi.

15 Ba lahalö gana'a andrö, la'o'ö niŵa'ö khöra. Ba si manö duria andrö, ba Niha Yehuda, irugi ma'ökhö andre.

III. I'angonasi nifahaönia Yesu

16 Ba möi ba Galilaia nifahaö andrö, si felezara, ba hili andrö, niŵa'ö Yesu khöra.

17 Ba me la'ila ia, ba latuhi danö; ba so zanufa tödö ösa.

18 Ba i'ondrasi ira Yesu, humede ia khöra, imane: Fefu wa'abölö andrö ba zorugo ba ba guli danö, ba no mube'e khögu.

19 Mi'ae'e, mibali'ö nifahaö fefu soi, wamayagö idanö ya'ira ba döi Nama ba ba döi Nono ba ba döi Geheha ni'amoni'ö; 20 mifahaö ira ba wolo'ö fefu hadia ia niŵa'ögu khömi. Ba hiza, fao khömi ndra'o, ero ma'ökhö, irugi gamozua götö danö andrö.

Famotokhi ba gahe

Fabaliŵa lala

Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö