ဝၼ်းသဝ်၊ ၸုၼ်ႇ 22၊ 2024
ဢၼ်ႇတူဝ်ၼီယူဝ် ၵူတႄရႅသ်ႉ ဢၼ်ပဵၼ် ၽူႈၼမ်းၼႂ်းလူင် ၸုမ်းၸၢတ်ႈၸိုင်ႈလုမ်ႈၾႃႉ လႆႈပၼ်ၽၢင်ႉ မိူဝ်ႈဝၼ်းသုၵ်းၼၼ်ႉဝႃႈ သင်ဝႃႈ တီႈၼႂ်းၵႄႈ ဢိတ်ႈသရေး လႄႈ ႁႅꩡ်ႉပူဝ်ႇလႃႇ တီႈ လႄႇပႃႇၼွၼ်ႇၶဝ် လႆႈသွၼ်ႇၽိတ်းပိူင်ႈၵႂႃႇ ဢၼ်ၼိုင်ႈၼႆၵေႃႈ တေၸၢင်ႈမီးၽေးသိုၵ်းလူင်မႃးလႄႈ တင်းသွင်ပႃႈသွင်ၽၢႆႇ ႁႂ်ႈဢွၼ်ၵၼ် ထွႆလင် ဝႃႈၼႆယဝ်ႉ။
မိူဝ်ႈဝၼ်းသုၵ်းၼၼ်ႉ မၼ်းမွၵ်ႇလၢတ်ႈတီႈ ပၢင်ၸႅင်ႈၶၢဝ်ႇ တီႈငဝ်ႈငုၼ်းၸုမ်းၸၢတ်ႈၸိုင်ႈလုမ်ႈၾႃႉ တီႈ ၼိဝ်းယွၵ်ႉဝႃႈ ပေႃးတေလႆႈလၢတ်ႈသိုဝ်ႈသိုဝ်ႈ ၵူၼ်းၼႂ်းပိုၼ်ႉတီႈလႄႈသင် ၵူၼ်းတင်းၵမ်ႇၽႃႇလႄႈသင် တိုၼ်းဢမ်ႇႁႂ်ႈၶႂ်ႈ လႄႇပႃႇၼွၼ်ႇၼႆႉ ပဵၼ်မႃးၼင်ႇ ၷႃႇꩡႃႇၼၼ်ႉယဝ်ႉ ဝႃႈၼႆ။ တီႈလႅၼ်လိၼ် ဢိတ်ႇသရေး လႄႈ လႄႇပႃႇၼွၼ်ႇ တီႈ ၸုမ်းၸၢတ်ႈၸိုင်ႈလုမ်ႈၾႃႉ ပႂ်ႉတူၺ်းယူႇၼၼ်ႉ တင်းသွင်ပႃႈသွင်ၽၢႆႇ ၵမ်းၵမ်း မီးလွင်ႈပိုတ်းယိုဝ်းၶၢမ်ႈပူၼ်ႉလႅၼ်လိၼ်သေ ၼႂ်းဝူင်ႈဝၢင်ႈၼႆႉ တိူဝ်းၼမ်မႃးလႄႈ တီႈလႅၼ်လိၼ်ပွတ်းႁွင်ႇ ဢိတ်ႇသရေးၼၼ်ႉ လႅပ်ႈၼႃႈသိုၵ်း တေၵႂၢင်ႈၶႂၢင်မႃးယူႇယဝ်ႉ။
ၽူႈဢွၼ်ႁူဝ် တင်းသွင်ပႃႈသွင်ၽၢႆႇၵေႃႈ ၶဵင်ႇတွပ်ႇလၢတ်ႈၵၼ်သေ သၢႆငၢႆမၼ်း တိူဝ်းၶဵင်ႈၶႅင်မႃးယူႇယဝ်ႉ။ ယွၼ်ႉၼၼ်လႄႈ ၵူႈမိူင်းမိူင်း ဢွၼ်ၵၼ်လၢတ်ႈဝႃႈ ၼင်ႇႁိုဝ်သၢႆငၢႆၼႆႉ ပေႃးတေယွၼ်ႇယွမ်းၵႂႃႇၼၼ်ႉ ႁႂ်ႈဢွၼ်ၵၼ် လၢတ်ႈလီလီငၢမ်းငၢမ်း၊ ပၼ်ႁႃၼႆႉ ဢဝ်ၵၢၼ်သိုၵ်းသေ ၵႄႈလိတ်ႈ ဢမ်ႇလႆႈ ဝႃႈၼႆယဝ်ႉ။
သင်ၸိူဝ်ႉဝႃႈ သၢႆငၢႆမၼ်း တိူဝ်းၶဵင်ႈၶႅင်မႃးလိူဝ်ၼႆႉၼႆ ၵူၼ်းပိုၼ်ႉတီႈ ၸိူဝ်းယူႇတီႈ လႅၼ်လိၼ်ၽၢႆႇပုၼ်ႉၽၢႆႇၼႆႉၼၼ်ႉ တေတုၵ်ႉၶလိူဝ်သေ ၼႂ်းပိုၼ်ႉတီႈၵေႃႈ တေၸၢင်ႈထူပ်းၽေးလူင် ဝႃႈၼႆယဝ်ႉ။ မိူဝ်ႈဢွၵ်ႇထူဝ်ႇပႃႇ 7 ဝၼ်းၼၼ်ႉ ယွၼ်ႉပိူဝ်ႈ ႁႃးမၢတ်ႉသ်ၶဝ် ၶဝ်ႈတိုၵ်းၼႂ်း မိူင်းဢိတ်ႇသရေးလႄႈ လႆႈပဵၼ်ပၢင်တိုၵ်းၷႃႇꩡႃႇမႃးသေ ၵူၼ်းယူႇသဝ်းတီႈ ထုင်ႉပွတ်းႁွင်ႇဢိတ်ႇသရေး လႄႈ ပွတ်းၸၢၼ်းလႄႇပႃႇၼွၼ်ႇၶဝ် လႆႈဢွၵ်ႇပၢႆႈ တီႈလွတ်ႈၽေးၼၼ်ႉယဝ်ႉ။
ႁႅꩡ်ႉပူဝ်ႇလႃႇၶဝ်ၼႆႉ လႆႈဝႃႈၶဝ်ၵမ်ႉထႅမ် ႁႃးမၢတ်ႉသ် ဢၼ်ပဵၼ်ၸုမ်းဢူၺ်းလီၶဝ်ၼၼ်ႉသေ ၸင်ႇလႆႈဢဝ် ရွၵ်ႉၵႅတ်ႉ ပိုတ်းယိုဝ်းသႂ်ႇတီႈ ဢိတ်ႇသရေးပွတ်းႁွင်ႇၼၼ်ႉယဝ်ႉ။ ၵူၼ်းယူႇတီႈ လႅၼ်လိၼ်ၽၢႆႇပုၼ်ႉၽၢႆႇၼႆႉ မွၵ်ႈ ၼိုင်ႈသႅၼ်ၼႆႉ လႆႈၶၢႆႉႁိူၼ်းၶၢႆႉယေးမႃးယဝ်ႉ။ မိူဝ်ႈဝၼ်းသုၵ်းၼၼ်ႉ ထၢၼ်ၽွင်းလူင် ပၢႆးယူႇလီ လႄႇပႃႇၼွၼ်ႇ လၢတ်ႈဝႃႈ ယွၼ်ႉပိူဝ်ႈ ၶဵင်ႇပိုတ်းယိုဝ်းၵၼ်လႄႈ ၵူၼ်းဢၼ်လႆႈတၢႆၵႂႃႇ မီး သီႇပၢၵ်ႇပၢႆယဝ်ႉ ဝႃႈၼႆ။
Matthew Miller ဢၼ်ပဵၼ် ၽူႈမီးသုၼ်ႇလၢတ်ႈ ႁွင်ႈၵၢၼ်ၼွၵ်ႈမိူင်း ဢမႄႇရိၵၢၼ်ႇ လၢတ်ႈဝႃႈ ၽွင်း ၽူႈၼမ်းၼႂ်းလူင် ပၼ်ၽၢင်ႉ တႃႇႁႂ်ႈၵိုတ်း လွင်ႈၶဵင်ႇယိုဝ်းၵၼ် တီႈၼႂ်းၵႄႈ ဢိတ်ႇသရေး လႄႈ ႁႅꩡ်ႉပူဝ်ႇလႃႇယူႇၼၼ်ႉ ႁႅꩡ်ႉပူဝ်ႇလႃႇၶဝ် တိူဝ်းတိုၵ်းတေႃးမႃးတီႈ ဢိတ်ႇသရေးပွတ်းႁွင်ႇၼၼ်ႉလႄႈ တွၼ်ႈတႃႇ တေယွၼ်ႇယွမ်းလႆႈ သၢႆငၢႆၼႆႉ ႁႂ်ႈဢဝ်တၢင်း ၵၢၼ်ၽွင်းတၢင်သေ ၵႄႈလိတ်ႈၵႂႃႇ ဝႃႈၼႆယဝ်ႉ။
Anthony Blinken ၽွင်းလူင်ၵၢၼ်ၼွၵ်ႈမိူင်း၊ Jake Sullivan ၽူႈပၼ်တၢင်းၶႆႈၸႂ် ၵၢၼ်ႁူမ်ႇလူမ်ႈၸိုင်ႈမိူင်း ၶဝ်ၵေႃႈ လႆႈထူပ်းၵၼ်တင်း Tzachi Hanegbi ဢၼ်ပဵၼ် ၽူႈပၼ်တၢင်းၶႆႈၸႂ် ၵၢၼ်ႁူမ်ႇလူမ်ႈၸိုင်ႈမိူင်းဢိတ်ႇသရေး လႄႈ Ron Dermer ဢၼ်ပဵၼ် ၽွင်းလူင်မႁႃႇပျူႇႁႃႇ ၼၼ်ႉသေ လႆႈဢုပ်ႇဢူဝ်း တွၼ်ႈတႃႇ ၵိုတ်းတိုၵ်းၷႃႇꩡႃႇ၊ တွၼ်ႈတႃႇ ၵူၼ်းၸိူဝ်းထုၵ်ႇၺွပ်းၵႃႈ လွတ်ႈဢွၵ်ႇမႃး လႄႈ တွၼ်ႈတႃႇပၼ်တၢင်းၸွႆ ၵူၼ်းထူပ်းၽေး ၸိူဝ်းၼႆႉယဝ်ႉ။
ငိူၼ်ႈငဝ်ႈၶၢဝ်ႇ
- Michelle Nichols. "UN chief warns: Lebanon cannot become another Gaza" — Reuters, June 22, 2024
- Margaret Besheer and Nike Ching. "UN chief: Lebanon cannot ‘become another Gaza’" — VOA News, June 21, 2024
- Al Jazeera. "World cannot afford Lebanon becoming another Gaza’: UN chief" — Al Jazeera, June 21, 2024
