Wb/nia/Nehemia/8

I. Falukhata. Ibaso zura goroisa Esera

1 Ba me irugi baŵa si fitu, me no so ba mbanuara Ndraono Gizeraeli, ba owulo niha sato ha sara dödö, ba golayama sebolo, fönaföna mbawa göli ba nidanö. Ba la'andrö khö Gesera sangila amakhoita, ena'ö ihalö zura goroisa andrö khö Moze, sura niŵa'ö Lowalangi ba Ndraono Gizeraeli. 2 Ba i'ohe zura goroisa Esera ere, ba zi falukha andrö, ira matua ba ira alawe, awö dozi si biha tödö, ba wamondrondrongo, ba zi sambua desa'a, ba mbaŵa si fitu. 3 Ba ibaso, ba golayama andrö, fönaföna mbawa göli ba nidanö, i'otarai zi hulö wongi, irugi laluo, ba zi so ira matua ba ira alawe, awö zaboto ba dödö sa'ae, ba lafondrongondrongo Iraono Gizeraeli fefu niŵa'ö ba zura goroisa andrö. 4 Ba ba harehare eu yaŵa so Gesera sangila amakhoita, harehare nifa'anöra nahania, ba ba ngainia so ndra Matitia. Sema, Anaya, Uria, Hilikia, Ma'aseya, ba gambölö; ba ba gaberania ba ira Fedaya, Mizaeli, Malakhia, Hasumi, Hasibadana, Sakharia, Mesula. 5 Ba ibokai zura Esera, ba zanehe niha sato fefu — no alaŵa nahania, moroi ba zi so niha sato fefu —, ba me ibokai zura, ba muzizio niha sato fefu. 6 Ba isuno Yehowa, Lowalangi sebua, Esera, ba ladedema niha sato, lamane: Ya duhu, ya duhu! ba lafazaŵa dangara ba da'ö ba lafaöndrö ira, ba lafalögu tou ira ba danö, föna Yehowa. 7 Ba labotokhi ba dödö zato goroisa ira Yesua, Bani, Serebia, Yamini, Akubu, Sabata'i, Hodia, Ma'aseya, Kelita, Asaria, Yosabada, Hanano, Felaya, Ono Lewi andrö, ba si lö tebulö ba nahara niha sato. 8 Ba lahaogö wombaso sura goroisa Lowalangi, ba labotokhi geluaha, ba tobali aboto ba dödöra.

II. I'o'ou niha sato Nehemia, ba wangomusoi'ö tödöra

9 Ba Nehemia kumandru ba Esera ere, sangila amakhoita, ba Ono Lewi andrö, samahaö niha, ba lamane ba niha sato fefu: Baŵa ni'amoni'ö khö Lowalangimi Yehowa ma'ökhö; böi mi'angarö-ngarö ba böi mi'ege-ege! Noa sa mege-ege niha sato fefu, me larongo daroma li, oroisa andrö. 10 Ba imane khöra: Mi'ae'e, mi'a zatabö ba mibadu zami, ba mifo'urakha zi lö'ö, me no baŵa ni'amoni'ö khö zokhö ya'ita ma'ökhö. Andrö böi abu dödomi, me no fangabe'eda wa'omuso dödöda andrö ba khö Yehowa! 11 Ba larara göi dödö niha sato fefu Ono Lewi, lamane: Mihonogö ami, me no baŵa ni'amoni'ö ma'ökhö, andrö böi abu dödömi! 12 Ba möi manga ira fefu, ba ba wama'ohe'ö urakha ba nawöra; amaedola gowasa sebua lalau, somuso dödöra, noa sa latöngöni nibotokhi ba dödöra.

III. Lalau gowasa nose dahö geu

13 Ba mahemolu ö, ba falukha högö ngafu zato fefu ba ere ba Ono Lewi, khö Gesera sangila amakhoita, ba wamondrongo na taroma li, oroisa. 14 Ba lasöndra ba zura goroisa andrö, nifaŵa'ögö Yehowa khö Moze, wa ose daha geu la'iagö Iraono Gizeraeli ba mbongi gowasa andrö, ba mbaŵa si fitu, 15 awö wa labe'e li ba mbanua misa khöra fefu ba ba Yeruzalema, wa lamane: Mi'ae ba hili ba mihalö ndraha falo ba daha falo ndru'u ba daha malimbi ba bulu nandrulo ba daha geu si fadege bulu na, ba wolau ose daha geu, dali nifakhoi andrö. 16 Ba möi baero ira, lahalö ndraha geu, ba labali'ö ose khöra; ba dete nomonia ilau zamösana, ba ba golayama khöra, ba ba golayama gosali Lowalangi, ba ba golayama sebolo andrö, fönaföna mbawa göli ba nidanö ba fönaföna mbawa göli ba mado Geferayi. 17 Ba dozi niha, ha wa'ato ira, si no mangawuli moroi ba ni'oloi'ö ya'ira mege, ba solau ose daha geu ba ba da'ö la iagö. Lö'ö sa nilau Ndraono Gizeraeli si manö, i'otarai luo Yosua, ono Nuni, irugi luo da'ö; ba tobali omuso sibai dödöra. 18 Ba la'erogö ma'ökhö wombasombaso sura goroisa Lowalangi, ha uga mbongi gowasa andrö. Ba fitu bongi wa'ara lalau gowasa andrö, ba me luo si ŵalu, ba owuloa sebua, dali nifakhoi.

Famotokhi ba gahe

Fabaliŵa lala

Olayama Nehemia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö