Wb/nia/Korindro II/7

Famarou tödö ba wangohau-hau

I. 1 Ba me no so khöda gamabu'ula li si manö, ya'ami ni'omasi'ö! ba datahaogö ita, taheta fefu zi no tokana andrö, he ba nösi, ba he ba dödö, ba wamalua fangohau-hau andrö; ta'ata'ufi Lowalangi.

Fa'omasi Waulo mbanua Gorindro

II. 2 Mifondrondrongo khöma; lö nilauma si lö sökhi ba niha, lö nifakikoma niha, lö ni'alanima. 3 Tenga fangetu'ö huku, wa uŵa'ö da'ö. Noa sa uŵa'ö mege, ba dödöma so ami, he ba wa'amate, ba he ba wa'auri, awöma. 4 No abe'e sibai dödögu ami, oi so wanunogu ya'o, ba khömi andrö; no fahöna wondrara dödö khögu, oi so wa'omuso dödögu, ba wa'afökhö andrö fefu khöma. 5 Me no marugi Makedonia sa, ba ma'ifu lö folombase mbotoma, no fahöna manö zafökhö, fasosota baero, ba bakha ba dödö, ba fa'ata'u. 6 Ba sondrara tödö zi numana, Lowalangi, da'ö zondrara tödöma, ba wa'aso Dito andrö. 7 Ba tenga ha ba wa'asonia, ba wondrara tödö andrö göi, si no falukha ia khömi, me i'ombakha'ö khöma wehulu dödömi andrö ba fangarö-ngarömi ba fa'owölö-ölömi, ba khögu andre; tobali no tedou na wa'omuso dödögu.

Fa'omuso dödönia khöra

III. 8 Ba he sa no ubusi dödömi ba zura andrö, ba lö'ö sa mangesa dödögu. Ba he no mangesa dödögu — u'ila sa, wa no abu dödömi, ba zura andrö, he lö arara — 9 ba iada'e, ba no omuso dödögu, tenga sa me no abu dödömi, me no abu dödömi ba wamalalini era-era a'ine, dali sa Lowalangi, wa abu dödömi, ena'ö lö hadia ia zi te'ala ami khöma. 10 'Lua-lua wa'abu dödö andrö sa, na dali Lowalangi, ba famalalini era-era, ba wangorifi ba mbanua furi, si lö mangesa dödö sa'ae, ba lua-lua wa'abu dödö niha guli danö andrö, ba fa'amate. 11 Hiza sa da'ö, wa no abu dödömi, dali Lowalangi, he wisa wamarounia tödömi, ba wamu'a sa'ae, ba ba wofönu, ba ba wa'ata'u, ba ba wehulu dödö, ba ba wamorege, ba ba wangotu'ö! Gofu hadia ia, niŵa'öda, ba no mi'oroma'ö, wa lö esuanö khömi ba da'ö. 12 Ba he no ufa'ohe'ö zura khömi, ba no tenga börö zi so sala andrö, ba tenga börö ba zosala ia, da'ö mbörö, ena'ö oroma ba khömi, föna Lowalangi, wa no soso dödömi ndra'aga. 13 Andrö no falukha ndra'aga wondrara dödö. Ba noa na möi fonönö wondrara dödöma wa'omuso dödöma andrö, si no fahöna, moroi ba wa'omuso dödö Dito andrö, me no falukha ia wangokafu dödö, ba khömi fefu. 14 Ba na no usuno ndra'o ma'ifu khönia, ba khömi andrö, ba lö saila ndra'o, si mane niŵa'öma khömi fefu, me no si duhu, si manö göi wanunoma ya'aga khö Dito, no si duhu. 15 Ba noa na tedou wa'omasima ami, me itörö tödönia wolo'ömi andrö, dozi ami, me mitema ia, me ata'u ami, ba me manizi-nizi ami. 16 Omuso sa dödögu, me no abe'e dödögu ami, fefu gofu hadia ia.

Famotokhi ba gahe

Fabaliŵa lala

Olayama Zura Korindro II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö