ဝၼ်းဢႃးတိတ်ႉ၊ ၸုၼ်ႇ 9၊ 2024
ဢိတ်ႇသရေးလၢတ်ႈဝႃႈ မိူဝ်ႈဝႃး ၶဝ် ၽူတ်ႇၸွႆႈလႆႈ ၵူၼ်းဢိတ်ႇသရေး 4 ၵေႃႉ ၼႂ်းၵႃႈ ၵူၼ်းဢၼ်ၸိူဝ်းထုၵ်ႇၸုမ်းႁႃးမၢသ်ႉၶဝ် တိၺွပ်းၵႂႃႇ မိူဝ်ႈၼႂ်ႈလွင်ႈတိုၵ်းတေႃး ဢွၵ်ႇထူဝ်ႇပႃႇ 7 ပီ 2023 ၼၼ်ႉ ဝႃႈၼႆယဝ်ႉ။ တပ်ႉသိုၵ်းဢိတ်ႇသရေး လၢတ်ႈဝႃႈ ၵူၼ်းၸိူဝ်းၽူတ်ႇၸွႆႈမႃးလႆႈ သီႇၵေႃႉၼၼ်ႉ Noa Argamani ဢႃႇယု 25 ပီ၊ Almog Meir Jan ဢႃႇယု 21 ပီ၊ Andrey Kozlov ဢႃႇယု 27 ပီ လႄႈ Shlomi Ziv ဢႃႇယု 40 ပီ ၸိူဝ်းၼႆႉသေ လႆႈႁဵတ်းၵၢၼ်ႁၢင်ႈသိုၵ်းၶိုၵ်ႉတွၼ်း ၶၢဝ်းၵၢင်ဝၼ်း တီႈၼႂ်း ပၢင်းသဝ်းၵူၼ်းပၢႆႈၽေး Nuseirat ၼၼ်ႉသေ ၽူတ်ႇၸွႆႈၶဝ်မႃးလႆႈ ဝႃႈၼႆယဝ်ႉ။
လၢတ်ႈဝႃႈ ၶဝ်ၽူတ်ႇၸွႆႈဢဝ်မႃးလႆႈတီႈ ဢွင်ႈတီႈသွင်တီႈ ဢၼ်ပဵၼ်တီႈၼႂ်း ပၢင်သဝ်း Nuseirat ၼၼ်ႉဝႃႈၼႆယဝ်ႉ။ တႄႇဢဝ်ပၢင်တိုၵ်း ဢၼ်တိုၵ်းတေႃးၵၼ်တင်း ၸုမ်းႁႃးမၢသ်ႉ တီႈ ၷႃႇꩡႃႇၼၼ်ႉသေ လႆႈႁဵတ်းၵၢၼ်ႁၢင်ႈသိုၵ်းယႂ်ႇလူင် တွၼ်ႈတႃႇ ၽူတ်ႇၸွႆႈဢဝ်ၶိုၼ်း ၵူၼ်းဢိတ်ႇသရေးသေ ယၢမ်းလဵဝ်ၸင်ႇၸၢင်ႈၽူတ်ႇၸွႆႈဢဝ်မႃးလႆႈ ၼင်ႇၼႆယဝ်ႉ။ ၼႂ်းၵႃႈ ပၢင်တိုၵ်းၷႃႇꩡႃႇ ဢၼ်ႁိုင်မႃး မီး ပႅတ်ႇလိူၼ်ယဝ်ႉၼၼ်ႉ ၵဵဝ်ႇၵပ်းလူၺ်ႈ ၽွင်းၵူၼ်းမိူင်းလႆႈတၢႆၵႂႃႇတင်းၼမ်သေ ၵူႈမိူင်းမိူင်း လႆႈထတ်းသၢင်တၢင်ႇတၢင်းၽိတ်း ဢိတ်ႇသရေးမႃးယူႇၼၼ်ႉ ၸင်ႇလႆႈၽူတ်ႇၸွႆႈၵူၼ်းဢွၵ်ႇမႃးလႆႈ ၼင်ႇၼႆယဝ်ႉ။
ၼႂ်းဝူင်ႈဝၢင်ႈၼႆႉ ၸွမ်ၽူႈၼမ်းၼႂ်း ၸုမ်းၸၢတ်ႈၸိုင်ႈလုမ်ႈၾႃႉ လႆႈဢဝ် တပ်ႉသိုၵ်းဢိတ်ႇသရေး ဢၼ်တိုၵ်းတေႃးယူႇတီႈ ၷႃႇꩡႃႇၼၼ်ႉ သႂ်ႇၶဝ်ႈတီႈၼႂ်းသဵၼ်ႈမၢႆ ၽူႈႁဵတ်းတၢင်းၽိတ်း ၼိူဝ်လုၵ်ႈဢွၼ်ႇ တီႈၼႂ်းလူၵ်ႈ ၼၼ်ႉယဝ်ႉ။ လွင်ႈလႆႈဢဝ် တပ်ႉသိုၵ်းဢိတ်ႇသရေး သႂ်ႇၼႂ်းသဵၼ်ႈမၢႆၼႆႉၵေႃႈ ၽူႈႁၢပ်ႇၵၢၼ် ၸွမ်ၽူႈၼမ်းၼႂ်း လႆႈပွင်ႇၶၢဝ်ႇလူင်ၼႃႈထိုင် ၽွင်းလူင်ဢိတ်ႇသရေး Gilad Erdan ဝႆႉသေ ၽွင်းလူင်ဢိတ်ႇသရေးၵေႃႈ လႆႈသၢၼ်ၶတ်းတွပ်ႇၶိုၼ်း ႁၢဝ်ႈႁၢဝ်ႈႁႅင်းႁႅင်း ၼႆယဝ်ႉ။ ၽွင်းလူင် ဢိတ်ႇသရေး Gilad Erdan တႅမ်ႈတၢင်ႇဝႆႉတီႈ သိုဝ်ႇသၢၼ်တူင်ႇၵူၼ်းမၼ်းဝႃႈ လွင်ႈတႅပ်းတတ်း ၸွမ်ၽူႈၼမ်းၼႂ်း ဢၼ်ၼႆႉ မၼ်းပဵၼ် ဢၼ်လီဢၢမ်းလီမိူဝ်ႇၸၢၼ်ႈ ဝႃႈၼႆယဝ်ႉ။
ၸွမ်ၽူႈၼမ်းၼႂ်း ၸုမ်းၸၢတ်ႈၸိုင်ႈလုမ်ႈၾႃႉ Antonio Guterres ၼႆႉ ပေႃး ၸုၼ်ႇ 14 ဝၼ်းမႃႈ တေဢဝ် ၽိုၼ်လိၵ်ႈ ၵဵဝ်ႇၵပ်းလူၺ်ႈ လွင်ႈသုၵ်ႉယုင်ႈၸုမ်းယိပ်းၵွင်ႈၵၢင်ႇ လႄႈ လုၵ်ႈဢွၼ်ႇ ၼၼ်ႉ လဝ်ႈတၢင်ႇတီႈ ၶွင်ႇသီႇႁူမ်ႇလူမ်ႈ ၸုမ်းၸၢတ်ႈၸိုင်ႈလုမ်ႈၾႃႉသေ တီႈၼႂ်း ၽိုၼ်လိၵ်ႈၼၼ်ႉ လႆႈဢဝ် တပ်ႉသိုၵ်းဢိတ်ႇသရေးၼႆႉ သႂ်ႇဝႆႉပဵၼ် ၸုမ်းႁဵတ်းၵၢၼ်ၽိတ်းၽိင်ႈၼိူဝ် လုၵ်ႈဢွၼ်ႇ ၼႆသေ ၸင်ႇလႆႈ ပွင်ႇၶၢဝ်ႇလူင်ႈၼႃႈဝႆႉ ၽွင်းလူင်ဢိတ်ႇသရေးၼၼ်ႉယဝ်ႉ။
ငိူၼ်ႈငဝ်ႈတိုၼ်း
edit- The New York Times. "Israel Rescues 4 Hostages in Military Operation; Gazan Officials Say Scores Are Killed" — The New York Times, JUNE 8, 2024
- Joseph Krauss. "Who are the 4 hostages rescued by Israeli forces from captivity in Gaza?" — AP News, JUNE 9, 2024
- Daniel Bellamy with AP. "Israel rescues four hostages from Gaza in deadly operation" — Euronews, JUNE 8, 2024
- Sky News. "Rescuing Israeli hostages was a 'high-risk, complex mission'" — Sky News, JUNE 8, 2024
- Amarachi Orie, Sophie Tanno, Adrienne Vogt and Matt Meyer. "Israel rescues 4 hostages in raid Gaza officials say killed over 200" — CNN, JUNE 8, 2024
- Carrie Keller-Lynn, Eduardo Kaplan and Michael Amon. "Israel Rescues Four Hostages Held in Gaza" — The Wall Street Journal, JUNE 8, 2024
