Wb/nia/Nehemia/12

I. Töi gere ba töi Nono Lewi, si no mangawuli

1 Ba da'e döi gere ba töi Nono Lewi, si no fao khö ndra Serubabeli, ono Zelatieli, Yesua, moroi si tou: Seraya ba Yeremia ba Esera, 2 ba Amaria ba Malukhi ba Hatusi 3 ba Sekhania ba Rehumi ba Meremoto, 4 ba Ido ba Ginitoi ba Abia, 5 ba Miyamini ba Ma'adia ba Biliga 6 ba Semaya ba Yoyaribi ba Yedaya 7 ba Salu ba Amoki ba Hilikia ba Yedaya; da'ö högö gere ba högö dalifusöra, ba götö Yesua andrö. 8 Ba Ono Lewi, ba Yesua ba Binui ba Kadimieli ba Serebia ba Yuda ba Matania andrö, satua ba wanunö fangandrö saoha gölö, awö ndra talifusönia; 9 ba Bakibuki ba Uni, talifusöra, ba gamaudura, ngenoli samalamalali. 10 Ba ono Yesua, ba Yoyaki, ba ono Yoyaki, ba Eliasibi, ba ono Geliasibi, ba Yoyada, 11 ba ono Yoyada, ba Yonata, ba ono Yonata, ba Yadua. 12 Ba me luo Yoyaki, ba da'e högö ngafu ba gere: Salahi Zeraya Merari ba salahi Yeremia Hanania, 13 ba salahi Gesera Mesula ba salahi Gamaria Yohanano, 14 ba salahi Malukhi Yonata ba salahi Zebania Yosefo, 15 ba salahi Harimi Gadena, ba salahi Merayoti Helikai, 16 ba salahi Ido Zakharia ba salahi Ginitono Mesula, 17 ba salahi Gabia Zikhiri, ba so göi zalahi Miniyami, ba salahi Moadia Wilita'i, 18 ba salahi Mbiliga Zamua ba salahi Zemaya Yonata, 19 ba salahi Yoyaribi Matanai ba salahi Yedaya Usi, 20 ba salahi Zalai Galai ba salahi Gamoki Geberi 21 ba salahi Hilikia Hasabia ba salahi Yedaya Netane'eli. 22 Ba Ono Lewi: Ba götö ndra Eliasibi, Yoyada, Yohanano, Yadua tetanö ba zura högö ngafu ba ere, irugi razo Dario andrö, razo Ndrawa Weresia. 23 Högö ngafu, ma'uwu Lewi nitanö ba zura hikaya, irugi götö Yohanano, ma'uwu Geliasibi. 24 Ba högö Nono Lewi, ba Hasabia ba Serebia ba Yesua ba Bani ba Kadimieli ba talifusöra, ba gamaudura, ba wanunö, fanunö fangandrö saoha gölö, dali nifakhoi Dawido, enoni Lowalangi, wa mamalamalali ngenoli andrö: 25 Matania ba Bakibukia ba Obadia ba Mesula. Ba sanaro ba mbawandruhö Dalamono ba Akubi, sanaro ba mbate'e girö-girö andrö, ba mbawandruhö. 26 Da'ö [högö ngafu] ba götö Yoyaki, ono Yesua ono Yosadaki, ba ba götö ndra Nehemia kumandru Esera ere sangila amakhoita.

II. La'amoni'ö göli mbanua

27 Ba ba we'amoni'ö öli mbanua Yeruzalema, ba lafakaoni'ö Nono Lewi, ladozigö banua si so ira, ena'ö möi ira ba Yeruzalema, ena'ö owua-wua dödöra ba ena'ö mangandrö saoha gölö ira, ba we'amoni'ö andrö, wolau fanunö ba famözi faritia ba folau biola nitika, sebua ba side-ide. 28 Ba owulo ngenoli zanunö andrö, he öri Yeruzalema, ba öri Netofa, 29 ba he banua Mbeti Giligala ba banua Geba ba banua Asimaweti; noa sa ba zi tefasui Yeruzalema labe'e zi no amaedola halama soya khöra sanunö andrö. 30 Ba lahaogö ira ere ba Ono Lewi ba he niha sato, ba bawa göli ba öli, ba lahaogö. 31 Ba uŵa'ö möi ba göli yaŵa zatua mado Yuda, ba ufa'aso zangandrö saoha gölö, dua mbawa sebua, dua ngenoli: Si sambawa sangandrö saoha gölö, ba lasaŵa gambölö, mbawa göli golawua, tete göli lala, 32 ba solo'ö moroi furi Hosaya ba si matonga zatua mado Yuda, 33 ba Asaria ba Esera ba Mesula, 34 mado Yuda ba mado Mbeniyami ba Semaya ba Yeremia, ba ere ösa, 35 si so torofe, ba Sakharia, ono Yonata ono Zemaya ono Matania ono Mikhaya ono Zaturu ono Gasafo; 36 ba talifusönia: Semaya ba Asare'eli ba Milalai ba Gilalai ba Ma'ai ba Netane'eli ba Yuda ba Hanani, solohe nifoli andrö, khö Dawido, enoni Lowalangi; ba föna so Gesera sangila amakhoita. 37 Ba lasaŵa mbawa göli ba gumbu, ba ladölö ira miyaŵa, latöro nibosi andrö, ba mbanua Dawido, ba zanösö ba göli, yaŵa gödo Dawido, ba larugi mbawa göli ba nidanö tanö ba gatumbukha luo. 38 Ba si sambawa sangandrö saoha gölö, ba ba gabera lasaŵa, ba ya'odo zolo'ö da'ö, awö zi matonga zato, ba dete göli, matörö malige "danuri" andrö, marugi göli sawe'e-we'e andrö, 39 ba matörö mbawa göli ba mado Geferayi ba bawa göli ba mbanua satua ba bawa göli gi'a ba malige Hanane'eli ba malige Mea, ba marugi mbawa göli mbiri-biri, ba la'iagö zinga mbawa göli ba gurunga. 40 Ba tobali ba ngai gosali Lowalangi so zangandrö saoha gölö andrö, si dua mbawa, ba so göi ndra'o ba si matonga zatua, awögu, 41 ba ere andrö Eliaki ba Ma'aseya ba Miniami ba Mikhaya ba Eliunai ba Sakharia ba Hanania, si so torofe, 42 ba Ma'aseya ba Semaya ba Eleazari ba Usi ba Yohanano ba Malakhia ba Elama ba Ezeri. Ba manunö zanunö andrö, ba Yiseraya zatuara. 43 Ba sumange sebua labe'e, me luo da'ö, ba omuso dödöra, me no ibe'e khöra wa'omuso dödö sebua Lowalangi, ba he ira alawe ba iraono, ba no somuso tödö, ba tobali aröu misa terongo wa'omuso dödö Yeruzalema.

III. Aoha gölöra wame'e balazo gere andrö

44 Ba me luo da'ö, ba tefataro zamaigi-maigi ba mbate'e andrö, ba nibe'e buala andrö, saoha gölö, si a'a hadia ia ba si sambu-sambua ni'ofulu, ba nihöna ya'ia, ena'ö ba da'ö la'owuloi mbalazo gere ba balazo Nono Lewi, ame'ela mbanua misa, bua nowi; noa sa omuso dödö mado Yuda gere andrö ba Ono Lewi, sangai-ngai halöŵö. 45 Famosumange Lowalangira halöŵö da'ö ba fangehangehao andrö. Ba sanunö andrö ba sanaro ba mbawandruhö, ba la'o'ö nifakhoi ndra Dawido ononia Selomo. 46 Noa sa ba götö föna sa'ae ba götö ndra Dawido Asafo högö zanunö, ba so wanunö ba fangandrö saoha gölö, khö Lowalangi. 47 Ba dozi Iraono Gizeraeli, ba götö Zerubabeli ba ba götö Nehemia, ba labe'e mbobotolö andrö, balazo zanunö ba balazo zanaro ba mbawandruhö, ndrohu-ndrohu mbalazora ma'ökhö; ba danga Nono Lewi labe'e game'ela ni'amoni'ö andrö, ba Ono Lewi zame'e ba ma'uwu Ga'aroni ame'ela ni'amoni'ö.

Famotokhi ba gahe

Fabaliŵa lala

Olayama Nehemia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö