Wn/shn/ယူႇၶေႇ ထၢမ် ၵူႈမိူင်းမိူင်း ၵဵဝ်ႇၵပ်း ၽွၼ်းၽေးၶဵၼ် ပၵ်းပိူင်ႁၢပ်ႇၵၢၼ်သိုၵ်းမျၢၼ်ႇမႃႇ
ဝၼ်းပုတ်ႉ၊ မၢတ်ႉၶျ် 20၊ 2024
တီႈ ပၢင်ၵုမ် ၶွင်ႇၸီႇသုၼ်ႇလႆႈသုၼ်ႇပဵၼ်ၵူၼ်း ၸုမ်းၸၢတ်ႈၸိုင်ႈလုမ်ႈၾႃႉ ပွၵ်ႈၵမ်း 55 ၼၼ်ႉ မိူင်းယူႇၶေႇ လႆႈမီးၶေႃႈထၢမ်ထိုင် မိူင်းၸိူဝ်းၶိုၼ်ႈႁွတ်ႈပၢင်ၵုမ်မႃး လႄႈ ၽွင်းၽိသဵတ်ႇ ၸိူဝ်းၵဵဝ်ႇၵပ်း သုၼ်ႇလႆႈသုၼ်ႇပဵၼ်ၵူၼ်း ၸုမ်းၸၢတ်ႈၸိုင်ႈလုမ်ႈၾႃႉဝႃႈ "ယွၼ်ႉလူၺ်ႈ ပၵ်းပိူင်ႇ ႁၢပ်ႇၵၢၼ်သိုၵ်း ဢမ်ႇႁၢပ်ႇဢမ်ႇလႆႈ တီႈ မိူင်းမျၢၼ်ႇမႃႇၼၼ်ႉသေ တေႁဵတ်းႁိုဝ် ၵႄႈၶႆ ၽေးဢၼ်တေပဵၼ်မႃး" ဝႃႈၼႆယဝ်ႉ။
ယူႇၶေႇ ၶဝ် လႆႈႁဵတ်းဢွၵ်ႇ ၶေႃႈပိုၼ်ၽၢဝ်ႇဝႃႈ ၶဝ်လႆႈမႆႈၸႂ်ၸွမ်း ယွၼ်ႉပၵ်းပိူင်ၼႆႉလႄႈ ၵူၼ်းမိူင်းမျၢၼ်ႇမႃႇၶဝ် တေတိူဝ်းလႆႈတုၵ်ႉၶမႆႈၸႂ်ႁႅင်း ဝႃႈၼႆယဝ်ႉ။ တီႈမိူင်းမျၢၼ်ႇမႃႇၼၼ်ႉ ၵူၼ်းတႃႇ 18 လၢၼ်ႉၼႆႉ လူဝ်ႇတၢင်းၸွႆႈထႅမ် လွင်ႈတူၺ်းထိုင်ၵူၼ်းသေ ၵူၼ်း်ၸိူဝ်းဢၼ်လႆႈပၢႆႈၽေးသိုၵ်းၼႂ်းမိူင်းၼႆႉ မီးယူႇ 2.6 လၢၼ်ႉလႄႈ ၼင်ႇႁိုဝ် တၢင်းၸွႆႈထႅမ် ပေႃးတေႁွတ်ႈထိုင်တီႈၼႂ်းမိုဝ်း ၵူၼ်းၸိူဝ်းလူဝ်ႇတၢင်းၸွႆႈထႅမ်ၼၼ်ႉၵေႃႈ မၼ်းပဵၼ်ဢၼ်လမ်ႇလွင်ႈယူႇ ဢၼ်တိုၵ်ႉလူဝ်ႇယူႇတႄႉတႄႉ ၼႆ ၼႂ်းၶေႃႈပိုၼ်ၽၢဝ်ႇၼၼ်ႉ လၢတ်ႈဝႆႉ ၼင်ႇၼၼ်ယဝ်ႉ။
မိူၼ်ၼင်ႇ ၸၢဝ်းရူဝ်ႇႁိၼ်ႇၵျႃႇၼၼ်ႉၵေႃႈ ၶဝ်လႆႈၶမ်ယူႇၼႂ်းၵႄႈ ပၢင်တိုၵ်း ဢၼ်ၶွင်ႇၸီႇသိုၵ်းမၢၼ်ႈလႄႈ တပ်ႉရၶႅင်ႇၶဝ် တိုၵ်းၵၼ်ယူႇၼၼ်ႉသေ ၶဝ်ပဵၼ်ၸုမ်း ဢၼ်တိူဝ်ႉၶိူၵ်ႈႁႅင်းသေပိူၼ်ႈ ဢၼ်ထုၵ်ႇၸႅၵ်ႇၸၼ်ႉသေ သိူၵ်ႈသမ်ႇသေပိူၼ်ႈ ၼႆ ယူႇၶေႇၶဝ် မွၵ်ႇလၢတ်ႈဝႆႉဝႃႈၼၼ်။ ယူႇၶေႇၶဝ် လႆႈ သေႃႇလၢတ်ႈဝႃး တီႈလွင်ႈတၢင်းဢၼ်ပဵၼ်ယူႇတီႈ မျၢၼ်ႇမႃႇၼႆႉ လူဝ်ႇလႆႈမီး လွင်ႈဢဝ်ပုၼ်ႈၽွၼ်းသေ လွင်ႈဢၼ်ဢမ်ႇထုၵ်ႇပၼ်တၢင်းၽိတ်းသေ လွတ်ႈယူႇၼၼ်ႉၵေႃႈ ထုၵ်ႇလီလႆႈ သုတ်းသဵင်ႈယဝ်ႉ ဝႃႈၼႆ။ ယဝ်ႉၵေႃႈ တီႈၼႂ်း ၶေႃႈပိုၼ်ၽၢဝ်ႇၼၼ်ႉ ဝႃႈဝႆႉဝႃႈ ယွၼ်ႉၼၼ်လႄႈ ယူႇၶေႇ လႆႈတတ်းႁႄႉ ၼင်ႇႁိုဝ် ၶွင်ႇၸီႇသိုၵ်းမၢၼ်ႈ ပေႃးတေဢမ်ႇလႆႈ ၶိူင်ႈလၢၵ်ႈၼၢၵ်ႈ၊ ငိုၼ်းၶဝ် လႄႈ ၶိူင်းၶူဝ်းၸႂ်ႉတိုဝ်း ၸိူဝ်းၼၼ်ႉ ၼႆယဝ်ႉ။
ငိူၼ်ႈငဝ်ႈတိုၼ်း
- Foreign, Commonwealth & Development Office and Rita French. "UN Human Rights Council 55: UK Statement on Myanmar" — gov.uk, March 19, 2024
- VOA News. "မြန်မာစစ်မှုထမ်းဥပဒေ နောက်ဆက်တွဲအန္တရာယ် နိုင်ငံတကာကို UK မေးခွန်းထုတ်" — VOA News, March 20, 2024
