Wikimedia Incubator

Wb/nia/Mataio/14

< Wb | nia | Mataio
Wb > nia > Mataio > 14

I. Labunu Yohane samayagö idanö

edit

1 Me luo da'ö irongo duria Yesu andrö Herode,[1] razo ba zi sagörö ni'o'öfa tanö andrö. 2 Ba imane ba genoninia: Yohane da'ö, samayagö idanö; no maoso da'ö moroi ba ngai zi mate, andrö so khönia wa'abölö andrö.[2]

3 Noa sa ifara'u'ö Yohane andrö Herode, no ifaböbö'ö ba no ifabe'e'ö ba gurunga, börö Herodia andrö, fo'omo dalifusönia [Filifo].[3] 4 Noa sa iŵa'ö khönia Yohane; Lö tola so ia khöu.[4]

5 Ba ibunu ena'ö Yohane Herode, ba ata'u ia niha sato, me ba dödöra sama'ele'ö Yohane andrö.[5]

6 Ba me baŵa wa'atumbu khö Herode, ba manari nono Herodia andrö khöra ba da'ö, ba omasi Herode. 7 Andrö ifabu'u khönia, fahölu ia, ibe'e khönia hadia ia ni'andrönia.

8 Ba me no isofu khö ninania ua; ba imane: Be'e khögu ba da'e, ba wiga yaŵa, högö Yohane andrö, samayagö idanö.

9 Ba abu dödö razo, ba ba wahölusa no mege ba ba domenia andrö, ba i'oroi'ö labe'e. 10 Ba ifatenge, ifa'eŵa'ö mbagi Yohane ba gurunga.

11 Ba la'ohe högönia, ba wiga, ba labe'e khö nono alawe andrö, ba i'ohe khö ninania.

12 Ba so ndra nifahaönia, lahalö mbotonia ba lako'o; ba möi ira mangombakha da'ö khö Yesu.

13 Ba me irongo Yesu,[6] ba iheta ia ba da'ö, moloyo ia, isaŵa danö si mate, ba zi ha ya'ia; ba me larongo niha sato, ba la'o'ö ia, latörö tanö, moroi ba mbanua misa.

II. Tebe'e gö ba niha si lima ngahönö

edit

14 Ba me irugi Yesu, ba i'ila niha sato sibai andrö, ba ahakhö dödönia ira ba ifadöhö wökhö ba zofökhö khöra.[7]

15 Ba me tanö owi, ba möi khönia nifahaö, lamane: Tanö si mate da'e, ba bongi; fofanö sa'ae niha sato, ena'ö möi ira ba mbanua misa, mowöli göra.

16 Ba imane khöra: Alakha lö mofanö ira, mibe'e göra, ya'ami.

17 Ba lamane khönia: Lö khöma ba da'e, ha lima roti ba ha dua rozi gi'a.

18 Ba imane: Mi'ohe ia khögu ba da'e.

19 Ba iŵa'ö mudadao niha sato ba ndru'u, ba ihalö roti andrö, si lima, awö gi'a andrö, si dua rozi, ifaöga hörönia miyaŵa ba zorugo, i'aohasi gölö Lowalangi ba iboboto ba ibe'e khö ndra nifahaö roti no mege, ba ira nifahaö zame'e ba niha sato.[8]

20 Ba manga ira fefu ba abuso, ba la'ozaragö zi töra, akhökhöla, felendrua kude. 21 Ba si manga andrö, ba mato lima ngahönö ndra matua, baero ndra alawe, baero ndraono.

III. Mowaö-waö ba dete nidanö Yesu

edit

22 Ba ifarou nifahaö,[9] ena'ö mowaö-waö ira baowo, moloyo miyefo, gasa-gasa wamofanönia niha sato.

23 Ba me no ifofanö niha sato, ba möi ia ba hili, ha ya'ia, mangandrö. Ba me no bongi, ba ha ya'ia ba da'ö.

24 Ba no so ba dalu mbaŵa nowo no mege, no tosasa ba ndrulu, noa sa zuzumö nangi.

25 Ba me miwo manu, ba möi khöra Yesu, mowaö-waö ba dete nidanö.[10]

26 Ba me la'ila ia, sowaö-waö ba dete nidanö, ba tokea ira, lamane: Bekhu! ba mu'ira-ira ba wa'ata'u.[11]

27 Ba i'anema'ö muhede khöra Yesu, imane: Mihonogö ami, ya'odo; böi mi'ata'ufi!

28 Ba itema linia Fetero, imane: Na ya'ugö, Tua, ba ŵa'ö khögu, möido khöu ba dete nidanö.

29 Ba imane: Aine! Ba möi tou Wetero, moroi ba nowo, mowaö-waö ia ba dete nidanö, i'ondrasi Yesu. 30 Ba me i'ila nangi, ba ata'u ia ba ibörötaigö ahöndrö, ba imane: He Tua, orifido!

31 Ba i'anema'ö i'oro'ö dangania Yesu, ira'u, imane khönia: He sambö famati, hana wa manufa dödöu?[12]

32 Ba me möi ira baowo, ba tebato nangi.

33 Ba mangalulu khönia zi so baowo, lamane: Duhu, Ono Lowalangi ndra'ugö.[13]

IV. Oya ifadöhö fökhö

edit

34 Ba la'ötö mbaŵa, lasaŵa danö Genezare.

35 Ba me la'ila ia banua da'ö, ba lafatenge zinenge ba zi fasui andrö fefu ba la'ohe khönia fefu zi so fökhö. 36 Ba la'andrö khönia, ena'ö ha ahe mbarunia lababaya, ba dozi sombambaya, ba döhö wökhö.[14]

Famotokhi ba gahe

edit
  1. ↑ Ayati 1–12: Mar 6:14–31; Luk 9:7–9
  2. ↑ Faigi 16:14
  3. ↑ Luk 3:19,20
  4. ↑ MozIII 18:16
  5. ↑ Faigi 21:26
  6. ↑ Ayati 13–21: Mar 6:31–44; Luk 9:11–17; Yoh 6:1–14)
  7. ↑ Faigi 9:36
  8. ↑ Faigi 15:32 b.t.
  9. ↑ Ayati 22–35: Mar 6:45–56; Yoh 6:15–21
  10. ↑ Yoh 9:8
  11. ↑ Luk 24:37
  12. ↑ Faigi 8:26
  13. ↑ Faigi 16:16
  14. ↑ Faigi 9:21; Luk 6:19

Fabaliŵa lala

edit

Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Mataio/14&oldid=6272337"