Wb/nia/Korindro II/8
Famarou ba wanolo si numana edit
I. 1 Ba lö'ö sa mabini'ö khömi, ya'ami ira talifusö, wa'ebua dödö Lowalangi andrö, ni'oroma'önia ba mbanua (niha Keriso), ba Makedonia misa.[1] 2 No oya wanandraigö, fa'afökhö, ba no fahöna göi wa'omuso dödö, no numana sibai ira, ba no abölö wa'ahakhö dödöra, lua-lua. 3 Ndrege zi tola ira, lö ubini'ö, italu'i na i zi tola, fa'aoha gölöra. 4 No laforege wangandrö khöma, ena'ö matehe khöra, awö göi ira ba wanolo ni'amoni'ö andrö.[2] 5 Ba tenga ha nidöna-dönama andrö, botora lalulu, khö Zo'aya ua, ba khöma dania, me no omasi Lowalangi. 6 Tobali mafarou dödö Dito andrö, ena'ö ifalua göi nifobörönia, ba dolo-tolo andrö, ba khömi göi.[3] 7 Ba me no fahöna khömi fefu hadia ia, he famati, ba he famahaö andrö, ba he fa'aboto ba dödö, ba he ngawalö wa'owölö-ölö fefu, ba he fa'omasimi ndra'aga, ba ena'ö a'oi göi so khömi dolo-tolo andrö.[4] 8 Tenga oroisa, na uŵa'ö khömi, ba ena'ö utandraigö, na si ndruhu wa'omasimi andrö, ena'ö ube'e fanandraigö wa'owölö-ölö danö bö'ö.[5] 9 Noa sa aboto ba dödömi wa'ahakhö dödö Zo'aya ya'ita, Yesu Keriso, wa no ifa'anumana ia, börö ami, he ŵa'ae no fahöna khönia, ena'ö fahöna dania khömi ba wa'anumanania andrö.[6] 10 Ba da'ö dödögu ba da'ö — da'ö sa zöguna khömi, me no mifobörö me ndröfia, tenga ha famalua, no fa'edöna göi[7] — 11 ba mi'asiwai göi wolau iada'e, ena'ö hulö si mane fa'aoha gölö andrö ba wa'edöna, si manö göi wamalua andrö, dali zi so khömi.[8] 12 Na so wa'aoha gölö sa, ba no ni'omasi'ö; dali zi so khönia, tenga dali zi lö'ö.[9] 13 Tenga sa ena'ö ohahau dödö danö bö'ö, ba ena'ö afökhö khömi; ena'ö fagölö-gölö a'ine: hadia zi töra khömi, götö iada'e, ba yamöi fonönö ba zambö khöra, 14 ena'ö göi möi fonönö ba zambö khömi zi töra khöra, ena'ö fagölö-gölö.[10] 15 Si mane si so ba zura: "Ba zi no oya, ba lö si töra, ba ba zi lö oya-oya, ba lö sambö."[11] 16 Ba nisuno Lowalangi, si no mame'e ba dödö Dito fa'owölö-ölö andrö, ba khömi andrö. 17 Lö'ö sa abua khönia me lafarou ia, ba noa sa fahöna khönia wa'aterou dödö, ba möi manö ia khömi, no aoha gölönia.
Sanandrösa ba zinenge si möi mangozaragö tolo-tolo edit
II. 18 Ba no mafatenge awönia dalifusö andrö, si sökhi turia ba mbanua misa fefu, ba duria somuso dödö andrö.[12] 19 Ba tenga ha da'ö, noa göi nituyu mbanua andrö ia, awöma, ba dolo-tolo andrö, si so ba dangama, ba wamosumange So'aya, ba ba wamarou tödöma. 20 Andrö malau da'ö, fa lö laböbögö khöma zi lö sökhi, ba dolo-tolo sebua andrö, nifa'emama. 21 Si sökhi sa ni'aluima, tenga ha ba zanehe Zo'aya, ba zanehe niha göi.[13] 22 Ba no mafatenge awöra dalifusöda andrö, si no faduhu dödöma, wa sowölö-ölö ia; no asese ma'ila, no oya ngawalö; ba mendrua manö owölö-ölö ia iada'e, me no faduhu sibai dödönia khömi. 23 Ba he ba khö Dito andrö, ba awögu ia, ba khömi andrö, ba sanolo ya'o ba halöŵö andrö, ba he talifusöda andrö, ba no sinenge mbanua andrö ira, lakhömi Keriso. 24 Ba na mi'oroma'ö khöra wa'omasimi, awö mbörö wanunoma ya'ami, ba no amaedola zi no so mbanua fefu.[14]
Famotokhi ba gahe edit
Fabaliŵa lala edit
Olayama Zura Korindro II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö